• Йеңилиқлар
• 25 Қазан, 2013

Президент Ғәрбий Қазақстанда болди

Дөләт рәһбири Нурсултан Назарбаев Ғәрбий Қазақстан вилайитидә иш бабидики сәпәрдә болуп, регионниң иҗтимаий-ихтисадий тәрәққияти билән тонушти. Дәсләп Президент «Стекло-Сервис» ҖЧЙниң паалийити билән тонушти.Бу йәрдә Президент автоматлаштурулған линияләрниң ишини көздин кәчүрди. 2003-жили қурулған кархана ишләпчиқириватқан мәһсулат җумһурийәттә қурулуш көләминиң өсүшигә бағлиқ барғансири көп тәләп қилиниватиду. Чиқириливатқан мәһсулат түрлириму көп. Бу йәрдә Дөләт рәһбири тиҗарәтчиләр вә җамаәтчилик вәкиллири билән учрашти. Сөһбәт давамида Нурсултан Назарбаев иҗтимаий-ихтисадий тәрәққият вә аһалини иш билән тәминләш мәсилилирини һәл қилишқа алаһидә диққәт ағдурди. Президент шундақла йеза егилигиниң муһим саһаларниң бири екәнлигини, шуңлашқа униң нәтиҗидарлиғини ашуруш тәләп қилиниватқанлиғини алаһидә тәкитлиди. Дөләт рәһбири шундақла җумһурийәттә индустриал-инновациялик программини әмәлгә ашуруш бойичә хелә ишниң әмәлгә ашурулғанлиғини, әнди болса, пайдилинишқа берилгән һәрбир карханиниң нәтиҗидарлиқ паалийитини тәминләшниң зөрүр екәнлигини қәйт қилди. Учришишта вилайәт һакими Нурлан Ноғаев регионниң тәрәққияти тоғрилиқ әхбарат бәрди. Униң тәкитлишичә, йәр асти байлиқлири мол өлкидә газ вә газ конденсатини чиқириш көпийиватиду, санаәт мәһсулатиниң көләми өсүватиду. Президент шундақла миңлиған студент тәһсил көрүватқан көп саһалиқ алий оқуш орни һесапланған Жәңгир хан намидики Ғәрбий Қазақстан аграр-техникилиқ университетида болди. Бу йәрдә мутәхәссисләр әмгәк базириниң тәләплиригә мувапиқ тәйярлиниватиду. Буниңда шундақла регионниң вә умумән мәмликәтниң хәлиқ егилиги комплексини тәрәққий әткүзүш сүръәтлириму һесапқа елиниду. Нурсултан Назарбаев униңдин ташқири университетниң тәҗрибә-ишләпчиқириш мәркизидә болуп, униң паалийити билән тонушти.