• Спорт
• 05 Маусым, 2014

13 яшлиқ чемпион

Йеқинда шәхсий тиҗарәт ишлириға бағлиқ пат-патла чәт әлләрдә болуп туридиған кона тонушларниң бирини учритип қалдим. Көрүшмигинимизгә бираз жиллар болғанлиқтин, тәбиийки, сөһбитимизму хелә узаққа созулди. Өзара һал-әһвал сораштин башланған сөһбитимиз һәрхил мавзуларда давамлишип, тонушум йеқинда Бирләшкән Әрәп Әмирликлирини зиярәт қилип қайтқанлиғини вә у йәрдә алаһидә бир хәлиқара турнирға дахил болғанлиғини ейтти. Униң сөзичә, мәмликәт пайтәхти Абу-Даби шәһиридә өткән джиу-джитсу бойичә мусабиқиға, йешидин қәтъий нәзәр, салмиғи 40 килограммдин 120 килограммғичә болған спортчилар иштрак қипту. Бай шейхларниң бириниң тәшәббуси вә һамийлиғида уюштурулған турнирниң мукапат фонди көп болдиму яки башқа мәхсәтләр көздә тутулдиму, намәлум, әйтәвир, униңға АҚШ, Бүйүк Британия, Германия, Хитай, Җәнубий Америка әллири, Қазақстан вә бирқатар Мәркизий Азия дөләтлири болуп, әлликкә йеқин мәмликәтниң вәкили қатнишипту. Мошу йәргә кәлгәндә униң алаһидә һаяҗанлиққа бөлиниватқанлиғини байқидим. — Биләмсән, әң хошал болидиған йери, 42 килограмм салмақ дәриҗиси бойичә күч синашқан палванлар арисида уйғур пәрзәнди,13 яшлиқ Әһәт Насиров чемпион аталди, — деди у һаяҗан илкидә вә тиҗарәт ишлириға бағлиқ униң бовиси Илһам билән пат-патла учришип туридиғанлиғини қошумчә қилди. Шуниңдин кейин мениңда Әһәтниң бовиси билән учришиш ойи пәйда болдидә, йәнә шу тонушумниң ярдими арқилиқ Илһамни тепип, сөһбәтләштим. Илһамниң маңа ейтип беришичә, Әһәт униң қизи Шаһидәмниң оғли екән. 2001-жили дунияға кәлгән у Алмутида турғинида, шәһәрдики 5-гимназиядә оқуйду. Кейин ата-аниси билән Бирләшкән Әрәп Әмирликлиригә көчүп кетипту вә шу йәрдики йетәкчи билим дәргаһлириниң бири һесапланған Әл-Марис Интернешнл мәктивигә оқушқа кириду. Мәзкүр мәктәптә оқутуш әрәп вә инглиз тиллирида жүргүзүлгәчкә, зеһни өткүр Әһәт бу тилларни чапсанла өзләштүрүп кетиду. Күнләрниң биридә у рус тилида сөзлишиватқан икки кишигә дуч келип қалиду. Уларниң бири дағстанлиқ Умар Султан оғли Алиев болуп, у Әһәт билим еливатқан мәктәптә күрәш секциясини башқуридекән. (Дағстанниң күрәш мәктивиниң сабиқ СССР даирисидә қанчилик аммибаплиққа егә болғанлиғини яхши билимиз — Ш.М.). Бовисиниң ейтишичә, башта Әһәт муәллим-мәшиқләндүргүчи билән пәқәт рус тилида сөзлишиш үчүнла күрәш секциясигә қатнишип жүрүпту. Бирақ мәшиқләндүргүчиниң шагирт ихтидариниң қандақ дәриҗидә екәнлигини өз вақтида байқап, тәләпни күндин-күнгә күчәйтиши, тәбиийки, Әһәтниң қизиқиш-интилишини пәйдин-пәй ашуруши бара-бара өз мевисини берип, нәтиҗидә өсмүр-палван һәрхил дәриҗидики мусабиқиларда мукапатлиқ орунлардин көрүнүшкә башлайду. Әйнә шундақ турнирларда маһаритини ашурған у өткән жили Дубай шәһиридә өсмүрләр арисида өткүзүлгән дуния чемпионатида үчинчи орунға еришиду. Мошу чемпионатта 12 яшлиқ палванниң челишиш усулиға қайил болған тәшкилий комитет уни  мәхсус мукапат — қиммәт баһалиқ япон кимоноси билән рәғбәтләндүриду. Бийил болса, башта ейтип өткинимиздәк, мәмликәт пайтәхтидә өткән мусабиқида өз салмақ дәриҗисидә алтун медальға еришип, һәммини хошаллиққа бөләйду. Әһәт Насиров Қазақстан пухраси, Бирләшкән Әрәп Әмирликлиридә яшайду. Шуңлашқиму Дубайда вә әрәп әллири арисида өткүзүлгән мусабиқиларда мону мәсилигә һечким диққәт ағдурупму кәтмигән еди. Бирақ өткән жилқи дуния чемпионатида вә бийилқи хәлиқара мусабиқида униң қайси мәмликәткә вакаләтлик қилиши керәклиги тоғрилиқ мәсилә пәйда болиду. Әһәтниң мәшиқләндүргүчиси Умар Алиев униңға Қазақстан намидин қатнишиш тәкливини бериду. Буни җумһурийәт спорт саһасиниң рәһбәрлигиму мақуллайду. Нәтиҗидә Әһәт мукапатланғучилар суписидин орун алғанда, Қазақстан Җумһурийитиниң Дөләт байриғи көтирилип, Гимни яңрайду. Биз у күни Әһәтниң бовиси Илһам иккимиз хелә узақ  сөһбәтләштуқ. Әшу җәриянда Илһам у яки бу нәрсиләрни ениқлавелиш үчүн нәврисигә бирнәччә қетим телефон қилди. Мән униңдин нәврисидин мукапатланғучилар суписиға көтирилгәндә, немини һис қилғанлиғини сорашни илтимас қилдим. Илһам мениң илтимасимни орунлап, янфонниң үни қошуп қойди. Әһәтниң «Спорт кийимимдә «Қазақстан» дегән йезиқ бар. Қазақстанниң Байриғи көтирилди. Наһайити һаяҗанландим», дегән сөзлири очуқ аңланди. Һә, Әһәт техи 13 яшта. Чоң утуқлар, атақ-унванлар техи униң алдида, әлвәттә. Шундақ екән, биз уйғур пәрзәндигә мәртивиси жуқури хәлиқара мусабиқиларға пат-пат иштрак қилип, утуқ қазиниверишини тилигән болар едуқ.  Шөһрәт МӘСИМОВ.