• Замандаш
• 04 Қазан, 2013

«Икки яхши бир болуп…»

Йеқинда йеза егилиги ишлириниң тәшкилатчиси Иминҗан ака Насиров билән учришип қалдим. Салам-сааттин кейин у: «Бийил Камилҗан Идрисов 75 яшқа толиду. Әлвәттә, мундақ яшқа келиватқанлар нурғун болушиму мүмкин. Лекин Камилҗанниң орни бөләк. Шуңлашқа пурсәттин пайдилинип, униң һаят йоли, әмгәк паалийити һәққидә язсаңлар, яшлиримизға үлгә-нәмунә болар еди. Чүнки, ундақ адәмләр биздә анчә көп әмәс», дәп қалди. Иминҗан акиниң бу сөзи мени ойландуруп қойди. Һәқиқәтәнму «Чирақ түви қараңғу» дегәндәк, бәзидә қолдики алтунниң қәдрини билмәй қалидиғинимиз растқу… Челәк тәвәсидики әйнә шундақ инавәтлик шәхсләрниң бири — «Әмгәкчиқазақ наһийәсиниң Пәхрий пухраси», «Саламәтликни сақлаш ишиниң әлачиси», җәмийәтлик ишларниң активисти Камилҗан Идрисов десәк, хаталашқан болмаймиз. Кичигидинла һаятниң аччиқ-чүчигини тартип чоң болған Камилҗан Мухтәр оғли өзиниң бир хатирисидә мундақ дәп йезипту: «Мән 1938-жили 22-сентябрь күни мошу Челәк йезисида туғулуптимән. Дунияға көз ечип, үч жилдин кейин дәһшәтлик уруш башлинип кәтти. Дадам Мухтәр нака болғачқа, арқа сәптә әмгәк қилди. Анам Иззәтбүви 28 йешида, акам Пазилҗан 11 йешида вапат бопту. Шу сәвәптин маңа  пәқәт үч яшқичила анамниң қучиғида беғәм һаят кәчүрүш несип болған екән». Уруш жиллириниң еғирчилиғи башқа барлиқ аилиләргә охшаш, гөдәк Камилҗанниму ана меһридин әйнә шундақ әтигән айриған еди. 1944-жили атиси Мухтәр оғлини житим болмисун дәп, Рәһбәр Иминова исимлиқ аялға өйлиниду. У бешидин көп қийинчилиқларни өткүзгәчкә, Камилҗанни өз балисидәк көрүп, ғәмхорлуғиға алиду. — Шу қийин пәйтләрдә мени өз анамдәк пәпиләп, өмрүмни сақлап қалған, оқутуп, кәлгүси һаятимға йолланма бәргән Рәһбәр анамниң роһи алдида тиз пүкимән, — дәйду Камилҗан ака сөһбәтара. Һәқиқәтәнму «Бир яхшилиқ унтулмас, бир яманлиқ» дегинидәк, Камилҗан Мухтәр оғли әшундақ меһриван аниниң тәрбийисидә чоң болуп, 1957-жили Киров намидики оттура мәктәпни әла баһалар билән тамамлайду. У мәзгилләрдә идрәклик жигитниң оқушқа чүшүши үчүн икки жил ишләш керәк болғанлиқтин, йезида шофер болуп ишләшкә тоғра келиду. Пәқәт икки жилдин кейинла Алмута Медицина институтиға оқушқа чүшүп, уни 1964-жили әла баһалар билән тамамлайду. Һәқиқитини ейтқанда, шу еғир жилларда алий мәлуматлиқ болуш чоң қәһриманлиқ еди. Врач-стоматолог мутәхәссислигини егилигән яш жигит дипломни қолиға елип, аридин бир һәптә өтә-өтмәйла институт тәрипидин берилгән йолланма билән шу кәмдики Челәк наһийәлик мәркизий ағриқханиға ишқа орунлишиду. Институтта алған нәзәрийәвий билимини әмәлиятта қоллиниш арқилиқ тәҗрибилик мутәхәссис атилиду. Шундақ ишләп жүргән чағлирида, ағриқханиниң баш врачи Габдурашит Хаджи Әхмәт оғли Абдиров уни кабинетиға чиқиривелип: «Саңа коллектив зор ишәнчә билдүрүп, намзитиңни баш врачниң биринчи орунбасарлиғиға тәвсийә қиливатиду. Мәнму сениң тиришчанлиғиңни, җавапкәрчиликни чоңқур һис қилидиғанлиғиңни билимән. Бүгүндин башлап йеңи ишни қобул қиливал», дәйду қәтъий түрдә. У илгири пәқәт бемарларни давалаш биләнла шуғулланған болса, әнди униңға зор