• Йеңилиқлар
• 27 Қыркүйек, 2013

Бехәтәрлик тәминлиниду

Қазақстан Җумһурийиниң Премьер-Министри Серик Ахметов Сочи  шәһиридә өткән Коллективлиқ бехәтәрлик шәртнамиси тәшкилатиниң Коллективлиқ бехәтәрлик кеңишиниң сессиясигә қатнашти. Униңға Қазақстанниң Премьер-Министри Серик Ахметов, Қирғизстан, Россия, Таҗикстан, Әрмәнстан вә Белорусьниң президентлири — Алмазбек Атамбаев, Владимир Путин, Эмомали Рахмон, Серж Саргсян, Александр Лукашенко һәм КБШТ баш кативи Николай Бордюжа иштрак қилди. Кеңәшмә алдида КБШТ коллективлиқ бехәтәрлик кеңишиниң һазирқи рәиси Алмазбек Атамбаев өз вакаләтлигини Россия Федерациясиниң президенти Владимир Путинға тапшуруп, униңға бу ишта муваппәқийәтләр тилиди. Россия президенти тәшкилат паалийитиниң асасий йөнилишлирини көрситип бәрди. Серик Ахметов Нурсултан Назарбаев намидин Қирғизстан Президентиға КБШТ коллективлиқ бехәтәрлик кеңишини лавазимида нәтиҗидарлиқ вә утуқлуқ әмгиги үчүн миннәтларлиғини йәткүзди вә Владимир Путинға муваппәқийәт тилиди. Делегация рәһбәрлири кеңәшмә давамида КБШТ кәңлигидә бехәтәрликни күчәйтиш мәсилилирини муһакимә қилди.  КБШТ баш кативи Николай Бордюжиниң таҗик-авған чегарисидики әһвал тоғрилиқ әхбаратини тиңшиди. —            Бизниң экспертлиримизниң пикричә, таҗик-авған чегарисидики җиддий әһвал техичә давамлишиватиду, — дәп тәкитлиди Қазақстан Җумһурийитиниң Премьер-Министри. — Шуңлашқа мошу  йәрдики чегарини һимайә қилишни күчәйтиш КБШТ үчүн наһайити муһим. Коллективлиқ Бехәтәрлик Кеңишиниң сессияси КБШТға әза дөләтләрниң «Сирия вә униң әтрапидики қелиплашқан әһвал тоғрилиқ» мураҗиәткә, сессияниң қарарлириға вә башқиму муһим һөҗҗәтләргә қол қоюш билән аяқлашти. Коллективлиқ бехәтәрлик кеңишиниң новәттики сессияси 2014-жилниң иккинчи йеримида Москва шәһиридә өтиду.