• Дидар ғенимәт
• 12 Маусым, 2014

Бар болуңлар, әзизләр!

Уйғур наһийәлик «Или вадиси» гезитиниң сабиқ мухбири Ғәйрәт Ташваевниң исми чоң вә оттура боғум әвлат вәкиллиригә яхши тонуш. Бүгүнки күндә һаятиниң 70-даванидин ашсиму, көпчилик мәнпийити үчүн жүгрәйдиған адитини ташлимиған Ғәйрәт ака бу қетим сабиқ синипдашлириниң бешини қошуп, Чонҗа йезисидики «Атамекен» кафесида учришиш өткүзди.Мошуниңдин 55 жил муқәддәм 42 нәпәр қиз вә жигит Ават оттура мәктивидин учум болди. Дунияға көз ечипла аниниң ақ сүти вә көз йешидин ләнити урушниң дәһшитини һис қилған улар әр йетип, бәләнт арман вә арзулар билән чоң һаятқа қәдәм ташлиған еди. Затән, улар үчүн әшу дәһшәттин артуқ зулум йоқ еди. Дәстихан үстидә қәдинаслар узақ муңдашти. Ана мәктәпни пүтәргинигә 45 жил толуши мунасивити билән өткүзүлгән учришишта бәкму яйрап, һәммигә бирдәк достлуқ меһрини чачқан Турсун Дәраев, Зина Абдримова, Нәвирдин Давутов, Бүви Асипова вә Гүлварәм Бақиева дуниядин өтүпту. Устазлар билән мошу достлар роһиға қуръан тилавәт қилинғандин кейин жутдашлар өтмүшкә қайта сәпәр чәкти. Пәрзәнт сөйүп, нәврә-чәвриләр қучқан мөтивәрләрниң бир-биригә ейтари аз әмәс, әлвәттә. Қайғу билән шатлиқта һағда болғанға йәтсунму! Гайида мәслиһәтчигиму һаҗәтмән болуп қалиду киши. Улар үчүн һаят беһөддә өтмиди. Һәрким өз кәспи бойичә ишләп, ана жут, егилик вә наһийәниң тәрәққиятиға үлүш қошқан. Пешқәдәм устазлар Һәмра Әмәров, Васил Имиров, Саһибәм Турсунова вә Һүрләм Мәңсүрова йүзлигән шагиртлар қәлбигә мәрипәттин чирақ яққан. Раһиләм Балинова һөрмәтлик дәм елишқа чиққичә йеңилиқ хәвәрчиси болуп ишлигән. Әхмәт Сидиқов — талмас биләклик шофер, Нурәхмәт Қурбанов – салаһийәтлик мал дохтури, һә Әрмидин Дәраев болса, сода саһасиниң хадими. «Алтун» вә «Күмүч һалқа» саһиблири Хатәм Мединова, Зәйтүнәм Қасимова, Бәхитнурхан Талипова, Мәрийәм Семәтова, Ризвангүл Нәсирдинова вә Мерхан Кәримова көпбалилиқ қәһриман анилар җүмлисидиндур. Жиллар чанисида яшлиқ дәвир ғуюлдап өтүп, течлиқ әмгәк қойнида бәқувәт чағлар қапту. Шу пәйттики молчилиқни һасил қилған атилар билән анилар бүгүнки хатирҗәмликниң рәмзи әмәсму?! Өтмүш билән бүгүнки күнниң көрүги болған әшу әзизләр билән кәлгүси әвладимизниң бәхтигә бүгүнки течлиқ заманму мәңгүлүк болсун. Сеғинған қәлбләр егилири дидар ғенимәттин кам болмисун, илаһим! Махмут ИСРАПИЛОВ. Уйғур наһийәси.