• Дидар ғенимәт
  • 17 Сәуір, 2014

Милләтниң алаһидилиги — миллийликтә

Өткән һәптидә Қ.Ғоҗамияров намидики җумһурийәтлик дөләт Уйғур музыкилиқ комедия театрида Өзбәкстан Бәдиий академиясиниң академиги, Россия Бәдиий академиясиниң Пәхрий академиги, Өзбәкстан Җумһурийитиниң хәлиқ рәссами, профессор Леким Ибрагимов Алмута шәһиридики уйғур мәктәплиридә тәһсил көрүватқан қабилийәтлик оқуғучилар билән учрашти. «DUNІYA ART» галереяси билән «Идрәк-2050» җәмийәтлик фонди тәрипидин уюштурулған мәзкүр учришиш җәриянида талантлиқ мойқәләм саһиби өзиниң иҗадий паалийити һәққидә сөзләп бәрди. Рәссам уйғур мәктәплириниң китапханисиға өзиниң «Өз периштәңни таллавал» китавини соға қилди. Шу күни Леким Ибрагимов бир топ уйғур зиялилири биләнму учрашти. Уни киришмә сөз билән ачқан «DUNІYA ART» галереясиниң мудири, мәдәнийәтшунаслиқ пәнлириниң намзити Һакимҗан Гүлиев көпчиликни атақлиқ мой қәләм саһиби билән тонуштуруп, униң бай иҗадий мирасини вә уйғур тәсвирий сәнъитиниң тәрәққиятиға қошқан һәссисини атап көрсәтти. Андин учришиш иштракчилириниң илтимасиға бенаән, сөз новити Леким Ибрагимовқа берилди. У өзиниң иҗадий паалийити һәм буниңдин бирнәччә жил илгири Чехияниң пайтәхти  — Прага  шәһиридә вә өткән жили Москваниң мәшһур Қизил Мәйданида уюштурулған көргәзмиси тоғрилиқ сөзләп бәрди. Рәссамниң тәкитлишичә, «Миң бир периштә вә бир рәсим» дәп аталған мәзкүр әсәриниң узунлуғи — 66 метр, егизлиги — 8 метр, көләми 582 квадрат метрни тәшкил қилиду. Әсәрни қураштуруп турған төмүр конструкцияниң салмиғи 22 тонна. Уни ясаш үчүн үч тонна бояқ сәрип қилинған. Мундақ чоң рәсимни жиғиш үчүн жигирмигә йеқин ишчи үч күн ишлигән. Рәссамниң ушбу әсәридә үзи ай тәхлиттики қедимий худалар, гөзәлләр, атлар, һәрхил қушлар, периштәләр тәсвирләнгән. Рәсимниң һәрбир парчисида периштә болуп, уларни рәссам бир-биригә охшатмай һәрхил тәсвирлигән. Дуния тәсвирий сәнъәт тарихида биринчи қетим ясалған бу чоң рәсим вә униң муәллипи Леким Ибрагимов Гиннессниң Рекордлар китавиға киргән. —            Көп жил мабайнида надир тәсвирий сәнъәт усулини тепиш йолида тинмай издинип, нәтиҗидә уйғурларниң будда дәвридики там тәсвирлиригә асасланған йеңи рәсим селиш техникисини бәрпа қилдим, — деди рәссам. — Қедимий уйғур тәсвирий сәнъитиниң әнъәнисини, йеңи заманивий сүпәттә қайтидин тиклидим десәм, мубалиғә болмас. Ейтиш керәкки, һазир биз, рәссамлар, асасән Репин мәктивиниң үлгиси бойичә ишләватимиз. Әнди бүгүнки күндә бу үлгә билән дуния сәнъәт алимидә иҗадийәт әһлини қайил қилиш һәм тонулуш тәс. Пәқәт өзәңниң миллий услуб-алаһидилигиң билән дуниявий сәнъәт алимигә киришиң мүмкин. Умумән, милләтниң алаһидилиги — миллийлик ичидә болуши керәк. Шуниңдин кейин сөз новитини алған җумһурийәтлик Уйғур этномәдәнийәт мәркизиниң рәиси Шаһимәрдан Нурумов уйғур заманивий тәсвирий сәнъитиниң җапалиқ йолини таллавалған вә уйғур хәлқини пүтүн дунияға тонутуп, қедимий сәнъитимизниң әнъәнилириниң һечқачан өлмәйдиғанлиғиға кепиллик қиливатқан атақлиқ рәссам Леким Ибрагимов билән уйғур хәлқи һәқлиқ йосунда пәхирлинидиғанлиғини қәйт қилди. Шаһимәрдан Үсәйин оғли сөзиниң ахирида мой қәләм саһибиға миннәтдарлиғини билдүрүп, ҖУЭМниң Пәхрий ярлиғини тапшурди. Өз новитидә, Леким Ибрагимов җумһурийәтлик Уйғур этномәдәнийәт мәркизигә өзиниң «Өз периштәңни таллавал» китавини соға қилди. Учришиш җәриянида Қазақстан Җумһурийитиниң хизмәт көрсәткән әрбаплири, көрнәклик рәссамлар — Әхмәтҗан Әһәт, Һашимҗан Қурбанов, «Идрәк-2050» җәмийәтлик фондиниң президенти Абдуләзиз Абдуллаев, язғучи вә драматург Әхмәтҗан Һашири, «Уйғур авази» гезитиниң баш муһәррири Ершат Әсмәтов сөз елип, қедимий уйғур тәсвирий сәнъитиниң әнъәнисини йеңи заманивий сүпәттә қайтидин тикләп, тәсвирий сәнъитимизни дунияға тонутқан атақлиқ рәссамға өзлириниң иллиқ ләвзини изһар қилғач, көрнәклик мой қәләм саһибиниң иҗадийәт йолида техиму йүксәк чоққиларни егиләштә униңға өз периштәлириниң мәдәт болушини тилиди. Ахирида мошундақ ғенимәт дәмләрни яритип бәргәнлиги үчүн Леким Ибрагимов ушбу учришишниң уюштурғучилар билән униң қатнашқучилириға өзиниң сәмимий миннәтдарлиғини билдүрди. Мундақ учришиш Алмута шәһиридики А.Розибақиев намидики 153-мәктәп-гимназиядиму болуп өтти. Учришиш җәриянида рәссам оқуғучиларни қизиқтурған соалларға җавап берип, улар билән хатирә сүрәткә чүшти. Мәктәп мудири Шавкәт Өмәров рәссамға оқуғучилар тәрипидин қапақтин ясалған саз әсвавини соға қилди.

Шәмшидин АЮПОВ.

228 рет

көрсетілді

0

пікір
Алдыңғы мақала Бар болуңлар, синипдашлар
Келесі мақала Бар болуңлар, әзизләр!

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы