• Йеңилиқлар
• 17 Сәуір, 2014

Бирликкә хизмәт қилмақта

Қазақстан хәлқи Ассамблеяси даирисидә паалийәт жүргүзүп келиватқан Панфилов наһийәлик Уйғур этномәдәнийәт мәркизи тәвә хәлқи арисидики достлуқ билән бирликни мустәһкәмләшкә һәрқачан алаһидә көңүл бөлүп кәлмәктә. Тәшкил қилинған дәсләпки күнләрдин тартипла бу мәсилини өз паалийитиниң асаси дәп қарап, тәләпчанлиқ һәм издиниш билән иш елип бериватиду. Өткән жигирмә жилдин ошуқ вақит мабайнида бу җәһәттин мол тәҗрибә топланғанлиғини тәкитлигән орунлуқ. Наһийәдә әмәлгә ашурулуватқан һәммә аммивий-мәдәний чарә-тәдбирләргә йеқиндин иштрак қилиш билән бирқатарда, йеңи ғайә вә тәшәббуслар билән мәйданға чиқиватиду. Җумһурийитимиз һаятидики муһим сәнәләр билән биллә жуттин йетишип чиққан намайәндиләрниң, миллитидин қәтъий нәзәр, тәвәллудлирини нишанлаш, коча мәйрәмлирини өткүзүш вә башқиму тәрбийәвий әһмийәткә егә ишлардин чәттә қалмай, тегишлик һәссисини қошуватиду. Мәркәз тәвәдила әмәс, вилайәт, һәтта җумһурийәт даирисидики чарә-тәдбирләргә қатнишип, миллитимизниң өзигә хас мәдәнийити билән, урпи-адәт, рәсим-қаидилирини намайиш қилмақта. Бүгүнки күндә наһийәдә Славян, Тунган этномәдәнийәт мәркәзлири билән «Қазақ тили» җәмийәтлик бирләшмиси ишләватиду. Улар билән болған мунасивитимиз қоюқ болуп, зич алақида ишләватимиз. Өзара чүшиниш вә һөрмәт қелиплашқан вә жилдин-жилға мустәһкәмлиниватқанлиғини мәмнунийәт һәм пәхирлиниш билән тилға алимиз. Мәркәз тәрипидин жүргүзүлүватқан ишлар көп қирлиқ вә хәлиқләр достлуғини сақлап, буниңдин кейин техиму мустәһкәмләшкә қаритилған. Уларниң һәммисини ейтип өтүш мүмкин әмәс, әлвәттә. Шуниңдиму Мустәқиллик, Конституция күнлири, Норуз, Тиллар мәйрими вә башқиму шуларға охшаш хатирилик сәнәләрни өткүзүшкә паал қатнишип келиватқанлиғимизни атап өткән орунлуқ. Һазирқи күндә мәркәз бенасиниң қурулуш ишлири қизғин кетип бариду. Әгәр у пайдилинишқа берилсә, паалийәт даиримизниң техиму кәңийип, җанлинидиғанлиғида шәк йоқ. ҚХАниң новәттики сессияси һарписида шуни ейтиш керәкки, җай-җайлардики мәдәнийәт мәркәзлири қазақстанлиқларниң өзара достлуғи билән бирлигиниң мустәһкәмлиниши үчүн хизмәт қиливеридиған болиду.

Дилшат НАСИРОВ, Панфилов наһийәлик Уйғур этномәдәнийәт мәркизиниң рәиси.

Панфилов наһийәси.