• Йеңилиқлар
• 13 Сәуір, 2012

«Ирадиниң концертиға мәрһәмәт!»

Һәммимизгә мәлумки, 19 — 23 апрель күнлири Алмутида, Қ.Ғоҗамияров намидики җумһурийәтлик дөләт Уйғур музыкилиқ комедия театрида Яркәнт шәһиридә тәшкил қилинған «Ирадә» нахша-уссул ансамблиниң концерти өткүзүлиду. Шуниңға мунасивәтлик биз мәзкүр сәнъәт коллективиниң бәдиий рәһбири һәм продюсери Полат Һезимов билән сөһбәтләштуқ. — Полат, алди билән, өзәң рәһбәрлик қиливатқан «Ирадә» ансамблиниң қандақ барлиққа кәлгәнлиги тоғрилиқ қисқичә ейтип өтсәң. — Ядиңда болса, буниңдин 4-5 жил илгири, шу пәйттә Уйғур театрини башқурған, һазирқи Мәҗлис депутати Мурат Әхмәдиевниң тәшәббуси һәм уюштуруши билән бир түркүм талантлиқ яшлиримиз икки жил давамида Ташкәнтики «ГЛИЭР» лицей-академиясидә,андин  Үрүмчидики Сәнъәт институтида тәһсил көрүп, миллий нахша-саз, уссуллиримизниң қир-сирлирини өзләштүрүп кәлгән еди. Шу түләкләрниң талант-маһаритидин қайил болған Яркәнт шәһиридики «Ирадә» дехан егилигиниң рәһбәрлири Дилшат Насиров билән Сүрийәм Һезимова 2009-жили уларниң бешини қошуп, иҗадий коллектив қурған еди. Тәркивидә 22 талант егиси бар «Ирадә» нахша-уссул ансамбли әйнә шундақ бәрпа болған. Дилшат ака билән Сүрийәм һәдә та бүгүнки күнгичә мәзкүр коллективниң айлиқ маашидин башлап барлиқ чиқимини өз зимисигә елип кәлмәктә. — Пәқәт бизниң елимиздила әмәс, бәлки пүткүл дуния ихтисадий боһранни баштин кәчүрүватқан шу бир еғир пәйттә Сүрийәм һәдә билән Дилшат акиниң мундақ тавакәлчиликкә қәдәм ташлиғинини қандақ чүшәндүргән болар едиң? — Әгәр адәм өз елини, хәлқини чин қәлбидин сөйсә, келәчигигә бепәрва қаримиса, әһвал-шараиттин қәтъий нәзәр, уларниң мәнпийитидики һәр қандақ ишқа дадил қәдәм ташлайду. Мән Дилшат ака билән Сүрийәм һәдини әйнә шундақ вәтәнпәрвәр, милләтпәрвәр инсанлардин дәп һесаплаймән. Ейтмақчи, сени қизиқтурған бу соални мән өз вақтида уларғиму қойған едим. Шу пәйттә улар маңа: «Полат, йүзлигән жиллиқ тарихқа егә миллий сәнъитимизни сақлап, келәчәк әвлатқа тәғдим қилалмисақ, дана әҗдатлиримиз алдида кәчүргүсиз гунаға қалимизғу. Шуңлашқиму қолимиздин келип турғанда бу ишни қилмасқа вижданимиз яр бәрмәйду» дәп җавап бәргән еди. — Илаһим, хәлқимиздә шундақ инсанларниң сани көпәйсекән. Әнди ансамбльниң бүгүнки паалийитигә қисқичә тохталсаң. — «Ирадә» икки йерим жил ичидә Панфилов, Уйғур, Әмгәкчиқазақ наһийәлиридин ташқири Алмута шәһиридә вә хошна Қирғиз Җумһурийитидә оттуздин ошуқ концерт көрситип, тамашибинлар алқишиға сазавәр болди. 2010-жили март ейида Астанада мәшһур алим Чоқан Вәлихановниң туғулғининиң 175 жиллиғиға беғишлинип өткүзүлгән чоң концертлиқ программиға иштрак қилип, кәспий сәнъәткарлар билән тәнқитчиләрниң иҗабий  баһасиға еришти. — Техи йеқиндила ансамбль әзалириниң Үрүмчигә берип, кәспий маһаритини мукәмәлләштүрүп кәлгәнлигидин хәвиримиз бар... — Һәр қандақ сәнъәткар өзиниң дәриҗисидин, йешидин қәтъий нәзәр, турақлиқ иҗадий издиништә болуши лазим. Әкси әһвалда, униң келәчигидин үмүт күтүш тәс. Шуңлашқиму биз сәнъитимизниң қутлуқ маканиға берип, коллективимизни тәҗрибидин өткүзүп келишини тоғра көрдуқ. Бу җәһәттин Үрүмчидики «Сәнъәт юрти» мәркизигә җәмләнгән Бәхтияр Абдувайит рәһбәрлигидики барлиқ сәнъәткарларға чәксиз  миннәтдарлиғимизни билдүргимиз келиду. Бизниң яш талантлиримиз Ризвангүл Иврайим, Шеринай Абдурешит, Мәрһаба Сидиқ, Иврайимҗан Турсун қатарлиқ уссул маһирлиридин, Аблажан Абдукерим, Әкрәм Өмәр охшаш чевәр сазәндиләрдин тәлим алди. Шундақла хәлқимизниң сөйүмлүк сәнъәткарлири Ташмәһәммәт Турсун билән Маһмут Һосман Или, Қумул, Турпан нахшилирини һармай-талмай үгәтти. Бу җәһәттин Әсқәр Рәқип, Гүлбаһар Реһим кәби сәнъәтчилиримиз мәслиһәт, йол-йоруқлирини айимиди. Буниңдин ташқири ансамблимиз әзалириниң иҗадий өсүшигә җумһурийәтлик Уйғур театриниң пешқәдәм  сәнъәткарлири Азат Бурһанов билән Нияз Турсуновниң, шундақла талантлиқ композитор, мәрһум Әбәйдуллам Сетәковниң көп күч  чиқарғанлиғини алаһидә тәкитләп өтүш орунлуқ болса керәк, дәп ойлаймән. Ейтмақчи,  коллективимизниң кийим-кечәклири мәхсус буйрутма билән Үрүмчидә тикилди. Мошу йәрдә мәзкүр сәпиримизгә мунасивәтлик барлиқ чиқимни өз һөддисигә алған Дилшат ака билән Сүрийәм һәдигә йәнә бир қетим миннәтдарлиқ билдүргүм келиду. — Гәплириңгә қариғанда, «Ирадә» бу қетим чоң тәйярлиқтин өтүпту. Демәк, концертниң утуқлуқ өтүшидә шәк-шүбһә йоқ екәндә? — Мәнму шундақ ойлаймән. Һәқиқәтәнму бу қетим хәлқимиздин чиққан әң маһир сәнъәткарларниң синиғидин өткән яш талантлиримиз сәһнигә чиқмақчи. Тамашибинлар уларниң иҗрасида  хәлиқ нахшилири билән муқамларни, һәр хил уссулларни тамашә қилалайду. Шуңлашқиму барлиқ сәнъәт сөйәр аммини концертимизға ишәшлик тәклип қилалаймиз. Сөһбәтләшкән Ершат ӘСМӘТОВ.