• Йеңилиқлар
  • 17 Сәуір, 2014

Мәвсүм утуқлуқ аяқлашти

Мустәқил Қазақстанда истиқамәт қилидиған уйғурлар үчүн  Қ.Ғоҗамияров намидики җумһурийәтлик дөләт Уйғур музыкилиқ комедия театри сәнъитимизниң алтун бөшүги һесаплиниду. Чүнки мәзкүр театр өзиниң дәсләпки қәдимидин та бүгүнки күнгичә хәлқимизниң тарихини, мәдәнийитини, әдәбиятини, тилини, урпи-адәт, әньәнилирини тәрғип қилип, бүйүк әҗдатлиримиз мирасини әвлатларға йәткүзүш йолида җанпидалиқ билән хизмәт қилип, дәвир билән һәмнәпәс риваҗлинип кәлмәктә. Өткән жили күздә Җ.Асимов вә А.Садировниң «Анархан» драмиси билән сәһнә пәрдисини 80-қетим ачқан театримизниң иҗадий коллективи новәттики мәвсүмини утуқлуқ йәкүнлиди дейишкә толуқ асас бар. Бу театр коллективиниңла әмәс, бәлки 80-мәвсүмдә абонемент системиси бойичә Он бир йөнилиштә репертуаримиздики 14 спектакльни, «Күлкә кечилиги» вә  «Нава» ансамблиниң йеңи концертлиқ программилирини, абонементтин сирт театрниң өз кирими һесавиға қоюлған «Йеңи жиллиқ Гүлхан» вә «Ана билән һаят гөзәл» мәйрәмлик программилирини көрүшкә муйәссәр болған, театримизниң тәрәққиятиға бепәрва қаримайдиған тамашибинлиримизниң сәмимий пикри. Дайим тамашибин хизмитидики биз үчүн уларниң пикри, бәргән баһаси һәммидин муһим, әлвәттә. Шуңлашқа һәр қоюлумдин, концерт программилиридин кейин уларниң пикирлирини билишкә тириштуқ. Бу мәвсүмдә, биринчидин, театр мәмурийитини қанаәтләндүргән һәм хошал қилған нәрсә, театримиз билән тамашибинлиримиз мунасивитиниң техиму җанланғанлиғи. Шуниң нәтиҗисидә абонементлиримиз толуқ сетилип, һәптиниң үч күнидә, һәтта һава райиниң әң қолайсиз күнлириму, бизгә садиқ тамашибинлиримиз зални 70 — 80 пайиз толтуруп, өзлиригә роһий озуқ елип қайтти.  Бу ишта бизгә мәдәнийәт мәркәзлири, жигитбашлири, ханим-қизлар кеңәшлири, уйғур тилида билим беридиған мәктәпләр мәмурийәтлири йеқиндин ярдәм бәрди. Пурсәттин пайдилинип, сәнъитимиз җанкөйәрлиригә вә барлиқ тамашибин достлиримизға чәксиз миннәтдарлиғимизни билдүримиз. «Бирлишип көтәргән жүк йеник» демәкчи, кәлгүсидә һәм улар билән һәмкарлиқта йәниму яхши ишларни елип баридиғанлиғимизға ишәнчимиз камил. Театримизниң бүгүнки репертуаридин миллий драматургиямиз нәмунилири билән бир қатарда қазақ, өзбәк, татар хәлиқлири вә җаһан драматургиясигә мәнсүп  һәрхил жанрдики әң яхши әсәрләр орун алған.  Тәвәллудлуқ мәвсүмдә репертуаримиздин алаһидә йеңилиқларни күткән тамашибинлиримизниң хаһишлири орунлинип, бу мәвсүмдә Й.Мухлисовниң «Қош юлтуз», А.Самсақовниң «Баянчур» тарихий драмилириниң, Ә.Һашириниң «Ялғуз ялпуз» заманивий драмисиниң, өзбәк драматурги И.