• 1-декабрь — Тунҗа Президент күни
  • 29 Қараша, 2013

ХӘЛИҚНИ ҖИПСИЛАШТУРИДИҒАН МӘЙРӘМ

Президент вә Мустәқиллик — мәнадаш чүшәнчиләр. Мустәқилликкә еришиш вә заманға мувапиқ, башқа мәмликәтләр билән тәңдаш-баравәр — иҗтимаий-ихтисадий җәһәттин турақлиқ, аһалисиниң турмуш вә билим дәриҗиси, мәдәнийити жуқури, дуния бирләшмисиниң тәңһоқуқлуқ әзаси болалайдиған дөләт қуруш — абройлуқ, шуниң билән бирқатарда салмақлиқ һәм җавапкәрлиги наһайити жуқури вәзипә. Әйнә шундақ еғир һәм абройлуқ җавапкәрликни Қазақстан Җумһурийитиниң Тунҗа Президенти Нурсултан Әбиш оғли Назарбаев өз зиммисигә алди. Бүгүнки таңда еғиз толтуруп тәкитләймизки, Президентимиз мундақ мурәккәп вәзипә һөддисидин шәрәплик чиқти вә сәясий хәритидә йеңила пәйда болған мәмликәтни жигирмә жил ичидила пүткүл җаһан әһлигә тонутти. Һазир Қазақстан пәқәт Мәркизий Азия регионидила әмәс, бәлки дуниявий геосәясәттә мунасип орун егилигән, пикирлири һесапқа елинидиған дөләт. Мошуниң һәммиси — Тунҗа Президентимизниң көпқирлиқ паалийитиниң нәтиҗиси. Қазақстанлиқларму Милләт Лидериниң миллий дөләтчиликни шәкилләндүрүш вә тәрәққий әткүзүш җәриянидики бебаһа хизмәтлирини етирап қилишниң, униңға умумхәлиқ һөрмитини билдүрүшниң нишани сүпитидә Тунҗа Президент күни тәсис қилинди. Бу мәйрәм өткән жили елимизниң шанлиқ сәнәлири календаридин орун алди вә бийил иккинчи қетим нишанланмақта. Мәйрәм тоғрилиқ гәп қилғанда, Президент таллавалған йолниң тоғра болғанлиғини бүгүнки тәрәққият дәриҗисиниң яққал көрситиватқанлиғини тилға алған орунлуқтур. Мәмликәт өз тәғдирини күчлүк һәм парасәтлик рәһбәргә ишәш қилип тапшуруп, өткән әсирниң 90-жиллиридики қалаймиқанчилиқларни йеңип чиқти вә дуниявий бирләшмидә мунасип орунни егилиди. Һазир Қазақстан дунияниң нәрқ ихтисади қелиплишип, җошқун тәрәққий етиватқан, дөләт башқуруш системиси вә демократия институтлири шәкилләнгән мәмликәтлириниң қатарида тилға елиниду. Җумһурийәттә кичик вә оттура тиҗарәт сүръәтлик тәрәққий етиватиду, йеңи ишләпчиқириш орунлири пайдилинишқа берилип, йеңи иш орунлири ечиливатиду,  иҗтимаий инфрақурулум объектлири — балилар бағчилири, мәктәпләр, ағриқханилар селиниватиду. Өз новитидә, қазақстанлиқларниң турмуш дәриҗисиму жилдин-жилға яхшилиниватиду. Иш һәққи, пенсияләр, ярдәм пули миқдариниң һәр жили дегидәк өсүп, өз вақтида берилиши, яшлиримизниң дуниявий үлгиләр бойичә билим елиш имканийитигә егә болуши жуқурида ейтилған пикирлиримизгә ишәшлик һәм асаслиқ мисал болалайду, дәп ойлаймиз. Нәтиҗидә ихтисадий паравәнлик җумһурийәттики иҗтимаий кәйпиятқиму иҗабий тәсир йәткүзмәктә, Җумһурийәттә йүздин ошуқ милләт вәкиллири течлиқ вә разимәнликтә қатар яшап, мустәқил Қазақстанниң һәқиқәтәнму «Хәлиқләр достлуғиниң лабораторияси» екәнлигини иш йүзидә тәстиқләп кәлмәктә. Иҗил-инақ яшаватқан барлиқ милләтләр өз тилини, маарип-мәдәнийитини, әдәбият-сәнъитини, урпи-адәт, әнъәнилирини риваҗландуруш имканийитигә егә. Уларниң мәнпийәтлири надир конституциялик орган — Президентниң тәшәббуси билән қурулған Қазақстан хәлқи Ассамблеясиниң, униң тәркивидики миллий этномәдәнийәт мәркәзлириниң көпқирлиқ паалийитидә өз әксини тапқан. Әнди ташқи сәясәткә кәлсәк, өткән жигирмә икки жил ичидә мәмликитимиз хәлиқара мәйданда течлиқпәрвәр дөләт абройиға еришти. Униң көпқирлиқ ташқи сәясити дуниявий бирләшминиң барлиқ әзалири билән өзара пайдилиқ һәмкарлиқни йолға селип, тәрәққий әткүзүшкә қаритилған болса, мисли көрүлмигән течлиқ тәшәббуслири регионал вә аләмшумул бехәтәрликниң тәминлинишигә салмақлиқ һәссә қошуп келиватмақта. Мошуниң һәммиси — Дөләт рәһбириниң турақлиқ диққәт вә күчини, түрлүк саһалар бойичә билим вә салаһийитини тәләп қилидиған күндилик җиддий паалийитиниң нәтиҗиси. Һечбир мубалиғисиз шундақ. Чүнки дунияниң көплигән