• Йеңилиқлар
  • 02 Сәуір, 2012

Инсан саламәтлиги һәммидин әвзәл

Мәлумки, һәр жили март ейида Европа вә дуния урологлири ассоциациясиниң новәттики конгресси өткүзүлиду. Бийил бу конгресс Париж шәһиридә 27-қетим пүткүл дуния урологлириниң бешини қошуп, униңға ахирқи онлиған жиллардин бу ян муһим иҗтимаий проблемиға айланған әрләр саламәтлигини сақлашниң әң актуал проблемилири муһакимә қилинди. Күн тәртивидә мана мошундақ мәсилиниң қоюлуши конгрессқа дунияниң 180дин ошуқ мәмликитидин кәлгән 10 миң уролог-алимниң қатнишишиға сәвәп болди. Конгресс иштракчилири икки күн мабайнида урология саһасиға мунасивәтлик болған онлиған муһим мәсилиләр әтрапида қизғин бәс-муназириләрни жүргүзди. Бу конгрессқа  қатнишиш үчүн Қазақстандин барған 25 врач-уролог җумһурийитимизниң барлиқ регионлириға вакаләтлик қилди. Делегациягә Б.Жарбусынов намидики Урология илмий мәркизиниң мудири, дөләт мукапитиниң лауреати, Европа вә дуния урологлири ассоциациясиниң әзаси, профессор Мирзакерим Алчынбаев рәһбәрлик қилди. Қазақстанлиқ урологлар конгрессниң «Әрләр вә репродуктивлиқ саламәтлик» сессиясиниң «баш қәһриманлириға» айланди дәп ейтишқа толуқ асас бар. Чүнки бу сессиядә Б.Жарбусынов намидики Урология илмий мәркизи мудириниң орунбасари Камалҗан Надировниң доклади алаһидә қизиқиш пәйда қилип, сессия ишракчилириниң қизғин муһакимә қилишиға түрткә болди. Ейтиш керәкки, конгресс иши пәқәт инглиз тилида елип берилиши шәрт болғачқа, Камалҗан Тәлъәт оғли өз докладиниму мошу тилда оқуди. Әлвәттә, жирақ Қазақстандин кәлгән уйғур жигитиниң докладни инглиз тилида оқуғанлиғи әмәс, бәлки униңда көтирилгән мәсилиниң актуаллиғи, умумән, урология саһасиға аит болған кесәлликләрни сақайтиш вә уларниң алдини елиш Қазақстанда дөләтлик әһмийәткә егә мәсилә екәнлиги чоң қизиқиш һасил қилғанлиғи ениқ. — Әлвәттә, чәт әлликләрниң, җүмлидин алим-урологларниң Дөлитимиз рәһбири Нурсултан Назарбаевниң һәр жили қазақстанлиқларға йоллайдиған Мәктүплиридин анчә хәвири йоқ екәнлиги ениқ, — дәйду Камалҗан Надиров биз билән болған сөһбәттә. — Лекин әйнә шу Мәктүпләрдә аһали саламәтлигини сақлашқа, умумән, медицина саһасини тәрәққий әткүзүшкә алаһидә әһмийәт берилидиғанлиғи докладимниң асасини тәшкил қилғачқа, бу мәсилә чәт әллик кәсипдашлиримизда қизиқиш пәйда қилди. Шуңлашқиму сессия иши наһайити қизиқ өтти вә нәтиҗилик болди. Докладим бойичә соалларниң хелила нурғун вә хилму-хил болуши әйнә шундақ нәтиҗә чиқиришимизға толуқ асас болса керәк дәп ойлаймән. Әнди һәр жили Қазақстанда 27 миң әр киши дөләт тәрипидин бөлүнгән мәбләғ һесавиға һәқсиз медицинилиқ тәкшүрүштин өтидиғанлиғини, җумһурийитимизниң барлиқ вилайәтлиридә «Әрләр саламәтлиги күнлири» турақлиқ уюштурулидиғанлиғини ейтқинимизда, бу мәсилиләр чәт әллик урологларда алаһидә қизиқиш пәйда қилғанлиғини өз көзимиз билән көрдуқ. Дәрһәқиқәт, Қазақстанда аһали саламәтлигини сақлаш саһасиға турақлиқ әһмийәт берилип келиватиду. Пәқәт «Саламатты Қазақстан — 2015» дөләт программисини әмәлгә ашурушқа бөлүнгән мәбләғ һәр жили ички умумий мәһсулат көләминиң икки пайизини тәшкил қиливатиду. Инсан саламәтлигини сақлаш, медицинилиқ хизмәт көрситишни мукәммәлләштүрүш елимизда қобул қилинған вә муваппәқийәтлик әмәлгә ашурулуватқан барлиқ иҗтимаий программиларниң асасини тәшкил қилидиғанлиғини елимиз Президенти Нурсултан Назарбаев бийил Қазақстан хәлқигә йоллиған «Иҗтимаий-ихтисадий йеңилиниш — Қазақстан тәрәққиятиниң асасий йөнилиши» Мәктүбидә алаһидә тәкитләп, саламәтликни сақлаш системисиниң сүпәтлик тәрәққий етиватқанлиғини, һаят кәчүрүш узақлиғи өсүп, һәр хил кесәлликләрдин йүз беридиған өлүм көрсәткүчи 1,7 һәссә төвәнлигәнлигини алаһидә тилға алди. Дөләт рәһбириниң бийилқи Мәктүбидә алға сүрүлгән асасий он йөнилишниң бири елимизда инсан капиталиниң сүпәтлик өсүшигә, җүмлидин медицина саһасиға беғишланғанлиғиниң өзи Қазақстанда инсан саламәтлиги һәммидин әвзәл екәнлигиниң йәнә бир ярқин испати болса керәк. Буни жуқурида сөз болған дуния урологлириниң Париждики конгрессниң нәтиҗилириму тәстиқләйду. Мундақ дәп ейтишимизниң сәвәви, Камалҗан Тәлъәт оғли билән болған сөһбитимиз җәриянида хәлиққә медицинилиқ хизмәт көрситиш бойичә иштик сүръәт билән тәрәққий етиватқан дөләтләр қатаридин Қазақстанму мунасип орунни егилигәнлигини конгресс иштракчилири бир еғиздин етирап қилғанлиғини билдуқ. Әгәр һәқиқәтәнму шундақ болса, нур үстигә нурдур.

Иврайим БАРАТОВ.

СҮРӘТТӘ: конференция минбиридә — Камалҗан Надиров.

655 рет

көрсетілді

4

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы