• Замандаш
  • 25 Қазан, 2013

Қәлби судәк таза жигит

1963-жил. Шаир Һезим Искәндәровниң йеңи дастани йоруқ көрди. У вақитта шаир Уйғур наһийәсиниң Чарин оттура мәктивидә мудир болуп ишләвататти. Шаирниң иҗадийитидики бу йеңилиқ пүткүл йезиға пур кәтти. Шу күни мәзкүр мәктәпниң устазлири Авакри Әлахунов билән Рисаләт Сейитоваларниң аилисидә болса, пәрзәнт дунияға кәлди. Мәктәп коллективи «жуюшни» қайси хошаллиқтин башлаймиз дегәндә, мудир һеч ойланмастинла «Әлвәттә, әң алди билән Әлахуновниң оғлини жуюмиз», дегән екән. У күни Әлахуновларниң аилисидә баш қошқан кәсипдашлар билән дост-бурадәрләр  биринчи қәдәһни шаирниң тилигигә көтәргән охшайду. Шаир өй егилиригә «Мениң дастаним билән биллә сениң оғлуң дунияға кәлди, шуңлашқа униң исмини «Дастан» дәп қояйли», дегән екән. Мудирни һәммә бир еғиздин қоллап-қувәтләпту. Әлахуновларниң алтинчи пәрзәнди — Дастанни ата-анилири «Тетик» тәхәллуслиқ атақлиқ шаиримиз исмини қойған, дәп әркилитәтти. У  һәқиқәтәнму шаир охшаш тетик һәм әқиллик болуп өсти. Улуқ Вәтән урушиниң ветерани, Қазақстан Маарип әлачиси Авакри Әлахунов билән Рисаләт Сейитованиң исмини чаринлиқлар мошу кәмгичә һөрмәт билән тилға алиду. Һәр иккилиси пүткүл аңлиқ һаятини маарип саһасиға беғишлиған устазлар. Амма уларниң өмри қисқа болди. Рисаләт анимиз — 48 йешида, Авакри атимиз 60 йешида һаяттин өтти. — Ата-анимизниң биз, пәрзәнтлириниң, яхшилиғини көридиған пәйтидә һаяттин өткинигә наһайити өкүнимән, — дәйду Дастан Авакри оғли сөһбәт ара. — Улар биз, йәттә пәрзәнтни, беқип қатарға қошқичә көп қийинчилиқларни баштин кәчүрди. Мән анамдин он төрт йешимда қалдим. Ана меһригә тоймай өстүм. Уларниң өлүмидин кейин тәғдир бизгә күлүп баққини йоқ. Қара әҗәл биз, Әлахуновларни, үч қериндишимиздин айрип, зар жиғлатти. Амма оғулларниң тунҗиси Султан акам бизни тәнтирәтмәй, қанитиниң астиға елип өстүрди. Шуңлашқа бизниң униңға нисбәтән миннәтдарлиғимиз чәксиз. У бизгә һәм ата, һәм ана болди. Һәммимизниң оқуп, билим елишимизға шараит яратти. Һазир тәвәррүк өйүмизниң чириғини кәнҗә сиңлимиз Гүлбәһрәм өчәрмәй келиватиду. У Чарин йезисидики ағриқханиниң баш врачи. Дастан оттура мәктәптин кейин Алмутидики төмүр йолчилар институтида тәһсил көриду. У өз паалийитини Уйғур наһийәсиниң Таштиқарису йезидики совхозда аддий слесарьлиқтин башлайду. Кейинирәк йезилиқ комсомол комитетида, андин наһийәлик комсомол комитетида паалийәт елип бариду. Өткән әсирниң 90-жиллириниң башлирида йүз бәргән ихтисадий боһран уни «учартип», Алмута шәһиригә елип кәлди. Амма у тенәп-тәнтиригини йоқ. Қолидин иш келидиған жигит шәһәрдиму путиға туруп үлгәрди. Бүгүнки күндә болса, Дастан Әлахунов алмутилиқларни таза су билән тәминләйдиған Алмута шәһири вә Алмута вилайәтлик «Су егилиги мәһкимиси» башлиғиниң орунбасари. Уни коллективи «Дастан Авакри оғлиниң қәлби, худди өзи бериватқан судәк таза», дәп тәрипләйдиғиниму бекар әмәс. — Ата-анам дәсләпки устазлирим болса, мениң һаяттин орнумни тепишимда устазлиқ қилған йәнә бир акам бар, — дәйду Дастан Авакри оғли. — У  мениң беваситә башлиғим Муратбәг Мирзигүл оғли Насиров. Мән униңдин көп нәрсиләрни үгәндим. Униң тәләпчанлиғи түпәйли, мән бүгүнкидәк утуқларни қолға кәлтүрдүм, десәм хаталашмаймән. Униң тәкливи билән Аграрлиқ университетни тамамлап, йәнә бир диплом алдим. Дастан Авакри оғли аилисидә бәхитлик ата. Өмүрлүк җүпти Бәхтинур Сейитова иккиси икки пәрзәнт тәрбийиләп қатарға қошти. Пәрзәнтлириниң тунҗиси — Каминур, икки алий оқуш орнини тамамлап, шәһәрдики бир ширкәттә ишләйду. Қизи Аида болса, студент. Бизму бу аилигә хатирҗәмлик тиләп хошлаштуқ. Бәхтишат СОПИЕВ.    

796 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы