• Яднамә
• 27 Қыркүйек, 2013

Гүлдәк яшиған аниға тазим

Йешим сәксәндин алқиди. Өмрүмдә яхши адәмләрни көп учраттим. Һазир ойлисам, һаятниң өзи әшундақ яхши адәмләр билән гөзәл екән. Нурәхмәт билән Шәмшинур шундақ көңли йеқин, қәдинаслиримдин еди. Нурәхмәт Велибаев һаятиниң ахириғичә Әмгәкчиқазақ наһийәсиниң Таштиқара йезисидики Садир мәктивидә мудир болуп ишлигән. Һаяттин кәткинигә талай жил болсиму, бу есил инсанни һелиғичә жутдашлири, шагиртлири вә уни тонуйдиғанлар миннәтдарлиқ билән әскә алиду. Тәрса әҗәл ақ көңүл, хушхой, дилкәш Шәмшинурниму өз қойниға алғиниға бир жилчә болуп қалди. Пүтүн өмри Нурәхмәткә — қол-қанат, пәрзәнтлиригә — меһриван ана, йеқинлириға йөләкчи болған Шәмшинурниң һаяти устазлиқ билән өтти. Йеқинда әшу қәдирдан достлиримниң қизи Гүлстанни учритип қалдим. — Бийил апам 75 яшқа толар еди. Гүлдәстиләрни қолиға әмәс, қәбригә қойидиған болдуқ, ака, — дәп көзигә яш алди у. Мән достлиримниң бу меһриван қизиға тәсәлли бәрдиму, оюм йәнә өтмүшни чарлап кәтти. Биз хошна едуқ. Кичигимиздин дост болдуқ. Нурәхмәт иккимиз мәктәптиму биллә оқудуқ. Кейин устазлиқ кәспини егиләп, Таштиқара мәктивидә биллә ишлидуқ. У география, мән физика-математика пәнидин дәрис бәрдуқ. Әйнә шундақ арман йетиләп, яшлиқ ғәйритимиз билән ишләватқан күнләрниң биридә мәктивимизгә әндила 20гә қәдәм басқан сумбатлиқ, үзидин тәбәссүм кәтмәйдиған Шәмшинур муәллимә болуп кәлди. Ағинәм Нурәхмәт бирдин яш қизға ашиқ болди. Бир жилдин кейин достлиримниң тойини ойниған едуқ. Бу бир бәхтияр жиллар еди. Шәмшинурниң айиғи яришип, көп өтмәй, Нурәхмәт мәктәп мудири болуп тайинланди. Кейинирәк мән шәһәргә ишқа йөткилип кәттим. Достлирим болса, бир-биригә һәмра, йөләкчи, мәслиһәтчи болуп, пүткүл өмри яш әвлатқа билим бериш билән өтти. Аримиз жирақ болсиму, дайим издишип, иҗил-инақ өттуқ. Һелиму улар хатирәмниң төридә. Һәрқачан дәстихини очуқ, қәлби сехи, меһмандост Шәмшинур ятниму өз қиливетидиған әҗайип дилкәш инсан еди. Йеқинлирила әмәс, әл-жутму бу устаз анини бөләкчә қәдирләтти. Жутдашлириниң униңға мәслиһәт, йол-йоруқ сорап киргәнлигиниң талай қетим  гувачисиму болған едим. Биз Нурәхмәткә «Адаш, бу дунияда сениңдәк бәхитлик адәм болмиса керәк», дейишәттуқ. — Мән буниң үчүн мәктивимгә қәриздар. Бизни тепиштурғанму, пүтмәс бәхит һәдийә қилғанму мошу мәктәп, — дәп қойидиған рәмәтлик. Шәмшинур Шайим қизи әсли султанқорғанлиқ. Уруш башланғанда, атиси Шайим йеши йетип қалғачқа, әмгәк фронтиға әвәтилип, Сибирь хаңлирида ишләп, ағриқчан болуп қайтқан екән. Аниси Бүвисарәм         пүтүн өмри «Парижская коммуна» колхозида ишлигән меһнәткәш аял. Шәмшинур аилидики 4 қизниң иккинчиси. Ачарчилиқ, намратчилиқ дәрдини көп тартқанларниң бири. Униң оқуп, билим елишиға меһриван һәдиси Айшәм көп күч чиқарған. Шәмшинур ағриқ азавида ятқанда, бешида сиңиллири Нурәләхан, Анархан пай-петәк болушти. Һазир буларниң ичидә ялғуз Нурәләхан һаят. Нурәхмәт билән Шәмшинур бәхитлик һаят кәчүрүшти. Әмгиги мунасип баһалинип, жут ичидә аброй, шөһрәт қазиништи. Көплигән шагиртлири һәрхил саһаларда чоң утуқларға йәтти. Тонулған нахшичи Марат Мәмәтбақиев, алий категориялик хирург Пәрһалим Абдурахманов, тиҗарәтчи, шәһәрлик Уйғур этномәдәнийәт мәркизиниң рәиси Абдуллам Һошуров, «Нур Отан» партияси аппаратида хизмәт қиливатқан Асийәм Һошурова вә башқилар шулар җүмлисидин. Йәнә бир шагирти Мирзабек Ахметов Парламент Мәҗлисиниң депутатлиғиға сайланғанда, Нурәхмәт униң ишәшлик вәкили болғиниму есимда. Улар 5 пәрзәнт, 10 нәврә, 2 чәврә сөйүшти. Өзәмниң балилиримдәк көридиған қизи Гүлистан, Гүлинур, Роза, оғуллири Аблиһәт, Марат әлниң һәвәсини қозғайдиған, алий билимлик мутәхәссисләрдин болуп йетилди. Һазир кәнҗиси Марат ата-анисиниң чириғини йеқиватиду. Той-мусибәтләрдә иҗил-инақ қериндашлар мошу өйдә җәм болушиду. Бүгүн улар анини хатириләп, роһиға тазим қилишқа жиғилидиған күн. Илаһим, нийитиңлар қобул болғай, Нурәхмәт билән Шәмшинурниң роһи силәрни қоллиғай, балилирим, демәкчимән.

Шавдун ӨМӘРБАҚИЕВ,

пешқәдәм устаз.

Алмута шәһири