Зайирниң «Қәриз» комедиясиниң премьерилири көрситилди. Кәспий драматурглиримизниң йоқниң орнида екәнлигигә қаримай, бизниң тамашибинларниң сәһнимиздә тәрҗимә әсәрләргә қариғанда миллий драма әсәрлирини көпирәк көрүшни халайдиғанлиғини нәзәргә тутсақ, бу жилқи мәвсүмдә көрситилгән үч премьера, мәзкүр спектакльлар һәққидә гезит бетидә йоруқ көргән мақалиларда ейтилған бәзи тәнқидий пикирләрдин қәтъий нәзәр, һәм миллий драматургияниң, һәм театримизниң чоң йеңилиғи болди. Тарихий әсәрниң бебаһа қиммити келәчәк әвлатниң мәнавият дуниясини бейитип, әҗдатлар роһида тәрбийиләш екән, ХІ әсирдә гүлләп риваҗланған Караханийлар дөлитидә яшап, дунияға мәшһур «Қутадғу билик» билән «Дивану луғәт-ит түрк» әсәрлирини иҗат қилип, тарихта жүтмәс из қалдурған улуқ мутәпәккүрләр Йүсүп Хас Һаҗип вә Махмут Қәшқәрий образлирини сәһнимиздә тирилдүргән «Қош юлтуз», VІІІ әсирниң оттурилирида Уйғур қағанатиниң тәхтигә олтирип, «тоққуз оғуз» қәбилилирини бириктүрүш арқилиқ қағанатниң пүтүнлүгини сақлап қелишқа һәрикәт қилған Баянчур һәққидики «Баянчур» тарихий драмилириниң тәрбийәвий әһмийити наһайити зор. Асасий идеяси тәбиәтни қоғдаш охшаш бүгүнки күнниң әң актуал мәсилилириниң биригә қаритилған вә томури жирақ әсирләргә улишидиған қазақ-уйғур достлуғини сәһнидә намайиш қилидиған «Ялғуз ялпуз» драмисиму бу жанрға қошулған төһпә болуп һесаплиниду. Театримиздики «Нава» фольклор, «Сада» эстрада, «Рухсарә» уссул ансамбльлириниң концертлиқ программилири репертуаримизни бейитип, тамашибинларға арамбәхш дәмләрни һәдийә қилип, роһий тәшналиғиға услуқ болуп келиватиду. Болупму, хәлқимизниң муң-зарини ипадиләп, әсирләр садасини яңратқан «Он икки муқамдәк» әҗайип музыка байлиғиниң, жүрәкләрни жүрәкләргә улайдиған хәлиқ нахшилириниң бүгүнгичә сақлинип келиватқанлиғида Ниязҗан Турсуновниң рәһбәрлигидики «Нава» ансамблиниң роли наһайити чоң. Миллийлик һиди билән өзигә мәһлия қиливалидиған мәзкүр ансамбльниң концертлирини тамашибинлиримизниң зор қизиқиш билән тамашә қилидиғанлиғиму шуниңдин болса керәк. Мәзкүр ансамбль коллективи бу мәвсүмдә «Рухсарә» уссул ансамбли билән бирликтә «Өзһал» муқами вә нахша-уссуллардин түзүлгән йеңи концертлиқ программисини һавалә қилип, тамашибинлар алқишиға бөләнди. Чоң концертлиқ программиси билән 80-мәвсүмни япқан  «Нава» ансамбли әнди Панфилов, Уйғур, Челәк наһийәлиригә гастрольлуқ сәпәргә атлиниш алдида туриду.

         Савутҗан Сонуров,

 Қ.Ғоҗамияров намидики җумһурийәтлик дөләт Уйғур музыкилиқ комедия театриниң мудири.

144 рет

көрсетілді

0

пікір
Алдыңғы мақала Рәссам тәвәллудиға беғишланди
Келесі мақала Қазақстан Җумһурийити Президентиниң Пәрмани

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

14 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы