• Йеңилиқлар
• 26 Маусым, 2014

Күчлүкләр ениқланмақта

Бразилиядә өтүватқан футбол бойичә дуния чемпионати  тоғрилиқ гезитимизниң  өткән санида елан қилинған мақалимизға  «Күтүлмигән нәтиҗиләрни елип кәлди», дәп сәрләвһә қойғанлиғимизни униңға қатнишиватқан командилар «қоллап-қувәтлигәндәк» тәсират пәйда қиливатиду. Һәқиқәтәнму,мәсилән,    «B» топида оюн көрситиватқан әмәлдики чемпион  Испания талланма командисиниң  дәсләпки икки учришиштила Голландия (һесап –1:5), андин кейин Чили командилиридин (0:2)  мәғлубийәткә учрап, биринчилик билән үзүл-кесил хошлишидиғанлиғи, әң ечинарлиғи,топтин чиқмай турупла, чемпионлуқ вакаләтлигини сақит қилидиғанлиғини «Қизил фурияниң» әң пессимист ишқивазлириниң ухлиса чүшигиму кирмигәнду, бәлким. Висенте дель Боске шагиртлириниң үчинчи турда Австралия командисини 3:0 һесави билән йеңиши пәқәт чемпионат статистикиси  үчүнла һаҗәт болуп қалди. «D» топида оюн көрсәткән Англия футболчилири тоғрилиқму шундақ дейишимиз мүмкин. Инглизлар дәсләп Италиядин (1:2), иккинчи учришишта Уругвайдин (1:2) йеңилип қелип, өйлиригә қайтишқа мәҗбур болди. Бу топта Коста-Рика командиси һәқиқәтәнму һазирчә һечким күтмигән нәтиҗиләрни қолға кәлтүрмәктә. Улар дәсләпки икки учришиштила Уругвай (3:1) һәм Италия (1:0) командилири үстидин ғалип чиқти вә өз топида биринчи орунни егиләп, чемпионатниң 1/8 қисмиға йолланма алди. Шундақла Лионель Месси башлиған аргентинилиқ жигитләрниңму Иран футболчилириниң дәрвазисиға судья қошуп бәргән вақиттила бир поңзәк киргүзүп, учришиш тәғдирини өзлириниң пайдисиға һәл қилғанлиғиму  һечким күтмигән нәтиҗә болди. Илгәрки кеңәш кәңлигидин Бразилиядә өтүватқан чемпионатқа қатнишиватқан Россия талланма командисиниң Җәнубий Корея вә Бельгия командилири билән өткүзгән учришишлири пәқәт россияликләрниңла әмәс,бәлки МДҺ әллиридики футбол ишқивазлириниң көңлидин чиқалмиди. Хошнилиримизниң бу икки команда билән қандақ ойниғанлиғини вә учришишларниң қандақ нәтиҗә билән аяқлашқанлиғини силәр билисиләр.Шуңлашқиму уларға тәпсилий тохтилишниң һаҗити йоқ, дәп ойлаймиз. Россия командисиниң  чемпионатниң 1/8 қисмиға чиқип-чиқмаслиғи Алжир командиси билән өткүзидиған матчқа бағлиқ. Ким билиду, авал проблема пәйда қиливелип, андин кейин уни бар күчини сәпәрвәрликкә кәлтүргән һалда биртәрәп қилишқа «адәтлинип» қалған россияликләр өзлириниң немигә қабил екәнлигини топтики ахирқи оюнида көрсәтмәкчи болғанду. Қисқиси, бу қетимқи дуния чемпионати өзиниң күтүлмигән нәтиҗилири билән бизни «ундақ болуши мүмкин әмәс», дегән ибаридин ваз кечишкә мәҗбурлиди, дәп ишәшлик тәкитләшкә  болиду. Сәвәви, һәрбир йеңи оюн  күни биз күтмигән йеңи-йеңи вақиә-һадисиләрни һәдийә қилип, бәзилирини ечиндурса, йәнә бирлириниң қәлбидә мәйрәмлик кәйпият һасил қилмақта. Мундақ кәйпият чемпионатниң плей-офф қисмидиму сақлинидиғанлиғи талашсиз. Чүнки һазирчә финалниң 1/8 қисмида Бразилия — Чили, Голландия — Мексика, Коста-Рика — Грекия, Колумбия — Уругвай учришидиғанлиғи мәлум. Бу вә чемпионатниң плей-офф қисмиға чиқидиған башқа командилар бизгә йәнә «күтүлмигән нәтиҗиләрни» елип келиши мүмкин. Гезитимизниң мәзкүр сани қолиңизға тәккәндә Е вә F топлиридики ахирқи тур оюнлириниң нәтиҗилири мәлум болиду. Бу топлардин һазирниң өзидила плей-оффқа йолланма алған Франция билән Аргентина командилириға йәнә кайси икки талланма командиниң қошулидиғанлиғиму футбол ишқивазлирида алаһидә қизиқиш пәйда қиливатиду. Бүгүн G вә H топлирида һәммә нәрсә ениқ болиду. Бизниң шималий хошнимиз — Россия талланмиси Алҗир билән күч синишиду. Шөһрәт МӘСИМОВ.