Хәлиқ хизмитидә жүргәнләр

Жут қәдирлигән ана

Xushnam

Уйғур наһийәсидә паалийәтчанлиғи түпәйли жут һөрмитигә бөләнгән анилар көпләп санилиду. Бир өмүр устазлиқ қилип, һөрмәтлик дәм елишқа чиққандин кейин җәмийәтлик паалийәт қайнимида жүргән Хушнәм Худайбәрдиева шулар җүмлисидин.

Жут хизмитидә болуш асан әмәсқу. Аиләвий маҗралар, яш аилиләрдики турақсизлиқ, бала тәрбийиси, той-төкүн вә өлүм-житим ишлирида исрапчилиққа йол бәрмәслик кәби мәсилиләрдә муқум тәртип орнитип, чоң вә кичик муәммаларни өз қаяшлири билән бир чинә чай үстидә һәл қилишни адәткә айландурған Хушнәм һәдә яш аниларниң миллий урпи-адәтлиримизгә садиқ болушини күзитип туриду. Болупму у өй вә һойла-арамни пакизә тутуп, яхши әнъәнилиримизниң бири – гүл өстүрүшни дайим тәрғип қилиду. Гүлгә амрақ аниниң һойлисиму гүлзарлиқни әслитиду. Мевиси мәй бағлашқа тайин тапқан беғи билән үзүм бараңлири өз алдиға.  Хасийәтлик роза ейида хәйри-еһсанлиқ ишларни уюштурушни адәткә айландурған аниниң ейтишичә, турмуш дәриҗиси төвән аилиләр дайим униң диққәт нәзәридә. Буниңдин башқа пәрзәнтләрни ана тилда оқутуш, ана тилимизда йоруқ көрүватқан нәширләргә муштири топлаш ишлиридиму у жутта башламчи болуп жүриду.

Сөзара өтмүшкә тохтилип, ана жути  — қедимий Довунни әсләп өттуқ. Мошу тәвәррүк йезида атиси Һапиз билән аниси Үнчәм бир өмүр деханчилиқ қилип өтүпту. Ата уруштин аман қайтип, йәнә қутлуқ кәтминигә егә болди. Аниму у жиллири арқа сәпниң қабаһитигә төзүп, миңлиған анилар қатарида ғалибийәт үчүн тәр төкти. Течлиқ заманда дунияға кәлгән Хушнәм жуттики йәттә жиллиқ мәктәпни пүтирип, 1963-жили Кәтмән оттура мәктивиниң 11-синипини тамамлиған дәсләпки учумкарларниң бири болди. Шу жилила у Алмутидики Қазақ педагогика институтиниң тарих факультетиға оқушқа чүшиду. Төрт жил пухта оқуп, қолиға дипломини алған яш муәллимә Дардамту йәттә жиллиқ мәктивигә йолланма билән келип, әмгәк паалийитини мудирниң орунбасарлиғидин башлапту. Көп өтмәйла оттура мәктәп мәртивиси берилгән бу  дәргаһта икки жилдәк ишләп, аилә шараитиға бенаән, Таштиқарису йезисиға көчүп барған Хушнәм йеза мәктивидә он икки жил давамида устазлиқ қилди. Андин Чонҗидики кәспий-техникилиқ училищеда паалийитини давамлаштурған у бу билим юртида ишләп өткүзгән он йәттә жил вақитни мәмнунийәт билән әскә алди.

– Шу жиллар давамида училище мудирлири Шавдун Һейтбақиев, Закир Мәмиров, Молут Һевизов вә Рәхмәтҗан Суджәков билән биллә ишлидуқ. Улар өз ишини билидиған вә тәләпчан рәһбәрләр еди. Шавдун ака дадам билән урушта биллә болған. Закир ака болса, мән Дардамту мәктивидә ишлигән пәйтләрдә егилик парткоми болған. Униң билән шу жиллири бир сәптә болдум десәмму болиду. Әнди Молут акиниң йетәкчилигидә он биринчи синипта тракторчилар курсида оқуп, қолумға гуванамиму алған едим. Әшундақ устазлирим билән биллә ишлигинимдин һели пәхирлинимән. Рәхмәтҗан у жиллири яш еди. У дайим биз кәби устазлар билән мәслиһәтлишип, иш башлатти. Умумән, у жиллири биз талай яшларниң кәсип егиләп, һаяттин өз орнини тепишиға зәмин болдуқ дәп ойлаймән, – дәйду пешқәдәм устаз.

Саламәтлигигә бенаән, 1995-жили пенсиягә чиққан Хушнәм аниниң әмгигиму мунасип баһалинипту. Көплигән пәхрий ярлиқлар шуниң дәлили. У студент чағлиридила паалийәтчанлиғи билән көзгә чүшкән екән. Тәтил пәйтлиридә елимизниң шималий вилайәтлиридә ома ишлириға иштрак қилғини үчүн «Тиң йәрләрниң өзләштүрүлгининиң 10 жиллиғи» медали, кейинки жиллири мәктәпләрдики паалийәтчанлиғи үчүн «В.И. Ленинниң туғулғининиң 100 жиллиғи» медальлири билән мукапатлинипту. Дардамту йезилиқ мәктивидә ишләватқинида, наһийәлик кеңәшниң депутатлиғиға сайланғиниму һели есида.

Хушнәм Худайбәрдиева арилап қоюн дәптиригә шеирий мисралардин үнчиләр тизишқа хуштар. Бу, әлвәттә, өткән өмүр вә у һәқтә көңүлгә қонған ички кәчүрмиләр. Қәлбидин орғуп чиққан ой тамчилирини җәмлигән аниниң бу һәвәсигиму апирин әйлидуқ.

Махмут ИСРАПИЛОВ.

Уйғур наһийәси.