• Йеңилиқлар
• 10 Сәуір, 2014

Қазақстан өз валютиси билән қалиду

Евразия ихтисадий иттипақи (ЕАИИ) — сәясий әмәс, бәлки ихтисадий бирләшмә. Бийил май ейида үч дөләт рәһбири имзалайдиған ЕАИИни қуруш тоғрилиқ шәртнаминиң асасий маһийити әйнә шундақ. Бу тоғрилиқ Премьер-Министрниң биринчи орунбасари Бақытжан Сағынтаев Қазақстан Җумһурийити Президенти йенидики Мәркизий коммуникацияләр хизмитидә болуп өткән мәтбуат конференциясидә билдүрди.  Йеза егилиги, ихтисадий тәрәққият, индустрия вә йеңи технологияләр министрликлириниң рәһбәрлири қатнашқан коллективлиқ мәтбуат конференциясидә қоюлған соалларниң бираз қисмиғила җавап елиш мүмкин болди. —            Евразия ихтисадий иттипақиниң қурулуши СССРға қайтип келишни билдүрмәйду, — деди Бақытжан Сағынтаев мәтбуат конференциясини ечип. — ЕАИИ тоғрилиқ шәртнамә лайиһисидә стратегиялик муһим қарарларни қобул қилиштики консенсусниң ениқ механизми әкис етип, суверен тәңлик, тәрәпләрниң тәңһоқуқлуғи вә уларниң миллий мәнпийәтлирини һесапқа елиш принциплири тәминләнгән. У шундақла Бажхана иттипақи вә андин кейин Евразия ихтисадий иттипақи шәкиллиридики ихтисадий бирләшминиң бирқатар сәвәпләргә бенаән, биринчи новәттә, Қазақстан үчүн пайдилиқ екәнлигини атап көрсәтти. Биринчидин, биздә, чоң территория болсиму, аһали саниниң азлиғидин, 180 миллион адәм бар чоң базарға егә болимиз. Иккинчидин, биз очуқ деңизға уттур чиқиш йолиға егә болмиғанлиқтин, хошнилардин бөлүнмәй, бәлки улар билән һәмкарлишишимиз керәк. Бақытжан Сағынтаев өзиниң сөзлирини рәқәмләр билән тәстиқлиди. Мәсилән, Бажхана иттипақиниң қурулуши билән Қазақстанниң мәһсулатни қайта ишләш санаитигә кәлтүрүлүватқан чәт әл инвестициясиниң көләми икки һәссә дегидәк өсти, йәни у 2009-жили 1,8 миллиард доллар болса, 2012-жили 3,4 миллиард долларни тәшкил қилди. Буниңда уттур чәт әл инвестицияниң көләми 34 пайиз өсүп, 28 миллиард долларға йәтти.  Униң сөзигә қариғанда, нәқ Бажхана иттипақи даирисидә чоң базарниң вуҗутқа кәлтүрүлүши билән көплигән йетәкчи ширкәтләр җумһурийитимиздә өз карханилирини селиш хаһишини билдүрди. Униң мәлуматлириға қариғанда, Бажхана Иттипақи қурулғандин кейин Қазақстанда транспорт васитилирини, қара металлдин, пластмассидин, резинидин, қәғәздин ишләнгән тәйяр мәһсулат, мәиший техника ишләпчиқиришта иҗабий тенденцияләр байқалмақта. Журналистларни гоя ЕАИИ даирисидә бирпүтүн валютиниң вуҗутқа кәлтүрүлүши тоғрилиқ сөзләргә мунасивәтлик мәсилә қизиқтурди. — Мундақ миш-мишларниң нәдин чиқидиғанлиғини билмәймән. Қазақстан өз валютиси — тәңгә билән қалиду, — дәп билдүрди Бақытжан Сағынтаев вә Евразия ихтисадий иттипақи даирисидә бирпүтүн валюта тоғрилиқ мәсилиниң тамамән муһакимә қилинмиғанлиғини һәм шәртнамә лайиһисидиму униң көздә тутулмиғанлиғини қошумчә қилди.