• Дидар ғенимәт
• 13 Ақпан, 2014

Алим билән учрашти

Өткән шәнбә күни Алмута шәһириниң Достлуқ мәһәллисидики Абдулла Розибақиев намидики 153-мәктәп-гимназиягә уйғур зиялилири билән җамаәтчилик вәкиллири жиғилди. Чүнки бу билим дәргаһиға дуниядики әң күчлүк он алимниң қатаридин орун алған уйғур пәрзәнди, медицина пәнлириниң доктори Шөһрәт Мутәллипов кәлгән еди.  Җумһурийәтлик Уйғур этномәдәнийәт мәркизиниң уюштуруши билән өткүзүлгән ушбу учришишни ачқан ҖУЭМниң рәиси Шаһимәрдан Нурумов уйғур хәлқиниң пәхригә айланған алимни тонуштурғач, бу ғенимәт дәмләрниң һәммимиз үчүн алаһидә әһмийәткә егә екәнлигини тәкитлиди. Андин учришиш қатнашқучилириниң илтимасиға бенаән сөз новити Шөһрәт Мутәллиповқа берилди. Алим нурғун гәп қилмиди, пәқәт һазир аилиси билән АҚШниң Портленд шәһиридә (Орегон штати) истиқамәт қиливатқанлиғини вә узун жиллардин буян шуғуллинип келиватқан илмий ишлири тоғрилиқ қисқичә ейтип өтти. — Мән илмий тәтқиқат тәжрибилиримни көпинчә маймунлар асасида елип бериватимән, — деди у. — Башқа алимлар тәҗрибилирини асасән чашқанлар мисалида жүргүзиду һәм бу улар үчүн әрзәнгә тохтайду. Мениң тәҗрибилирим уларға нисбәтән хелила қиммәт. Умумән, йәттә-сәккиз жилниң ичидә мошу саһаға 10 миллиондин ошуқ АҚШ доллири сәрип қилинди. Мошу йәрдә шу нәрсини алаһидә тәкитләш лазимки, дуния әһлигә тонулған алимниң интайин кичик пейил һәм камсөзлүги вә көпчилик тәрипидин берилгән айрим соалларға таза ана тилида ениқ җавап бәргәнлиги учришиш қатнашқучилирини қайил қилди. Учришиш җәриянида Шөһрәт Мутәллиповниң атиси, пешқәдәм устаз Музәппәр Мутәллиповму сөзгә чиқип, пәрзәнтлирини, җүмлидин Шөһрәтни тәрбийиләп, қатарға қошқичә рәпиқиси иккисиниң тартқан җапа-мәшәқәтлиригә тохталған һалда, бүгүнки таңда шу еқидисиниң зайә кәтмигәнлигигә интайин хурсән екәнлигини мәмнунийәт илкидә тилға алди. Учришиш ахирида Шаһимәрдан Нурумов Шөһрәт Мутәллиповқа қиммәт вақтини бөлүп, көпчиликкә унтулмас дәқиқиләрни һәдийә  қилғанлиғи үчүн миннәтдарлиқ билдүрди. 153-мәктәп гимназияниң мудири Шавкәт Өмәров болса, меһманға өзи рәһбәрлик қиливатқан билим дәргаһи тәрипидин тәсис қилинған Абдулла Розибақиев намидики медальни тапшурди.

Мәшүр САСИҚОВ.

Алмута шәһири.