• Йеңилиқлар
• 22 Қараша, 2013

Қазақстан Җумһурийитиниң Истималчилар һоқуқлирини қоғдаш агентлиғи тоғрилиқ

Қазақстан Җумһурийити Президентиниң Пәрмани

Қазақстан Җумһурийитиниң Конституцияси 44-маддисиниң 3) қошумчә пунктиға мувапиқ тохтам қилимән: Қазақстан Җумһурийити Саламәтликни сақлаш министрлиги Қазақстан Җумһурийити истималчилар һоқуқлирини қоғдаш агентлиғини (буниңдин кейин — Агентлиқ) бөлүш йоли арқилиқ униңға: 1) Қазақстан Җумһурийити Риқабәтчиликни қоғдаш агентлиғидин (Монополиягә қарши агентлиқ) — истималчиларниң һоқуқлирини қоғдаш; 2) Қазақстан Җумһурийити Саламәтликни сақлаш министрлигидин аһалиниң санитариялик-эпидемиологиялик саламәтлиги; 3) Қазақстан Җумһурийити Индустрия вә йеңи технологияләр министрлигидин —  истималчиларға сетилидиған мәһсулатлар вә көрситилидиған хизмәтләр бойичә техникилиқ регламентлар һәм нормативлиқ һөҗҗәтләр билән бәлгүләнгән тәләпләрниң сақлинишини, шундақла озуқ-түлүк мәһсулатлирини сетиш басқучида униң бехәтәрлиги саһасини тәкшүрүш вә назарәт қилишни әмәлгә ашуруш йөнилишидики вәзипиләр вә вакаләтләр берилип, қайта уюштурулсун. 2. Қазақстан Җумһурийитиниң Һөкүмити: 1) Қазақстан Җумһурийити Саламәтликни сақлаш министрлигиниң Дөләт санитариялик-эпидемиологиялик назарәт комитетини (буниңдин кейин — Комитет) тарқатсун; 2) тарқитилидиған Комитетниң вә жуқурида атап көрситилгән дөләт органлириниң тегишлик штат санини йеңидин қурулған Агентлиққа тапшурушни тәминлисун; 3) тарқитилидиған Комитетниң һоқуқлири вә вәзипилири бойичә Агентлиқни һоқуқлуқ мирасхор дәп бәлгүлисун; 4) Агентлиқни истималчиларниң һоқуқлирини қоғдаш вә аһалиниң санитариялик-эпидемиологиялик саламәтлиги саһасидики вакаләтлик орган дәп бәлгүлисун, шундақла униңға истималчиларниң һоқуқлирини қоғдаш һәм аһалиниң санитариялик-эпидемиологиялик саламәтлиги саһасидики дөләт сәяситини әмәлгә ашурушни тәминләш бойичә дөләт органлирини саһаларара уйғунлаштурушни әмәлгә ашуруш вәзипилири берилсун; 5) 2013-жилниң ахириғичә истималчиларниң һоқуқлирини қоғдаш саһасидики дөләт сәяситиниң асасий йөнилишлирини мукәммәлләштүрүш бойичә тәклипләр тәйярлансун; 6) мәзкүр Пәрманни әмәлгә ашуруш бойичә башқиму зөрүр чариләр көрүлсун. 3. «Қазақстан Җумһурийити Һөкүмитиниң структуриси тоғрилиқ» Қазақстан Җумһурийити Президентиниң 1999-жил 22-январьдики №6-Пәрманиға мундақ қошумчә киргүзүлсун: 1-пункт төвәндики мәзмундики қур билән толуқтурулсун: «Қазақстан Җумһурийитиниң Истималчилар һоқуқини қоғдаш агентлиғи». 4. Мәзкүр Пәрманниң орунлинишини назарәт қилиш Қазақстан Җумһурийити Президентиниң Мәмурийитигә жүкләнсун. 5. Мәзкүр Пәрман имзаланған күндин тартип күчигә кириду.

Қазақстан Җумһурийитиниң Президенти

Н.Назарбаев

Астана, Ақорда, 2013-жил 13-ноябрь. №691