• Йеңилиқлар
• 25 Шілде, 2014

Президентниң тәбрик телеграммиси

Мәмликәт Президенти Нурсултан Назарбаев Жан-Клод Юнкерни Европа комиссиясиниң рәиси лавазимиға сайлиниши билән тәбриклиди.Қазақстан Президенти Жан-Клод Юнкерниң Люксембург премьер-министри вә Евротоп рәһбири сүпитидики мол тәҗрибисиниң, шундақла Европа мәсилилирини чоңқур билишиниң униң Европа Иттипақиниң турақлиқ тәрәққиятиға чоң һәссә қошидиғанлиғиға ишәнчә билдүрди. «Сизниң 2008-жили Астанаға вә мениң 2010-жили Брюссельға қилған сәпәрлиримизниң давамида қелиплашқан өзара чүшәнчә һәм ишәнчигә асасланған конструктив диалогни давамлаштурушқа тәйяр екәнлигимни билдүримән. Қазақстан вә Европа оттурисида кәң шериклик һәм һәмкарлиқ тоғрилиқ йеңи келишим даирисидики өзара мунасивәтләрниң сүпәт җәһәттин йеңи дәриҗигә көтирилидиғанлиғиға үмүт қилимән», дейилиду тәбрик телеграммисида. Мәлумки, Қазақстан үчүн еврозона мәмликәтлири сәясий алақиларда вә ихтисадий мунасивәтләрдә муһим шерикләрдин һесаплиниду. Җүмлидин пәқәт өткән жилила җумһурийитимизниң Евроиттипақ билән болған сода муамилиси 53,4 миллиард, мошу жилниң январь — апрель айлирида 19 миллиард АҚШ доллирини тәшкил қилди. Бу мәмликәт ташқи сода муамилисиниң 53,7 пайизи. Қазақстан ихтисадиға селинған чәт әл капиталиниң йерими дегидәк — 47 пайизи — Европиниң. Һазирқи вақитта Евроиттипақ вә Қазақстан шериклик һәм һәмкарлиқ тоғрилиқ йеңи келишимни тәйярлаватиду, у тәрәпләр оттурисида 1995-жили түзүлгән әмәлдики келишимниң орниға келиши керәк. Ейтмақчи, йеқинда Қазақстан Ташқи ишлар министрлиги йеңи келишим лайиһисиниң толуқ келишилгәнлигини  билдүрди. Бу 30-июнь — 1-июльда Брюссельда болуп өткән тәрәпләр вәкиллири музакирилириниң йәттинчи басқучидин кейин мәлум болди. Астана Европа Иттипақи  билән йеңи келишим бойичә музакириләрниң мошу жилниң ахириғичә аяқлишидиғанлиғиға үмүт қилиду. Қазақстанниң 2014-жилниң 15-июлидин тартип биртәрәплимә тәртиптә Нидерландия, Бүйүк Британия, Франция, Германия, Италия гражданлири үчүн биржиллиқ қәрәлгә визисиз қатнашни җарий қилишиму өзара пайдилиқ һәмкарлиқниң күчийишигә ярдәм қилиду.