• Йеңилиқлар
• 16 Қаңтар, 2014

Инақлиғимиз ярашқан

Йәттисуниң этномәдәний мәркәзлири җәмийитимиздә турақлиқ һәм милләтләрара разимәнликни сақлаш мәсилисидә қизғин паалийәт жүргүзүватмақта. Өткән жилниң ахирида Қазақстан хәлқи Алмута вилайәтлик Ассамблеяси Талдиқорған Достлуқ өйиниң бәш жиллиғини тәнтәнилик нишанлиди. Чирайлиқ селинған үч қәвәтлик бенада миллий-мәдәний мәркәзләр, «Улағат» ақсақаллар кеңиши, «Бирлик» яшлар ассоциацияси вә бирқатар җәмийәтлик тәшкилатлар тилларни, мәдәний әнъәниләрни тикләш бойичә тилға аларлиқ паалийәт жүргүзүватиду. Вилайәтлик ҚХА рәисиниң орунбасари — кативат мудири Ғәбит Турсынбайниң тәкитлишичә, қисқа қәрәл ичидила Достлуқ өйи иҗтимаий тәшәббуслар мәркизигә айланди. Ассамблея йенида Анилар кеңиши ишләшкә башлиди, барлиқ наһийәлик мәркәзләрдә вә регионниң шәһәрлиридә җәмийәтлик разимәнлик кеңәшлири қурулди. Вилайәт һакими Аңсар Мусаханов Достлуқ өйи йенида түрлүк милләтләрниң вәкиллирини җәлип қилип, яшларни дөләт хизмитигә тәйярлаш мәркизини уюштурушни тапшурди. Йәттисулуқлар иҗтимаий вә мәдәний объектларни селиш һәм җөндәш бойичә «Ана йәргә тазим» акциясигә паал қатнишиватиду, «Достлуқ дәстихини» программиси  вә «Течлиқ вә разимәнликниң йол хәритиси» лайиһиси бойичә хәйрихаһлиқ чарә-тәдбирләр көздә тутулди. Алакөл наһийәсидә Шәрқий Қазақстан этномәдәний бирләшмилириниң вәкиллирини қобул қилиш, Көксу наһийәлик Рус этномәдәнийәт мәркизиниң он жиллиғини, Чонҗа йезисида «Арзу» хәлиқ ансамблиниң концертини өткүзүш, Үштөбидики «Бірлігіміз жарасқан» форуми — вилайәтлик Ассамблея тәрипидин уюштурулған чарә-тәдбирләрниң толуқ әмәс тизими әйнә шундақ. Көпчиликниң көңлидин чиқиватқан бу хилдики мәрасимларға йәттисулуқлар паал қатнишиватиду. Мәсилән, Чонҗа йезисиниң турғунлири бирнәччә қетим хәлиқара конкурсларниң лауреати аталған «Арзу» ансамблиниң артистлирини гүлдүрлигән алқишлар билән қарши алмақта. Мәзкүр коллектив Россия, Қирғизстан, Өзбәкстан, Польша, Венгрия вә Хитай охшаш бирқатар мәмликәтләрдә гастрольларда болған. Талдиқорған Достлуқ өйиниң мудири Жанат Садековниң тәкитлишичә, бүгүнки таңда Қазақстан хәлқи Ассамблеяси түрлүк милләтләр оттурисида өзара ишәнчә һәм шериклик мунасивәтни қелиплаштурмақта. Әнди миллий, конфессиялик, мәдәний вә тил җәһәттин хилму-хиллиқ җумһурийәтниң бебаһа байлиғи болуп һесаплиниду. Әгәр этномәдәний бирләшмиләр уюштуруватқан һәрқандақ мәйрәмгә диққәт ағдурсақ, чеченлар мәйримидә рус вә қазақ, полякләр мәйримидә уйғур вә татар нахша-уссуллири орунлиниду. Мошуниң һәммиси мәмликитимиздә һөкүм сүрүватқан течлиқ вә разимәнликниң нишани. Бу бизниң умумий роһий байлиғимиз.