• Яднамә
  • 20 Қыркүйек, 2013

Бүгүн бовамни йәнә әслидуқ

Мән уруш һәққидә гезит-журналлардин, китаплардин, фильмлардин көп оқуған һәм көргән. Рәмити бовам, уруш ветерани Өмәр Савутовму уруш жиллири хәлиқниң бешиға чүшкән қийинчилиқлар тоғрилиқ көп сөзләп берәтти. 1925-жили дунияға кәлгән бовимиз анисидин кичик житим қалған екән. Житимчилиқ дәрдини тартқан у кичигидинла колхозда ишләп, тавлиниду. 1943-жили урушқа атланған у дәсләп  Петропавл шәһиридә һәрбий мәшиқтин өткәндин кейин, Белоруссияни дүшмәндин азат қилиш жәңлиригә қатнишиду. Еғир җәңләрниң биридә бовам җараһәтләнгән жутдиши Митәлип Мәстахуновни җәң мәйданидин елип чиқиду. Бәш чақиримдәк жирақлиқтики санчастьқа уни йәткүзүп, өзи қайта жәңгә кириду. Әшундақ җәңләрдә жутдиши Муртиза Зулияров қаза болиду, өзи еғир яридар болуп, госпитальға чүшүп қалиду. Сақийип чиққандин кейин у йәнә мәйданға атлиниду. Бу қетим бовам Польша, Румыния вә Чехословакия охшаш мәмликәтләрни азат қилиш җәңлиригә қатнишип, та Берлинғичә бариду. Бу уруш Ғалибийәт билән тамам болғини билән жирақ Шәриқтә япон милитаристлириға қарши уруш техи аяқлашмиған еди. 1945-жили икки ай япон урушиға қатнашқан бовам йәнә үч жилдәк Москва шәһиридә хизмәт қилип, пәқәт шуниңдин кейинла ана жутиға қайтиду. Уруштин кейин у бираз вақит Ақтам йезисида мал дохтури, кейин та пенсиягә чиққичә орман егилигидә яғач кәскүчи, орманчи болуп ишлиди. Урушта көрсәткән әрлиги вә җасарити бәдилигә «Қизил Юлтуз» ордени вә көплигән медальлар, Сталинниң имзаси қоюлған онға йеқин тәшәккүрнамиләр билән мукапатланған бовамниң течлиқ һаят шараитидики әҗриму инавәтсиз қалдурулмиди. Уйғур наһийәсиниң Пәхрий пухраси аталди. Униңға елимиз Президенти Нурсултан Назарбаевниң қол тамғиси бесилған саат соға қилинди 2003-жили Өмәр бовам бақилиқ болди. Момам Анархан иккиси тәрбийиләп, чоң қилған сәккиз пәрзәнтниң иккиси һаяттин яшла кәтти. Қалғанлири аман, һазир уларму ата-ана болуп, нәврә сөйди. Момам нәвриләр билән чәвриләрни көргәндә шатлинип, һаятиниң еғир пәйтлирини унтиғандәк болиду. Бәзән муңлинип олтарғинини көримән. Бүгүнму униң нурлуқ чеһрисидә — муң. Бизму униң әтрапида шүк олтирип, батур бовимизни әслидуқ.

Исламдин ӨМӘРОВ.

151 рет

көрсетілді

0

пікір
Алдыңғы мақала СИНАҚЛАРДИН СҮРҮНМИГӘН ЕДИ
Келесі мақала Гүлдәк яшиған аниға тазим

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

13 Қаңтар, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы