- Спорт
- 10 Сәуір, 2014
Әлликтин алқиғанлар күч синашти
Әмгәкчиқазақ наһийәси Космос йезисиниң Мәдәнийәт өйидә волейбол бойичә өткән бу турнирниң орни бөләк. Турнир «Адал» АИЧК» АҖниң баш энергетиги Һенипидин Нурдиновниң 50 жиллиқ тәвәллудиға беғишлинип, униңға наһийәниң йеши 50тин алқиған спорт ишқивазлиридин тәркип тапқан командилар қатнашти.Турнирниң ечилиш тәнтәнисидә сөзгә чиққан наһийә һакиминиң орунбасари Бекет Ахметов Һенипидин Һаким оғлини йерим әсирлик тәвәллуди билән сәмимий тәбрикләп, спортни тәрәққий әткүзүшкә көп көңүл бөлүнүватқан бүгүнки таңда бу хилдики чарә-тәдбирләрниң яш әвлат арисида сағлам һаят тәризини тәрғип қилишта муһим әһмийәткә егә екәнлигини алаһидә тәкитлиди.
Турнирға наһийәлик һакимийәтниң, Ават, Ақши, Байтерек, Ишиктә, Йеңишәр, Қазақстан, Түргүн вә Челәк йеза округлириниң командилири қатнашти.
«Йеңишәр» җәмийәтлик бирләшмисиниң рәиси Реһимҗан Ибдиминов, Йеңишәр йезисиниң жигитбеши Қурванҗан Азнибақиев, йезидики Уйғур этномәдәнийәт мәркизи шөбисиниң рәиси Сарихан Имамзарова вә жут активисти Мервангүл Худайқулованиң уюштуруши билән йеза турғунлири вә Нурдиновлар аилиси дәстихан йейип, меһманларни һөрмәт билән күтүвалди.
Кәскин күрәш шараитида өткән мусабиқида Түргүн командиси— биринчи, Челәк командиси — иккинчи, наһийә һакимийитиниң командиси үчинчи орунға еришти.
Йеши 50тин алқиған шәхсләр, җүмлидин наһийә һакиминиң орунбасари Бекет Ахметов, Ават йеза округиниң һакими Ерғали Байбөриев, Йеңишәр йеза округиниң һакими Асыл Байтулақов, Челәктики кәспий-техникилиқ колледж мудириниң орунбасари Һезимжан Турғанов, А.Саттаров намидики мәктәп мудириниң орунбасари Сағынбек Баққожа, врач Исмайил Абдуллаев вә башқилар өз маһарәтлири билән көзгә чүшүп, яшларға үлгә болди.
Рашидәм РӘҺМАНОВА.
Әмгәкчиқазақ наһийәси.
273 рет
көрсетілді0
пікір