• Йеңилиқлар
• 23 Қаңтар, 2014

Хәлиқ мәнпийитини көзләйду

Мәлумки, Президент Нурсултан Назарбаев қазақстанлиқларға өзиниң новәттики «Қазақстан йоли – 2050: бир мәхсәт, бир мәнпийәт, бир келәчәк» намлиқ Мәктүбини йоллиди. Униңда «Қазақстан – 2050» Стратегиясини орунлаш вә келәчәктә тәрәққий әткән 30 мәмликәтниң қатариға кириш реҗилири тәклип қилинип, мәзкүр тарихий һөҗҗәт илғар тәрәққият йөнилишлири бойичә алға илгириләшниң йоллирини техиму айдиңлаштурди. Бу қетим Дөләт рәһбири илим-пәнниң тәрәққиятиға алаһидә көңүл бөлди. Бу йосунда индустриал-инновациялик тәрәққиятқа илмий җәһәттин яндишиш көздә тутулмақта. Андин кичик вә оттура тиҗарәтни қоллаш, йеза егилигидә йетиштүрүлүватқан мәһсулатлар көләмини ашуруш, мүмкинчилиги чәкләнгән шәхсләр мәнпийитини қоғдаш вә иҗтимаий бөлүм хизмәтчилири, саламәтлик сақчилири билән муәллимләрни қоллап, уларниң айлиқ маашини көтириш мәсилилири һәл қилинишини күтүватқан көплигән муәммалар җүмлисидин болди. Бу ишларниң дөләт дәриҗисидә назарәткә елинғини һәммимизни хошал қилғини талашсиз. Мәктүптә умумий билим беридиған мәктәпләрни әқлий мәктәпләр дәриҗисигә йәткүзүш тәкитләнгән. Кәлгүсидә яшларниң техникилиқ билим елишини дөләтлик капаләтләндүрүшкә көчириш ғайисиму көпчилик көңлидики мәсилә дәп ойлаймән. Қазақстан – бизниң вәтинимиз. Мошу қутлуқ диярни маканлиған барчә хәлиқни умумәхсәт, умумәнпийәт вә умумкеләчәккә башлиған елимиз Президентини биз дайим қоллап-қувәтләймиз вә униң улуғвар ғайилирини әмәлгә ашурушта бир кишидәк күч чиқиримиз.     Мунира АБДУЛЛАЕВА,     Чонҗа йезисидики Илия Бәхтия намидики 3-уйғур оттура мәктивиниң мудири. Уйғур наһийәси.