Наһийә мәркизидә тиҗарәтчилик мәркизи ечилди

damu

«Даму» тиҗарәтни қоллап-қувәтләш дөләт программисиниң ярдими билән Ишиктә шәһиридә 160 орунлуқ йеңи сода мәркизи ечилди. – Бүгүнкидәк ихтисадий қийин күнләрдиму кичик вә оттура тиҗарәт тәрәққий етиватқан әлләрдә иҗтимаий әһвал назарәттин чәттә қалмайватиду. Қазақстандиму әһвал дәл шундақ. Бүгүнки тәнтәнә шуниң ярқин бир мисали, – деди Әмгәкчиқазақ наһийәлик җәмийәтлик кеңишиниң рәиси Әдилбай Талқанбаев мәркәзниң ечилишиға беғишланған тәнтәнидә.

«Виктория» мәркизиниң тәсисчиси Сулайман Мәхсүтов – «Даму» программиси бойичә 100 миллион тәңгә несийә елип, өз тиҗарәтчилигини кәңәйтиш мүмкинчилигигә егә болди. Һазир йеңи павильонларни һесаплиғанда, мәркәзниң умумий мәйдани 2400 квадрат метрни тәшкил қилиду.

Атап кетиш керәкки, мәркәз заман тәливигә толуқ җавап бериду. Униң ичидә озуқ-түлүк, кийим-кечәк, техника, сатрашхана, дорихана вә башқиму павильонлар җайлашқан. Барлиғи кәң-таша, йоруқ һәм иссиқ. Балилири билән кәлгән херидарлар үчүн оюнчуқ һәм аттракционларға толған «Беби рум» – балилар бөлмиси хизмәт қилиду. Шундақла мәркәздә кафе-бар вә кинотеатр моҗут.

Тәнтәнигә қатнашқан Қазақстан Җумһурийити Парламентиниң сабиқ депутати Өмирғали Кенжебек, Әдилбай Талқанбаев (сүрәттә) вә башқилар онлиған адәмни иш билән тәминләп, павильонларни иҗаригә алған тиҗарәтчиләр билән херидарларни толуқ шәрт-шараит билән тәминлигән тиҗарәтчи әр-аял Сулайман вә Наталья Мәхсүтовларни тәбриклиди. Сулайман Шәмшидин оғлиға чапан йепип, утуқ тилиди.

Мәрасим давамида лотерея билетлири ойнитилип, дәсләпки меһманлар баһалиқ соғиларға еришти. Шундақла улар өзлири үчүн уюштурулған шоу-программиларни тамашә қилип, өзлири халиған товарларни әрзәнлитилгән баһаларда сетивалди.

Рашидәм РӘҺМАНОВА.

Әмгәкчиқазақ наһийәси.

Пікір қосу


XHTML: You can use these tags: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>