• Йеңилиқлар
• 07 Тамыз, 2014

Яйма базар өтмүштә қалиду

Шәһәр һаяти/ Хәлиқ арисида яйма базар атилип кәткән базарлар йенидин өтидиған Северное кольцо кочиси бойичә әнди автомобиль вә башқа транспорт васитилири тохталсиз өтәләйду. Буниңға мошу һәптиниң бешида ушбу йәрдики иш җәрияни билән тонушқан бир топ журналистлар көз йәткүзәлиди. Алмута шәһәрлик мемарчилиқ вә шәһәр қурулуши башқармиси мутәхәссислириниң тәкитлишичә, мошу проблемилиқ участкини кәңәйтиш ишлири толуқ кетип бариду. Шуниң билән бир вақитта заманивий сода өйлириниң қурулушиму сүръәтлик жүргүзүлүватиду. Илгәрки чоң-кичик оттуз базарниң орниға он бәш заманивий сода өйи вуҗутқа келиду. Мәсилән, алдимиздики сентябрь ейидила толуқ реконструкция қилинған «Олжа» заманивий сода өйини пайдилинишқа бериш көздә тутулмақта. Жил ахириға қәдәр кона яйма базарниң орнида йәнә төрт сода өйи ишини башлайду. 2016-жилниң ахириғичә болса, автомобиль йолини толуқ реконструкция қилиш вә селиш аяқлишиду. Кәңәйтиливатқан участкиниң узунлуғи 3,5 километрни тәшкил қилиду. Йол-қурулуш техникиси айрим җайларға йеңи асфальт йейитип, қатнаш йолиниң асасини тәйярлаватиду. Шундақ екән, бираз вақит өткәндин кейин сода өйлириниң толуқ ишлишигә қаримай, бу йәрдин тохталсиз өтүп кетиш мүмкин болиду. Шундақ қилип, алтә асасий вә икки қошумчә йол  қатарлири сода өйлиригә һечбир тосалғусиз берип-келишкә имканийәт яритилиду. Қисқиси, бу йәрдә елип бериливатқан иш сүръити мошу жилниң ахириға қәдәр асасий реконструкция ишлири аяқлишип, Северное кольцо кочисидики қатнаш проблемисини һәл қилиду дегән үмүт-ишәнчини пәйда қилиду. Шөһрәт МӘСИМОВ.