мәсъулийәт — пүткүл ағриқханиниң «жипидин жиңнисиғичә» җавап бериш мәсъулийити жүклиниду. Яш жигит бар вуҗуди билән ишқа киришиду. У бу ишта 20 жилдин ошуқ вақит ишләш җәриянида ағриқханиниң маддий-техникилиқ базисини мустәһкәмләшкә, коллективтики тәртип-интизамға, шундақла мутәхәссис кадрларни таллап, орунлаштурушқа алаһидә көңүл бөлиду. Ағриқханиниң өп-чөрисигә сайилиқ вә мевилик дәрәқләрни тикип, үзүм бараңлиқлирини яситип, гүлләр терип, бостанлиққа айландуриду. 1993-жили барлиқ җәһәттин йетилгән мутәхәссис, уюштуруш қабилийити тәкәмуллашқан Камилҗан ака Идрисов наһийәлик терә-венерология диспансериға баш врач болуп тайинлиниду. Үгәнгән адити бойичә у бу йәрдә ишлигәндиму, диспансерниң кам-котисини толуқлашқа, ағриқларниң үнүмлүк давалиниши үчүн қолайлиқ шәрт-шараитларни яритишқа, болупму тазилиққа бөләкчә нәзәр ағдурди. Бу йәрдиму көчәтләрни тикип, бағ бәрпа қилди. Камилҗан акиниң бу жилларда қилған үнүмлик әмгиги «Саламәтликни сақлаш әлачиси» бәлгүси билән баһаланди. К.Идрисов мошу мәһкимидин 2000-жили һөрмәтлик дәм елишқа чиқти. Ишләп үгәнгән у өйдиму қол қоштуруп олтарғини йоқ. Әнди бош вақтини жутдарчилиқ ишлириға сәрип қилип, йезиниң тазилиғиға, безәндүрүлүшигә бир кишилик һәссисини қошуп келиватиду. Жут әһли арисида аброй-инавити жуқури болғачқа, униң сөзини һечким рәт қилмайду. Болупму, ана тилимизда чиқиватқан нәширләргә муштири топлашта вақит билән һесаплашмай, мәвсүмниң муваппәқийәтлик өткүзүлүшигә көп көңүл бөлиду. Милләтпәрвәр инсан сүпитидә мәтбуатниң әһмийити тоғрилиқ дост-бурадәрлири билән көпчилик арисида чүшәндүрүш ишлирини елип бариду. Әйнә шу хилдики җәмийәтлик ишлардики паалийәтчанлиғи үчүн Қазақстан Җумһурийити Президентиниң, Алмута вилайити һакиминиң, «Нур Отан» партияси Алмута вилайәтлик шөбисиниң Тәшәккүрнамилирини елишқа муваппәқ болди. Бу алий мукапатлар Камилҗан акидәк инсанниң әстаидил әмгигә берилгән жуқури баһадур. — Өмрүм беһөддә өтмиди. Азду-тола қилған хизмитим мунасип баһаланди. Әң әвзили, жутниң, көпчиликниң иззәт-һөрмитигә еришәлидим дәп ойлаймән, — дәйду Камилҗан ака мәмнунийәт билән. Камилҗан ака билән Айнур һәдиниң пәрзәнтлири Сәнәм, Аминәм, Рустәм, Селимәм ата-анисиниң еқидисини ақлап, җәмийитимизгә лайиқ инсанлардин болуп йетилди. Ейтмақчи, Рустәм атисиниң кәспини давамлаштуруватиду. У һазир наһийә мәркизи Ишиктә шәһиридики мәркизий ағриқханида биринчи дәриҗилик врач-реаниматолог сүпитидә паалийәт елип бериватиду. Өз-өзидин чүшинишликки, Камилҗан акиниң йәткән утуқлирида 50 жил биллә яшап, яр-йөләк болуп, келиватқан Айнур һәдиниңму үлүшиниң барлиғини тәкитлимәй мүмкин әмәс. У яқ узун жиллар малийә саһасида үнүмлүк әмгәк қилип, көпчиликниң һөрмитигә еришкән ана. Өзиниң меһмандостлуғи, адәмгәрчилик хисләтлири билән алаһидә пәриқлиниду. Хәлиқ нахшилирида ейтилидиған «Икки яхши бир болуп, сайни териса гүл болур…», дегән сөзләр әйнә шундақ аилиләргә нисбәтән ейтилған болса керәк. Мошундақ инсанларниң һаят паалийити яшлиримиз үчүн тәрбийә мәктиви болғисидур.

Мәһәмәтҗан ҺАПИЗОВ.

Әмгәкчиқазақ наһийәси. Сүрәттә: Камилҗан вә Айнур Идрисовлар