• Әхбаратлар еқими
• 28 Тамыз, 2014

Достлуқта чегара йоқ

Өткән һәптидә Панфилов наһийәсидә регионлуқ чегара йенидики һәмкарлиқ фестивали өтти. Мәзкүр чарә-тәдбирниң асасий уюштурғучиси — Алмута вилайәтлик Қазақстан хәлқи Ассамблеяси болди.«Қорғас» хәлиқара чегара йенидики һәмкарлиқ мәркизидә» уюштурулған «Қорғас шәриқ дәрвазиси» мавзусидики йәрмәңкә даирисидә «Достлуқта чегара йоқ» фестивали давамида икки дөләт гражданлири йеқин мунасивәтләрни орнатти. Фестиваль даирисидә қазақстанлиқ рәссамларниң әмгәклириниң көргәзмиси, вилайәттики «Шағала», «Туған ел», «Ачимоноль», «Солнышко» миллий ансамбльлириниң концерти уюштурулди. Бу күни  қазақстанлиқлар, шундақла «Қорғаста» йеңи сода мәркәзлириниң ечилиш тәнтәнисигиму қатнашти. Фестиваль 21-август күни Талдиқорған шәһиридә аммивий әхбарат васитилириниң вәкиллири билән учришиштин башланди. Әтиси Яркәнт шәһиридики «Нур Отан» партияси Панфилов наһийәлик шөбиси өйидә «Қазақстан хәлқи Ассамблеясиниң дөләтлик этносәясәтни әмәлгә ашуруштики роли» дегән мавзуда жиғин болуп өтти. Мәзкүр баш қошушни Алмута вилайәтлик Қазақстан хәлқи Ассамблеяси рәисиниң орунбасари, кативатиниң рәһбири Ғәбит Турсынбай ечип, фестивальниң мәхсити вә униң давамида әмәлгә ашидиған чарә-тәдбирләр һәққидә тәпсилий ейтип өтти. Панфилов наһийәси һакиминиң орунбасари Роза Мағрупова көпмилләтлик регион хәлқиниң өзара достлуғи, өмлүги вә бирлишип атқуруватқан ишлири һәққидә ейтти. Шуниң билән биллә вилайәттики Ассамблея рәисиниң орунбасари Александр Бузыкин, «Нур Отан» партияси Талдиқорған шәһәрлик шөбиси рәисиниң орунбасари Асийәм Әхмәтова, Балкар этномәдәнийәт мәркизиниң рәиси Дария Кравченко, Панфилов наһийәлик ветеранлар кеңишиниң рәиси Сағымбек Ушбаев, «Жаркент жанашыры» хәйрихаһлиқ фондиниң рәиси Санийәм Зулиярова җәмийәтлик разимәнлик вә һәмкарлиқ, этносәясәт мәсилилири тоғрилиқ өзлириниң пикирлирини ейтти. Шу күни Головацкий йезисидики Мәдәнийәт өйидә «Достлуқниң гүлтаҗиси» намлиқ концертлиқ программа намайиш қилинди.