йетәкчи дөләтлириниң рәһбәрлири, көрнәклик сәясәтчиләр билән экспертлар Қазақстан таллавалған һәм сәясий, һәм ихтисадий ислаһатлар үлгисиниң — күчлүк президентлиқ һакимийәт вә җүръәтлик ихтисадий ислаһатлар йолиниң — утуқлуқ болғанлиғини бир еғиздин етирап қилмақта. Улар шундақла Нурсултан Назарбаевниң стратегиялик җәһәттин жирақни көрүшни билидиғанлиғини, униң сәясий хаһиш-ирадисиниң күчлүклүгини алаһидә тилға алиду. Дөләт рәһбириниң утуқлуқ әмәлгә ашқан йәнә бир лайиһиси — бу һазир миллионға йеқин, йәни 807474 турғун яшаватқан мәмликәт пайтәхти Астана. Президент пайтәхтни гөзәл вә көркәм Алмутидин чәттики, боран вә шувурғанлар чаңгилида қалған Ақмолиға көчириш қарарини қобул қилғанда, мундақ идеяниң әмәлгә ашидиғанлиғиға ишәнгүчиләргә қариғанда, ишәнмәйдиғанларниң, ениғирағи, униңға қарши болғанларниң бесим көпчиликни тәшкил қилғанлиғини һәммимиз билимиз. Бирақ һәммигә адил баһасини беридиған вақит һәммә нәрсини өз орниға қойди. Бүгүнки таңда ХХІ әсиргә йүксәк тәрәққият билән қәдәм ташлиған Астанани Мәркизий Азия феномени дәп атимақта. Һазир у пәқәт мәмликәт пайтәхтила әмәс, бәлки хәлиқара дәриҗидики муһим сәясий вә ихтисадий әнҗуманлар, илмий конференцияләр, симпозиумлар турақлиқ өтүватқан чоң мәркәз сүпитидиму тилға елиниду. Астана төридә Дуниявий вә әнъәнивий динлар рәһбәрлири қурултайлириниң, хелә жиллардин кейин ЕБҺТниң тарихий саммитиниң, қишлиқ Азия оюнлириниң вә башқиму муһим чарә-тәдбирләрниң өткүзүлгәнлиги шуниң испатидур. Әнди болса, Сарыарқа төридики Астана «ЭКСПО-2017» Хәлиқара ихтисаслаштурулған көргәзмисигә тәйярлиқ көрүватиду. Мошуниң һәммиси Дөләт рәһбириниң дана ташқи сәяситиниң паалийитиниң нәтиҗиси. Мәлумки, мустәқилликниң дәсләпки жиллирида Президент мәмликәт тәрәққиятиниң 2030-жилғичә бәлгүләнгән Стратегиясини илгири сүрүп, уни әмәлгә ашурушниң асасий йөнилишлирини бәлгүләп бәрди. Қазақстанлиқларму барлиқ иш-паалийитини уни рояпқа чиқиришқа сәрип қилди. Бүгүнки таңда болса, мәзкүр Стратегиядә көздә тутулған мәхсәт-нишанларниң қәрәлидин илгири орунланғанлиғини, Қазақстанниң дунияниң әң тәрәққий әткән әллик мәмликитиниң қатариға киргәнлигини пүткүл аһали мәғрурланған һалда тилға алмақта. Стратегияни әмәлгә ашуруш арқилиқ Қазақстан хәлқи, әгәр сәясий мәхсәт-ирадә, хәлиқниң җипсилиғи вә униң ишләш хаһиши болса, һәрқандақ миқияслиқ вәзипиләрни орунлашниң мүмкин екәнлигини намайиш қилди. Мошуниң һәммиси Дөләт рәһбириниң утуқлуқ таллавалған сәясий-иҗтимаий йолиниң тоғра болғанлиғиниң нәтиҗиси. Өткән жили болса, Президент «Қазақстан — 2050» Стратегиясини оттуриға қоюп, техиму бүйүк мәхсәт-вәзипиләрни бәлгүлиди. Йошурушниң һаҗити йоқки, йеңи технологияләрни җарий қилишқа вә ишләпчиқиришни диверсификацияләшкә асасланған ихтисатниң турақлиқ өсүшини тәминләш, инсан капиталиниң риқабәткә қабиллиғини ашуруш, милләтләрара разимәнликни, бехәтәрликни, хәлиқара мунасивәтләрдики турақлиқни мустәһкәмләш наһайити миқияслиқ вә улуғвар вәзипиләрдур. Мошуларниң һәммиси, сөзсизки, мустәқил Қазақстан аһалиси паравәнлигиниң ашурулушиға, мәмликәтниң йеңи сүпәтлик турмуш дәриҗисигә көтирилишигә елип келиду. Мана мошундақ улуғвар мәхсәт-муддиалар нуқтәий нәзәридин яндашсақ, календаримиздики йеңи мәйрәм чоң вәтәнпәрвәрлик мәзмун-маһийәткә егә. Әнди буниң Қазақстанниң көпмилләтлик хәлқини Тунҗа Президент — Милләт Лидери Нурсултан Назарбаев әтрапиға техиму җипсилаштуридиғанлиғи, у оттуриға қойған вәзипә-тапшурмиларни орунлашқа дәвәт қилидиғанлиғи ениқ. Мәйрәм мубарәк болсун!

Шөһрәт МӘСИМОВ. 

224 рет

көрсетілді

0

пікір
Алдыңғы мақала Қазақстанниң йеңи дәвриниң дәсләпки күни
Келесі мақала ПАЙТӘХТКӘ — АЛАҺИДӘ ДИҚҚӘТ

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

14 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы