• Йеңилиқлар
  • 31 Шілде, 2014

Йеңи базарларға йол ачиду

Мәлумки, бийил 29-май күни Астанада Қазақстан, Россия вә Белоруссия президентлири Евразия ихтисадий иттипақини қуруш тоғрилиқ шәртнамини имзалиди.Бу үч дөләт тарихидики ахирқи жилларда йүз бәргән муһим вақиәләрниң бири болғанлиғи ениқ. Экспертларниң тәкитлишичә, бу пәқәт үч дөләт хәлқи үчүнла әмәс, шундақла һазир дунияда қелиплашқан геосәясий әһвалғиму өз тәсирини тәккүзиду. Әлвәттә, йеңи қурулған хәлиқара тәшкилатни қоллап-қувәтләватқанларниңму һәм қарши чиққучиларниңму сани көп. Қарши чиқиватқанларниң асасий пикирлири — бу тәшкилатқа әза дөләтләр өз мустәқиллигидин айрилиду. Кеңәш Иттипақини тикләшниң йеңи шәкли, шундақла бу иттипақ Россияниң Қазақстан вә Белоруссиягә қисим көрситиши арқилиқ қурулди. Мошундақ мәвқәдә болуватқанларға, чоң ишләпчқириш карханисиниң рәһбири сүпитидә ейтарим шуки, Евразия ихтисадий иттипақини қуруш тәшәббусини көтәргән вә униң әмәлгә ешишиға көп күч чиқарған Қазақстан Җумһурийитиниң Президенти Нурсултан Назарбаев болди вә у келәчәкни көздә тутқан аләмшумул ихтисадий лайиһидин келип чиққан қурулум болуп һесаплиниду. Һәммимизгә мәлумки, 1994-жили Қазақтсан рәһбири М.Ломоносов намидики Москва дөләт университетида оқуған лекциясидә нәқ мошу ғайини алға сүргән еди. Тәкитләш лазимки, Евразия ихтисадий иттипақини қуруш тоғрилиқ шәртнамини имзалаш тәнтәнисидә үч дөләт рәһбәрлири бу тәшкилатниң һечқандақ сәясий түс алмайдиғанлиғини алаһидә тәкитләшти. Мәзкүр тәшкилат үч дөләтниң ихтисадий мәнпийәтлири турғусидики тәшкил қилинди. Шундақла Евразия ихтисадий иттипақи даирисидә миллийүстүнлүккә егә қанун чиқиридиған, миллий һөкүмәтләрдин жуқури туридиған умумий рәһбәр яки рәһбирий орган болмайду. Бу факт һәрбир дөләтниң мустәқиллигини капаләтләндүриду. Әнди бу тәшкилатниң үч дөләт үчүн ихтисадий җәһәттин иҗабий тәрәплири көп. Мәсилән, деңиз йоллириға чиқиш мүмкинчилиги йоқ Қазақстан үчүн Россия вә Белоруссияниң транзитлиқ ихтидарини кәң пайдилинишқа шараит яритилди. Шундақла үч дөләт территориясидә ишчи күчи, мәбләғ вә мәһсулатларниң әркин «һәрикити» үчүн һеч тосалғу болмайду. Бу өз новитидә, қазақстанлиқ тиҗарәтчиләр үчүн йеңи базарларға чиқишқа кәң йол ачиду. Һазир қазақстанлиқ карханилар Россия вә Белоруссия завод-фабрикилар билән риқабәткә чүшәлмәйду дәватқанларму бар. Бу хата пикир. Мәсилән, бизниң завод хәлиқ стандартлар бойичә ІSO 9001 — 2008, ІSO 14001 — 2004, BS OHSAS 18001 — 2007 менеджмент системисини җарий қилди. Демәк, биз хәлиқара стандартта ишләватимиз. Һазир биз Бажхана иттипақи даирисидики барлиқ мүмкинчиликләрдин толуқ көләмдә пайдилиниш мәхситидә селиниватқан «Ғәрбий Европа — Ғәрбий Хитай» магистралиниң қурулушиға қатнишиватқанлиғини мәмнунийәт билән тилға алғум келиду. Россия вә Белоруссия билән йеқин һәмкарлишип ишләватимиз. Әнди 2015-жили 1-январьдин башлап, ишқа қошулидиған Евразия ихтисадий иттипақи елимиз ихтисадини, җүмлидин заводумиз ихтидарини йеңи, сүпәтлик басқучқа көтиридиғанлиғиға ишәнчим камил. Мундақ дәп кесип ейтиватқинимниң сәвәви, бизниң заводниң мәһсулатлири Евразиялик ихтисадий иттипаққа әза болған һәм россиялик, һәм белоруссиялик кәсипдашлиримизниң қизиқишини пәйда қиливатиду. Бу, демәк, бизниң һәрқандақ риқабәткә тәйяр екәнлигимизни көрситиду. Лекин бүгүнки қол йәткүзгән утуқлиримиз биләнла қанаәтлинип қелишқа һәргиз болмайдиғанлиғини яхши чүшинимиз. Шуни нәзәрдә тутқан һалда биз барлиқ технологиялик җәриянларға бүгүнки тәрәққий әткән дәвирниң илғар илим-пән утуқлирини техиму кәң җарий қилишни, шу арқилиқ херидарлиримизниң өскиләң тәләплиригә толуқ җавап беридиған сүпәтлик, шуниң билән биллә әрзән мәһсулат йетиштүрүшниң асасий мәхситимиз дәп билимиз. Ишәнчим камилки, Евразия ихтисадий иттипақи бизгә пәқәт ихтисадий утуқ елип келидиған болиду. Әхмәтҗан ШАРДИНОВ, «АЗМК Group» ҖЧЙ мудирлар кеңишиниң рәиси. Алмута шәһири.

365 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы