• Дидар ғенимәт
  • 25 Қазан, 2013

Иссиқкөлдики учришиш

Алмута вә Бишкек шәһәрлириниң жигитбашлири хелә жиллардин буян өзара қоюқ арилишип келиватиду. Бу хилдики мунасивәтләрниң даириси пәқәт той-төкүн вә нәзир-чирақ биләнла чәкләнмәйду. Мәхсус тәклипләр түпәйли уюштурулидиған учришишларда һәр икки тәрәптики җәмийәтлик ишлар, хәлқимиз өтмүши вә бүгүнкисигә бағлиқ мәсилиләр муһакимә қилиниду, жигитбашлири паалийитидики үлгилик ишлар бойичә тәҗрибә алмаштурулиду. Алмутилиқлар өз меһманлирини Уйғур наһийәсидики иссиқ су мәнбәлиригә, яйлақларға тәклип қилса, бишкеклиқлар ағинилирини, биринчи новәттә, һәммигә тонуш Иссиқкөлгә, Ош шәһири йолидики Сусамир охшаш көркәм җайға апириду. Бийил қирғизстанлиқлар язниң томузида Алмута тәрәпкә келип кәткән болса, алмутилиқ бир топ жигитбашлири октябрь ейиниң бешида Бишкекта болуп қайтти. Алтә кишидин тәркип тапқан делегация тәркивидә мәзкүр қурларниң муәллипиму болди. Җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси А.Мәхсүтов вә Алмута шәһәрлик мәшрәпниң беги С.Ғаппаров йетәкчилигидики алмутилиқларни қирғизстанлиқ Мәмәт Исмайилов күтүвелип, Новопокровка йезисиға елип барди. Бизни бу йәрдә Бишкек шәһириниң баш жигитбеши Өмәрҗан Һәмраев вә җәмийәтлик ишларниң активистлири Әркин Садиқов, Рәпқәт Йүсүпов, Полат Өмәров, Ришат Кенчебаев, Аблемит Ибрагимов қарши алди. Дәстихандин дәм тартип, өзара дидарлашқандин кейин, биз үч машинида Иссиқкөлгә қарап атландуқ... Иссиқкөлгә берип жүргәнләр билидуки, Тохмаққичә болған йол түзләң арқилиқ өтиду, кейин тағлар башлиниду. Рыбачьеғичә (һазир Белиқчи) болған йолниң оң тәрипидә төмүр йол, сол тәрипидә сүйи анчә мол әмәс дәрия бар екән. Төмүр йоли айрим участкиларда қанчә егиз көтирилсә, дәрия шунчә пәстә шақирап ақидекән. Автомобильниң үчтин икки қисминиң сүпити интайин яхши. Биз мәнзилгә йәткичә бирнәччә йәрдә тохтап, тәбиәт гөзәллигидин һөзүрләндуқ. Бишкеклик жигитләр һәммимизниң дәм елиши үчүн «Ақ марал», — дәп атилидиған, көлниң қирғиғиға җайлашқан комплексни таллапту. Бу йәрдин Чолпан-Атиғичә төрт чақирим екән. Мән өткән жили Қара деңиз қирғиғидики Ялтида болған едим. Иссиқкөлниң тәбиити әйнә шу Қиримдики мәшһур курортлуқ шәһәрни ядимға салғандәк болди. Биринчи күнки олтиришимиз та йерим кечигичә созулуп, асасән нахша-саз вә чақчақлардин ибарәт болди... Саз-нәғмә вә чақчақлар, тәбиәтниң гөзәл мәнзирисидин алған тәсиратларни техиму күчәйтти. Җиддий сөһбәт, бәс-муназириләрму орун алди. Өмәрҗан башлиқ саһипханлар җәмийәтлик ишлар тоғрилиқ әхбарат бәрсә, алмутилиқлар җай-җайлардики жигитбашлириниң паалийитигә қисқичә тохтилип өтти. Айрим чарә-тәдбирләрни бирлишип өткүзүш тоғрилиқму сөз болди. Шуниң биринчи қәдими сүпитидә атақлиқ чақчақчи Һесам Қурбанниң хатирисигә беғишлап, Алмутида күлкә кечини өткүзүш реҗиләнди... Иссиқкөл билән хошлишип, қайтқанда, бишкеклиқ достлиримиз бизгә йол үстидики йәнә бир карамәт орунни көрсәтти. Тохмақ шәһиридин бираз өткәндин кейинла машинилар йолниң сол тәрипигә бурулди. Көз алдимизда тропикилиқ мәнзирә пәйда болди. Сүнъий вә интайин егиз пальмилар нурғун болуп, уларни безәп турған фонтанлар, суниң оттурисидики пешайванлар, уларниң йенида үзүп жүргән аққушлар мәзкүр дәм елиш орниниң наминиң «Гавайи» екәнлигини ипадиләп турғандәк еди. Униң егилири уйғур жигитлири Җүръәт вә Ғәйрәт Абдуллаевлар екән. Алмутилиқ жигитбашлириниң Бишкектики кәсипдашлири тәрипидин уюштурулған новәттики дәм елиш әйнә шундақ көңүллүк аяқлашти.

Рабик ИСМАЙИЛОВ.

210 рет

көрсетілді

0

пікір
Алдыңғы мақала Ана мәктивидә баш қошти
Келесі мақала Алим билән учрашти

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы