• Йеңилиқлар
• 13 Сәуір, 2012

Утуқ-муваппәқийәт вә әмәлгә ашқан үмүтләр шәһири

Мәмликитимизниң баш шәһири — Астана келәчәктә қандақ болуши керәк? Бу мәсилә Дөләт рәһбири Нурсултан Назарбаевниң рәислигидә өткән кеңәшмидә тәпсилий муһакимә қилинди. Пайтәхтни көчириш тоғрилиқ қарар қобул қилинғандин кейин өткән жилларда Астана өсүп-кәңийишкә башлиди. Шуңлашқа Президентниң пайтәхтни техиму тәрәққий әткүзүш бойичә кеңәшмини ачқанда, Астанани утуқ-муваппәқийәт вә әмәлгә ешиватқан үмүтләр шәһири дәп атишиму тәсадипи әмәс. Буниңда у өз сөзлирини дуниядики абройлуқ нәширниң хуласилири билән мустәһкәмлиди. Нурсултан Назарбаев Natіonal geographіc журналиниң мәмликитимиз пайтәхтини утуқ издәш үчүн мәптункар шәһәр дәп атиғанлиғини тәкитлиди. Бу йәрдә дунияниң 77 мәмликитиниң гражданлири яшаватиду. Сөзсизки, Астананиң мунчилик сүръәтлик тәрәққий етиши мәбләғ билән шәртләнгән. Мәсилән, Дөләт рәһбириниң тәкитлишичә, пәқәт өткән жилила пайтәхт бюджети 353 миллиард тәңгини тәшкил қилди, бу тәхминән 2,4 миллиард АҚШ доллиридур. —   Аһалиниң җан бешиға чеқип һесаплиғанда, бу Прагиниң дәриҗисигә баравәр. Бюджет миқдари бойичә Астана Киевтин 1,5, Минсктин 2,5 һәссә алда келиватиду. Ишимизниң нәтиҗиси әйнә шундақ. Шәһәр болса, бари-йоқи 12 яшта, — дәп тәкитлиди Дөләт рәһбири. Кеңәшмә башланғичә Дөләт рәһбири пайтәхттә қәд көтиридиған йеңи объектларниң макетлирини көздин кәчүрди. Президент кеңәшмә өткүзүлгән Мустәқиллик сарийиниң кәң фойесиға қоюлған стендларни қарап чиқип, пайтәхт һакими Иманғали Тасмағамбетовниң кәлгүсидә жүргүзүлидиған қурулуш ишлири тоғрилиқ әхбаритини тиңшиди. Мәсилән, Шәһәр күнигә қәдәр Астанада Мәркизий Азиядики әң чоң «Һәзрәт Султан» мечити ишигини ачиду. Бийил йеңи опера вә балет театриниң қурулушини тамамлаш планлиниватиду. Униңдин ташқири, Астананиң мәркизидики кочиларни бошитиш үчүн Кичик транспорт чәмбири селиниду, Ботаника беғи, йеңи дәм елиш зонилири, шипаханилар вә турушлуқ комплекслар пәйда болиду. Президентниң чеһрисидин униң қанаәт һасил қилғанлиғини байқавелиш тәс әмәс еди. Амма у җиддий конструктив пикирләр билән бир қатар тәклипләрни ейтти. Биринчи новәттә, Дөләт рәһбири пайтәхт аэропортиниң инфраструктурисини яхшилашни тапшурди. —   Мән аэропорттин башлаш керәклиги тоғрилиқ бир нәччә қетим ейтқан едим, бу пайтәхт дәрвазиси. Униң территориясидә автомашина турақлири вә қошумчә йоллар йетишмәйду, рейслар сани болса көпийиватиду, — деди Нурсултан Назарбаев. Иккинчидин, Президент Астананиң ташқи қияпитигә диққәт ағдурди. —   Шунчилик көрүмсиз өйләр селинишқа башлиған! Мән Ақордидин бульварлар тәрәптин шәһәргә чиққинимда, оң тәрәптә һәммә нәрсә яхшидәк, бирақ қарши тәрәпкә диққәт ағдурғинимда әпсуслинимән, — деди у. Дөләт рәһбири Астанада пайтәхтниң тәкрарланмас колоритини вуҗутқа кәлтүрүш үчүн надир беналарни селишни тәклип қилди. Униңдин ташқири, мемарларға мураҗиәт қилип, пайтәхт әтрапини назарәт қилишни вә рухсәтсиз өй селишқа йол қоймаслиқни, шундақла шәһәргә киридиған җайда көркәм беналарни селишни тапшурди. Дөләт рәһбири шундақла мәмликәт мәблиғигә селинған спорт иншаәтлиридин астаналиқларниң, биринчи новәттә, яшларниң пайдилиниш мүмкинчилигиниң йоқ екәнлигигә диққәт ағдурди. Шуниң билән бир вақитта у шәһәрдә букмекерлиқ идариләрниң, оюн-заллириниң көпийип, һазирниң өзидила уларниң саниниң 500дин ешип кәткинигә ечинишлиқ билдүрди. —   Яшлар спорт билән шуғуллинишниң орниға вақтини мошу мәһкимиләрдә бошқа өткүзүватиду. Бу болса яшларни җинайәтчиликкә тартиш үчүн зәмин яратмақта, — дәп тәкитлиди Нурсултан Назарбаев. Дөләт рәһбириниң тәкитлишичә, Қазақстан пайтәхти пәқәт қазақстанлиқлар үчүнла әмәс, бәлки чәт әллик гражданлар, туристлар, тиҗарәтчиләр үчүнму мәптункар шәһәр болуши керәк. Президентниң пикричә, пайтәхтниң турақлиқ тәрәққий етиши, униң келәчиги, униң гөзәллиги — пәқәт бирла шәһәрлик һакимийәтниң, Һөкүмәтниң, дөләт органлириниң, миллий холдинглар билән ширкәтләрниңла әмәс, бәлки һәр бир қазақстанлиқниң вәзиписидур. —   Бу мәсилидә һеч ким чәттә турмаслиғи керәк. Бу дөләт вәзиписи, — дәп хуласилиди Нурсултан Назарбаев.