• Йеңилиқлар
• 31 Шілде, 2014

«Ғунчәм» тамашибинларни күтиду

Уйғур театрида/ Өткән җүмә күни Қ.Ғоҗамияров намидики җумһурийәтлик дөләт Уйғур музыкилиқ комедия театрида язғучи-драматург Зунун Қадирийниң қәлимигә мәнсүп «Ғунчәм» спектаклини тапшуруш тәнтәниси болуп өтти. Униңға язғучи-драматурглар, режиссерлар вә аммивий әхбарат васитилириниң хадимлири иштрак қилди.

Мәлумки, Зунун Қадирийниң өткән әсирдә йезилған бу әсәри буниңдин оттуз жил илгири Өзбәкстандики уйғур бөлүмидә билим алған студентлар тәрипидин сәһниләштүрүлгини болмиса, чоң сәһнидә қоюлмиған еди. Бу қетим театр режиссери Муһитҗан Һезимов уни сәһниләштүрди. Театр мудири Савутҗан Сонуровниң ейтишиға қариғанда, мәзкүр әсәр толуқ ишлинип вә униң музыкисини рәтләш ишлириға бираз вақит сәрип қилинған. Бу йәрдә Алимҗан Тоқаевниң сиңдүргән әҗрини алаһидә тилға елишқа әрзийду. «Ғунчәм» драмисида асасән әшу бир жиллири хәлқимизниң бешиға чүшкән еғир күнләр, шуларниң арисида бәг-бәгзадиләр аталмишларниң аддий хәлиққә салған зулуми, яла-төһмәтләр арқилиқ уларниң барлиқ мал-мүлкини тартивелиши вә мошундақ әһваллар йүз бериватқанда дехан Нурум билән Ғунчәмниң таза муһәббити баян қилиниду. Қисқичә ейтқанда, Өмәр шаңию Ғунчәмниң анисиниң вапатидин кейин азғина пул хираҗәт қилип қоюп, «Мән бирмунчә чиқимға учридим, әнди шуниң һесавиға сениң ата-анаңдин қалған мевилик бағ мениң илкимгә өтиду, өзәң болсаң, мениң оғлумға турмушқа чиқисән», дәп зорлуқ-зомбилиқ билән уни Сейитқа бәрмәкчи болғанлиғи һәм шу арилиқта Нурумниң Ғунчәмни оғрилиқчә елип кәтмәк болған ойи әмәлгә ашмай, байларниң қизни залимларчә хорлашлири баян қилиниду. Спектакльниң тапшуруш тәнтәнисигә иштрак қилған сәнъәтшунас алим Әхмәтҗан Қадиров, язғучи-драматург Әхмәтҗан Һашири, режиссер Әкрәм Әхмәтов, журналист Тельман Нурахунов, язғучи Дүрнәм Мәшүрова вә «Азия бүгүн» гезитиниң баш муһәррири Авут Мәсимов әсәр тоғрисидики пикир-мулаһизилири билән ортақлашти. Шундақла улар мәзкүр әмгәктә һәқиқәтәнму режиссер билән актерлар коллективиниң көп издиниши түпәйли утуқлуқ чиққанлиғини вә шуниң билән биллә бәзи камчилиқ-нуқсанлардинму хали әмәслигини тилға алди. Болупму улар байниң оғли Сейитниң ролини иҗра қилған Дилшат Аманбаевниң, Нурум вә Ғунчәм ролидики Луиза Розахунова билән Рисам Мамутовниң актерлуқ маһаритигә жуқури баһа бәрди. Ахирида Муһит Һезимов сөз елип, жуқурида ейтилған камчилиқлардин тоғра хуласә чиқиридиғанлиғини изһар қилди.

Мәшүр САСИҚОВ.