• Вақиә һарписидики сөһбәт
• 01 Мамыр, 2014

«Баһар наваси» баһар кәйпиятини беғишлайду

«Пәрваз» яш иҗрачилар бирләшмисиниң паалийәт елип бериватқиниға анчә көп вақит болмисиму, көплигән нәмунилик ишларниң башламчиси болуп кәлмәктә. Мәзкүр бирләшминиң уюштуруши билән өткән жили яш иҗрачиларниң «Баһар наваси — 2013» намлиқ чоң концерти наһайити утуқлуқ өтти. У Қазақстанниң «Хабар», «Ел арна», «Қазақ Тв» вә башқиму телеканаллирида намайиш қилинди. Бийил 11-май күни «Пәрваз» яш иҗрачилар бирләшмисиниң уюштурушида новәттики «Баһар наваси — 2014» концерти өтмәкчи. Шу мунасивәт билән бирләшмә рәисиниң орунбасари Райим Һәмраев билән сөһбәтләшкән едуқ. — Райим, сөһбитимизни силәр әмәлгә ашурған ишлардин башлисақ. — «Пәрваз» яш иҗрачилар бирләшмиси қурулған пәйтидә яш уйғур сәнъәткарлириниң кәспий дәриҗисини көтиришни мәхсәт қилған едуқ. Шу йөнилиштә елип барған ишлиримиз яхши нәтиҗә бериватиду. Кәлсә-кәлмәс концертларниң сани қисқарди. Иҗрачилиримизму кәспий маһаритини ашурушқа тиришмақта. Өткән жили биринчи қетим «Баһар наваси» концерти өтти. Мәлум дәриҗидә өзимизниң «сүзгисидин» өткүзүп, талантлиқ сәнъәткарлиримизни чоң сәһинигә елип чиқтуқ. Шундақла «Дияр» топиниң йеңи тәркивигә он жил толушиға мунасивәтлик мәзкүр топниң йәккә концертини уюштурдуқ. Тәкитләш керәкки, концерт җанлиқ авазда өтти. Бизниң бирләшмигә әза бирнәччә иҗрачиниң бирқатар нахшилириға видеоклиплар чүширилди. Әнди йеқинда болса, «Дияр» топиниң йенида йеңи студия ишқа қошулди. Демәк, әнди иҗрачилар үчүн нахшини кәспий дәриҗидә сүпәтлик йезиш мүмкинчилиги яритилди. —     Бу қетимқи концертқа тәйярлиғиңлар қандақ? —     Растини ейтиш керәкки, «Пәрвазни» тәшкил қилғинимизда ишимизға гуман билән қариғанларму болған. Бирақ утуқлиримизни көргәндә уларниң бизгә нисбәтән көзқариши өзгәрди.  Шундақла,  «Баһар наваси — 2013» концертидин кейинму бизниң бирләшмигә әза болғучиларниң сани көпәйди. Бу қетимқи концертни өткүзүштики асасий мәхситимиз — яш талантлиқ иҗричиларни хәлиққә тонутуш. Растини ейтқанда, яшлар өз һүнәрлирини пәқәт той-төкүнләрдила көрситип жүридиғу. Бу йәрдә иҗадий, кәспий җәһәттин өсүш тоғрилиқ гәп қилмисақму болиду. Раст, уларниң һәммисини сәһнигә елип чиқиш мүмкин әмәс. Шуңлашқа биз алдин-ала таллаш җәриянини әмәлгә ашурдуқ. Новәттики концертта жигирмә тоққуз номер болиду дәп ойлаймиз. Тәкитләш лазимки, улар жанр җәһәттин һәрхил. Концертта уйғур миллий музыкиси, йәни муқамлар, уссуллуқ, заманивий, классикилик, йәни опера нахшилири орунлиниду. Униңдин ташқири һәзил-күлкиниң «меғизини чақидиған» яш талантлиқ балилиримизму бар. Шундақла Қазақстан эстрада юлтузлиридин Мақпал Исабекова, Парвиз Назаров, Кентал охшаш сәнъәткарларниму тәклип қилдуқ.  Бу йәрдә биз яш уйғур иҗрачилириниң Қазақстан эстрада юлтузлири билән мунасивәт орнитишиға, уларниң тәҗрибисини үгинишигә, сәһнә мәдәнийитигә риайә қилишқа, кәспий маһаритини ашурушқа мүмкинчилик яритиш көздә тутулған. — Концертни Җумһурийәт сарийида өткүзүшкә бәл бағлапсиләр... — Шундақ. Өткән, йәни «Баһар наваси — 2013» концертини биз Ө.Жолдасбеков намидики Студентлар сарийида өткүзгәндә тамашибинлиримиз залға патмай қалған. Рәнҗиш гәпләрму көп болди. Шуңлашқа бийил уни Җумһурийәт сарийида өткүзүш қарариға кәлдуқ. Бу йәрдә бизниң тавакәлчиликкә бериватқинимизму сир әмәс. Чүнки Җумһурийәт сарийиниң иҗарә һәққи вә көрситидиған хизмәт баһалири һәдди-һесапсиз қиммәт. Шундиму мухлислиримиз көңлидин чиқиш үчүн мошуниңға бәл бағлидуқ. Өз новитидә тамашибинлиримизниңму бизни қоллап-қувәтләйдиғанлиғиға ишәнчимиз камил. Билетларни җай-җайлардики бизниң вәкиллиримиздин сетивелишқа болиду. Толуқ мәлуматлар «Parvaz.kz» сайтида бар. Пурсәттин пайдинип, барлиқ сәнъәтсөйәр аммини концертқа тәклип қилимән. Йолдаш МОЛОТОВ.