• Йеңилиқлар
• 02 Сәуір, 2012

Террорлуқ һәрикәтләрниң алди елинди

Қазақстан Җумһурийити Баш прокуратурисиниң хәвәрлишичә, 24-март күни мәмликәт Миллий бехәтәрлик комитети Алмута территориясидә террорлуқ һәрикәтләрниң алдини алди. Мәхсус хизмәт орунлириниң мәлуматлириға қариғанда, планланған террорлуқ һәрикәтләрниң уюштурғучиси Қазақстан граждани, 1975-жили туғулған Александр Павлов болуп чиққан. 2009-жилдин бу ян у Қазақстан һоқуқ қоғдаш органлиридин йошурунуп, чәт әлдә жүриду. У 2005-жилдин бери БТА Банкниң сабиқ рәһбири Мухтар Абләзовниң шәхсий күзитини башқуриду, униң йошурун тапшуруқлирини орунлайду. Җүмлидин Александр Павлов Мухтар Абляәзовқа БТА Банкиниң наһайити нурғун миқдардики мәблиғини оғрилашқа ярдәм қилиду. 2009-жили февральда болса, Абләзовниң шәхсий архивини вә БТА Банкиниң Корпоративлиқ тиҗарәт башқармиси компьютерлириниң дисклирини елип кетишни уюштуриду, униңдин кейин өзиму Бүйүк Британиягә кетип, мошу кәмгичә Қазақстанға кәлмиди. 2010-жили апрельда Павловқа мунасивәтлик ишәш қилип тапшурулған башқилар мүлкини сиңдүрүвелиш яки исрап қилиш факти бойичә (Қазақстан Җумһурийити Җинаий кодекси 176-маддисиниң 3-қисми) җинаий иш қозғалди. Һоқуқ қоғдаш органлириниң ениқлишичә, ройхәткә елинмиған «Алға» партияси рәһбәрлириниң бири Муратбек Кетебаев Павлов билән тил бириктүргән һалда һәрикәт қилған, уму Мухтар Абләзовниң йеқин ишәшлик вәкиллириниң бири болуп һесаплиниду вә турақлиқ чәт әлдә яшаватиду. Улар терроризм вә экстремизм һәрикәтлирини уюштуруш планлирини 2011-жилниң сентябрь ейидин бу ян көңлигә пүкүп кәлгән. 2012-жили март ейиниң бешида уларниң өз шериклиригә 24-март күни җәмийәтлик орунларда, җүмлидин Алмута шәһириниң парк зонилирида вә мәмурий беналириниң йенида бир қатар партлашларни әмәлгә ашурушни тапшурғанлиғи ениқланди. Җүмлидин Павловниң шәхсән өзи иҗра қилғучиға Әвезов наһийәсидики «Сары Арқа» кинотеатриниң кәйнидики «Фэмэли» истираһәт беғида партлаш уюштуруш, шундақла Әл-Фараби проспектидики пиядә маңғучилар өткүллиригә партлаш қурулмилирини қоюш тапшуруғини бәргән. Террорлуқ һәрикәтләрни уюштуруш үчүн Павлов 25 миң доллар миқдарида ахча бөлүп, униң 15 миңи иҗра қилғучиға берилгән. Қалған 10 миң долларни болса, террорлуқ һәрикәтләр әмәлгә ашурулғандин кейин төләш планланған. Оператив-тәргәв чарилири давамида аһалини қорқутуш, қалаймиқанчилиқ вә паракәндилик кәйпиятини пәйда қилиш, мәмликәттики иҗтимаий-сәясий вәзийәтни турақсизлаштуруш террорлуқ һәрикәтниң асасий мәхсити болғанлиғи ениқланди. Атап көрситилгән факт бойичә Қазақстан Җумһурийити Җинаий кодекси 233-маддисиниң (терроризм) 1-қисмиға мувапиқ җинаий иш қозғалди вә тәргәв қилиниватиду. Тәргәв даирисидә һоқуқ қоғдаш органлириға жуқурида атап көрситилгән шәхсләрниң Қазақстанда террорлуқ һәрикәтләрни бирлишип әмәлгә ашуруш, шундақла диний вә миллий асаста тоқунушларни пәйда қилиш мәхситидә радикал кәйпияттики диний топларниң вәкиллири, шу җүмлидин чәт әлләрдики вәкиллири билән алақә орнитишқа урунғанлиғи тоғрилиқ әхбарат келип чүшти. Һазирқи вақитта бир қатар шәхсләр қолға елинди вә улар гуналирини бойниға елип, гувалиқ бериватиду, дейилиду Қазақстан Җумһурийити Баш прокуратурисиниң мәтбуат хәвиридә. Тәргәв мәнпийәтлиридә башқа әхбарат елан қилинмайватиду.