- Һасан-һүсән
- 29 Мамыр, 2014
Гүл билән тикән
Чоңларға соға
Мәсәл/Баһар айлири. Гүл-гияларниң чечәк етип, тәбиәтниң һөснигә һөсүн қошуп турған мәзгилләрниң биридә, ериқниң икки қирғиғида өсүватқан қизилгүл билән янтақ тикән порәк ечип, өзлириниң хуш пуриғини әтрапқа чечип туратти. Һәр икки гүлниң өзигә хас һөсни вә тәббий хусусийити болсиму, бәзидә көзниң йеғини йәйдиған, пәрәңдәк ечилип кәткән қизилгүлләр мәғрурланған һалда, қәддини пүкмәй, әтрапиға қия беқип, башқа гүлләрни көзигә илмиғандәк, «Қайсиң мениң билән тәң келәләйсән?» дегәндәк әлпаз көрситәтти.
Қизилгүлниң көзи йенидики янтақ тикәнгә чүшти:
— Һәй, янтақ, тениңниң һәммисини тикән бесип кәткән һалиңға бақмай, саңа гүл қисишни ким қойди? Гүлүң маңа охшаш чирайлиқ болсиғу, кашки, — дәп махтанди.
— Һәй, чирайлиғим, мәнғу күзниң ахириғичә яшап, язниң ләззитини сүримән. Сән гүлиңгә беқип махтанғиниң билән, сениң өмрүң бир ғерич, — деди Янтақ.
Шу пәйттә уларниң йенидин өтүп кетиватқан қиз билән жигит қизилгүлни көрүп қалиду. Жигит қизилгүлни үзүп елип, қизиға суниду. Янтақ гүлиниңму өзигә хас һөсни болғачқа, жигит униң гүлини үзмәкчи болидую, лекин униң тикинидин қорқуп, бу ойидин ялтийиду.
Қизилгүлниң ғунчилири анисидин айрилғиниға зар жиғлап, һәсрәт чекиду. Аз күн өтүп, ғунчилар порәк ечип, анисиниң орнини алиду. Улар анисиниң гәплирини тәкрарлап, йенидики янтақниң арамини қоймай, униң билән муназиригә чүшүватқанда, гүлләрниң ширнисини жиғип жүргән һәрә қизилгүл билән янтақниң гәплирини аңлап, иккисини яхши-хоп қилип қоюш мәхситидә бир дәм қизилгүлгә, бир дәм янтақ гүлигә қонуп, уларни тозаңлаштуриду. Келәр жили қизилгүлниң ғоллирида өткүр тикәнләр һасил болиду. У һәрқандақ адәмни өзигә мәһлия қиливалсиму, лекин адәмләр тикинидин қорқуп, уни үзәлмәйдиған болуп қалиду.
Әтималим, хәлиқ еғизидики «Адәмниң алди гүл, кәйни тикән» дегән нәқил мошуниңдин қалған болса керәк.
Қасим ИСМАЙИЛОВ,пешқәдәм устаз.
Алмута шәһири.
313 рет
көрсетілді0
пікір