• Турнир
• 06 Ақпан, 2014

Шагиртлар күч синашти

Уйғур наһийәсидә тәнтәрбийә вә спорт саһасиниң тәрәққиятиға үлүш қошуп, йеза яшлири билән өсмүрләр арисида сағлам һаят тәризини тәрғип қилған устаз-мәшиқләндүргүчиләр көпләп санилиду. Болат Ахметов,  Азат Палтушев, Турсун Һезбақиев, Әркин Мамутов әйнә шулар җүмлисидин. Бу спорт ветеранлириниң арисида мәрһум Иса Мирзаевниңму наһийәдики спорт ишқивазлириниң қәлбидә орни бөләк. Чүнки униң әстаидил әмгиги бәдилигә наһийәниң нурғунлиған қиз-оғуллири вилайәт вә җумһурийәт даирисидә тонулушқа мувәппәқ болған еди. Наринқол наһийәсиниң (һазирқи Райимбек) Сүмбә йезисида 1948-жили дунияға кәлгән Иса Қизилчегара йезисидики оттура мәктәпни тамамлап, Алмутидики Қазақ тәнтәрбийә институтида тәһсил көриду. Мәзкүр билим дәргаһини 1972-жили пүтирип, шу жилила Уйғур наһийәлик балилар вә өсмүрләр спорт мәктивидә әмгәк паалийитини яш футболчиларни мәшиқләндүрүштин башлиди. Төрт жил мабайнида вилайәт даирисигә тонулған футболчилар арисида Тиливалди Кебиров Алмутиниң «Қайрат» командиси тәркивигә елинип, устазиниң әмгигини ақлиған еди. Бу наһийә үчүн чоң утуқ еди. Шуңлашқа 1976-жили наһийәлик парткомниң қарари билән наһийәлик «Қайрат» ихтиярий спорт җәмийитиниң рәислигигә тайинланған устаз-мәшиқләндүргүчи барлиқ егиликләрдә  мәзкүр жәмийәтниң шөбилирини ечип, ишқа қизғин киришти. Он бәш жил мабайнида наһийә яшлири бирнәччә қетим вилайәт бойичә ғалип аталди. 2011-жили һөрмәтлик дәм елишқа чиққан Иса ака көп жиллиқ меһнәтниң һалавитини көрүп үлгәрмәйла дуниядин өтти. Йеқинда рәмитиниң қәдинас ағиниси Аблимит Мәрдановниң тәшәббуси вә наһийә рәһбәрлиги, наһийәлик балилар вә өсмүрләр спорт мәктивиниң һәм Иса акиниң әл-ағинилириниң, уруқ-туққанлириниң қоллап-қувәтлиши билән армрестлинг бойичә мәрһумниң хатирисигә беғишланған турнир уюштурулди. Яш спортчилар алдида сөзгә чиққан наһийәлик спорт мәктивиниң мудири Җаһангир Мәҗитов, мәшиқләндүргүчи Элмира Сартбаева, наһийәлик тәнтәрбийә вә спорт бөлүминиң башлиғи Адилҗан Қурбанниязов, мөтивәрләр Аблимит Мәрданов, Марат Гайитов вә башқилар бемәзгил дуниядин өткән жутдишини әсләп, хатирилири билән бөлүшти. Андин наһийәдики оттура мәктәпләрниң оқуғучилири билән сабиқ шагиртлар синаққа чүшүп, һәрхил салмақ дәриҗисидики 85 спортчи биләк күчини намайиш қилди. Мукапатлиқ орунларға еришкәнләр спорт мәктиви мудирийитиниң медали вә пәхрий ярлиқлири билән мукапатланди. Ахирида мусабиқини  уюштурғучи топ сөзгә чиқип, ушбу чарә-тәдбирниң утуқлуқ өтүшигә үлүшини қошқан жутдашларға миннәтдарлиқ изһар қилди.

Махмут ИСРАПИЛОВ.

Уйғур наһийәси.