• Йеңилиқлар
• 26 Желтоқсан, 2013

Стратегиялик яндишиш һәммидин муһим

Премьер-Министр Серик Ахметов Дөләт рәһбири 20-декабрьда, Индустриаллаштуруш күнидә бәргән тапшурмиларни әмәлгә ашуруш мәсилилири бойичә кеңәшмә өткүзди. Кеңәшмигә мәркизий иҗраий органларниң, миллий ширкәтләрниң, саһалиқ ассоциацияләрниң рәһбәрлири қатнашти.Баш қошушта  Премьер-Министрниң орунбасари — индустрия вә йеңи технологияләр министри Ә.Есекешев, регионал тәрәққият министриниң орунбасари С.Жуманғарин, «Союз «Атамекен» миллий ихтисадий палата башқармисиниң рәиси А.Мырзахметов индустриаллаштуруш, кичик вә оттура тиҗарәтни тәрәққий әткүзүш мәсилилири бойичә доклад билән сөзгә чиқти. Премьер-Министр Серик Ахметов Президентниң тапшурмилирини орунлаш мәсилилиригә тохтилип, министрликләр билән идариләр паалийитиниң асасий йөнилишлирини бәлгүләп бәрди, 2014-жилниң биринчи йериминиң ахириғичә биз индустриаллаштурушниң иккинчи бәш жиллиғиниң программисини, шундақла әйнә шуниң асасида ихтисатниң нефть-газ, тағ-кан, металлургия санаити, аграр-санаәт комплекси охшаш муһим саһалирини тәрәққий әткүзүшниң комплекслиқ планлирини ишләп чиқишимиз керәк, —  деди Премьер-Министр вә санаәт тәрәққияти бойичә комиссия қурушни  чапсанлитишни тапшурди. Серик Ахметов «индустриаллаштурушниң иккинчи бәш жиллиғиниң программисини ишләп чиққанда санаәт сәяситиниң «әвришим» болуп, дуниявий тенденцияләрниң өзгиришигә чапсан маслишиши» керәклигини тәкитлиди. Униңдин ташқири Премьер-Министр «барлиқ министрликләр билән идариләргә тиҗарәтчилик субъектлирини асассиз һәм пландин сирт тәкшүрүшни тохтитишни» тапшурди. Һөкүмәт башлиғи кеңәшмә йәкүнини чиқирип, Президентниң барлиқ тапшурмилириниң ениқ һәм бәлгүләнгән қәрәлдә орунлиниши керәклигини атап көрсәтти.