• Йеңилиқлар
• 20 Желтоқсан, 2013

Өз мәртивисини тәстиқлимәктә

Алмутида Мустәқиллик күнигә беғишланған тәнтәнилик жиғин болуп өтти. Җәнубий пайтәхт һакими Ахметжан Есимовниң тәкитлишичә, аз-кам чарәк әсир ичидә мәмликәт башқа дөләтләр әсирләр мабайнида қолға кәлтүргән утуқларға йәтти.Җәмийәт һаятиниң барлиқ саһалирида түп-асаслиқ өзгиришләр йүз бәрди. Мәмликәт Президентиниң рәһбәрлиги астида миқияслиқ иҗтимаий-ихтисадий вә сәясий ислаһатлар әмәлгә ашурулди. Бу Қазақстанниң дунияниң тәрәққий әткән 50 мәмликитиниң қатариға киришигә имканийәт яратти. Алмутиға кәлсәк, шәһәр өзиниң пәқәт җумһурийәтниңла әмәс, бәлки пүткүл Мәркизий Азия региониниң ихтисадий, малийә, мәдәний вә маарип мәркизи мәртивисини тәстиқлимәктә. Бийил шәһәр бюджети 359 миллиард тәңгини тәшкил қилди — бу Әрмәнстан, Қирғизстан, Таҗикстан охшаш дөләтләрниң бюджети билән баравәр. Тәнтәнилик жиғин атақлиқ сәнъәт коллективлири вә артистларниң қатнишишида өткән мәйрәмлик концерт билән аяқлашти.     16-декабрь күни шәһәрдики мәркизий мәйданда тәнтәнилик митинг болуп өтти. Униңға қатнашқан наһийә җамаәтчилигиниң вәкиллири алди билән Желтоқсан вақиәсигә қатнишип, қурван болған Ләззәт Асанова билән Ербол Сыпатаевқа орнитилған ядикарлиққа гүлчәмбәрләрни қоюп, бир дәқиқә сүкүнат ичидә әскә алди. Митингни Бөлтирик Жақыпов киришмә сөз билән ечип, жиғилғанларни мәйрәм мунасивити билән тәбриклиди. Шундақла наһийәлик ағриқханиниң бөлүм башлиғи, врач  Қасимҗан Илиев, наһийәлик Славян мәдәнийәт мәркизиниң вәкили Ольга Савченко тәбрик сөз сөзлиди. Ахирида Яркәнт гуманитарлиқ-техникилиқ колледжиниң коллективи Желтоқсан вақиәсини ипадиләйдиған театрлаштурулған көрүнүшләрни намайиш қилип, концерт көрсәтти.

Нурәхмәт ӘХМӘТОВ.