Бала билән гөзәлдур аләм

Нака балиларни хошал қилди

duga

Җәмийәтниң әң аҗиз топи – мөтивәрләр билән мүмкинчилиги чәкләнгән шәхсләргә ғәмхорлуқ – елимиз ички сәяситиниң асасий йөнилишлириниң бири. Йеқинда Қорам йезилиқ Уйғур этномәдәнийәт мәркизи шөбисиниң рәиси Адилҗан Мәсимовниң Ақсақаллар кеңишиниң рәиси Сәкен Тлепбергеновниң вә Светлана Азахунова рәһбәрлигидики ханим-қизларниң уюштуруши билән «Бала билән гөзәлдур аләм» намлиқ чарә-тәдбир уюштурди. Улуқ Рамзан ейида қолға елинған бу соваплиқ мәйрәмгә туғулушидин һәрқандақ ағриққа муптила болған 20 бала вә уларниң ата-анилири тәклип қилинди.

– Бирнәччә жилдин бери мүмкинчилиги чәкләнгән балилар үчүн нурғунлиған яхши ишларни әмәлгә ашуруватқан «Инайәт» ассоциациясиниң йеқинда Алмута шәһириниң Достлуқ йезисида уюштурған хәйрихаһлиқ акциясидин үлгә елип, бүгүнки мәйрәмни  өткүзүватимиз, — деди. Ташгүл Һазиярова мәйрәмгә беғишланған тәнтәнидә. — Йоруқ дунияға мүмкинчилиги чәклинип туғулған балилар биздиму бар. Шу пәрзәнтлиримизни башқилардин кам қилмай, күндүзки күлкисидин, кечики уйқисидин кечип, нака балилирини мәхсус өйләргә өткүзүвәтмәй, айлар, жиллар мабайнида уларниң дәрдини тартип келиватқан қәһриман аниларниң әмгиги һәрқандақ мукапатқа лайиқ. Бүгүн биз шу аниларниң мискин көңлини бираз болсиму көтирип, балилирини хошаллиққа бөләшни тоғра көрдуқ.

Андин сөзгә чиққан Алмута шәһәрлик Уйғур этномәдәнийәт мәркизиниң рәиси Абдуллам Һошуров вә мәркәз әзалири Әхтирим Әхмәтова, Роза Аубакирова ярдәмгә муһтаҗ балиларниң бешини сийпаш – җәмийитимизниң актуал мәсилилириниң бири екәнлигини ейтип, балиларға маддий соғилирини тапшурди.

Узун җиллардин бери наһийәниң йеза егилиги саһасиниң тәрәққий етишигә чоң һәссә қошуп келиватқан, исми дунияға тонулған алим, йәр академиги Кәрим Худайбәрдиев бир жилдин бери Қорам йезисиниң деханлири билән  һәмкарлишиватиду. Мошу мәйрәмгә иштрак қилған Кәрим ака АҚШ президентлиғиға төрт мәртә сайлинип, накалар һарвусида олтирип әл башқурған Франклин Рузвельтниң ели үчүн қилған ишлирини мисалға кәлтүрди. Мәйрәмниң сәвәпчилири болған 20 балиниң анисиға роһини чүшәрмәслигини тиләп, уларниң һәрқайсисиға вә  уйғур вә әдәбияти пәниниң муәллими Мемангүл Һапизова билән оттура мәктәпни әла баһалар билән түгәткән үч  учумкарға маддий соғисини тапшурди. Тәнтәнә давамида нутуқ сөзлигән җумһурийәтлик этномәдәнийәт мәркизиниң иҗраий мудири Зихруллам Қурванбақиев, җумһурийәтлик «Уйғур авази» гезитиниң баш муһәррири Ершат Әсмәтов, җумһурийәтлик Уйғур театри мудириниң орунбасари Абдусаттар Турдибақиев вә башқилар нака балилар билән уларниң ғәмхорчилириға бәрдашлиқ вә утуқ тиләп, мәзкүр чарә-тәдбир уюштурғучилириға сәмимий миннәтдарлиғини билдүрди.

Мәрасим җәриянида йеза балилири тәрипидин ихчам концерт программиси намайиш қилинип, клоун кийимини кийгән Шаһадәт Хелилова балилар үчүн қизиқ оюнларни уюштурди. Паалийәтчан жутдашлиридин рази болған мүмкинчилиги чәкләнгән балиларниң ата-анилири мәйрәмни уюштурғучиларға разилиғини изһар қилип, уларға утуқ тилиди.

Рашидәм РӘҺМАНОВА.

Әмгәкчиқазақ наһийәси.