• Йеңилиқлар
  • 04 Қыркүйек, 2014

Қутлуқ билим дәргаһи

Хуш хәвәр/ Әмгәкчиқазақ наһийәсиниң Достлуқ йезисида йеңи мәктәп бенаси пайдилинишқа берилди Бийилқи оқуш жили Әмгәкчиқазақ наһийәси Достлуқ йезисиниң оқуғучилири билән муәллимлиригә, умумән, йеза турғунлириға алаһидә соғиси билән кәлди. Ениғирағи, жутта 300 орунлуқ заманивий мәктәп селинип, пайдилинишқа берилди.Қутлуқ билим дәргаһиниң ечилиш мәрасими 31-август күни болуп өтти. Униңға жут аһалисидин ташқири наһийә рәһбәрлиги, җәмийәтлик тәшкилатлар һәм аммивий әхбарат васитилириниң вәкиллири вә башқиму меһманлар иштрак қилди. Җүмлидин, достлуқлиқларниң хошаллиғиға ортақлишиш мәхситидә җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Абдурешит Мәхсүтов, Алмута шәһәрлик жигитбашлири кеңишиниң рәиси Инәмҗан Худайбәрдиев, Әмгәкчиқазақ наһийәлик Уйғур этномәдәнийәт мәркизиниң рәиси Арселин Зулияров, униң орунбасари Айнисәм Вайдинова, Әмгәкчиқазақ наһийәсиниң баш жигитбеши Турсунмәһәмәт Абдусемәтов, Ават йезисиниң жигитбеши Үсәнҗан Абдурахманов, жут активистлири Музәппәр Мутәллипов, Ғоҗахмәт Шәмахунов вә мошу қурларниң муәллипи қәдәм тәшрип қилди. Риясәтчиләрниң иҗазити билән дәсләп минбәргә чиққан Әмгәкчиқазақ наһийәсиниң һакими Бинәли Ысқақ тәнтәнә қатнашқучилирини Конституция һәм Билим күнлири, шундақла жут аһалисини шуниңға қошумчә йеңи мәктәп бенасиниң ечилиши мунасивити билән сәмимий тәбриклиди. У өз сөзидә мошундақ хошаллиқ-йеңилиқларниң йүз беришиниң беваситә елимиздә моҗут сәясий турақлиқ вә җәмийәтлик разимәнликкә мунасивәтлик екәнлигини, буниң үчүн дана рәһбиримиз — Милләт лидери Нурсултан Әбиш оғли Назарбаевқа чәксиз миннәтдарлиқ билдүрүшимиз лазимлиғини алаһидә тәкитлиди. Һаким сөзара көпчиликни реҗиләнгән бирқатар нәмунилик ишлар биләнму тонуштуруп өтти. Андин сөз новитини алған Алмута вилайәтлик Қазақстан хәлқи Ассамблеяси рәисиниң орунбасари, кативат рәһбири Ғәбит Турсынбай мошундақ изгү ишларниң көпмилләтлик елимиздики хәлиқләр билән еләтләрниң өзара чүшәнчиси һәм ишәнчиси, бирлиги һәм разимәнлиги арқисида болуватқанлиғини алаһидә қәйт қилип, жутқа — өмлүк, устазларға — иҗадий утуқ, оқуғучиларға парлақ келәчәк тилиди. Йеза турғунлири намидин нутуқ сөзлигән жут мөтивәри Тохтахун Исламбақиев мәзкүр билим дәргаһиниң қәд көтиришигә күч чиқарған барлиқ шәхсләргә, җүмлидин наһийә һакими Бинәли Ысқаққа алаһидә рәхмитини ейтип, дуасини бәрди. Шуниңдин кейин сөзгә чиққан мәзкүр билим дәргаһи бенаси қурулушиниң «муәллипи», «Альтаир» ширкитиниң мудири Сейитхан Қырқымбаев  өзиниң иллиқ ләвзини билдүрүп, мәктәп мудири Жанар Муқалиеваға рәмзлик ачқучни тәнтәнилик рәвиштә тапшурди. Андин лента қийиш һөрмитигә Бинәли Ысқақ, Ғәбит Турсынбай вә Тохтахун Исламбақиев муйәссәр болди. Тәнтәнә ахири мәктәп бәдиий һәвәскарлар коллективи тәрипидин тәйярланған концертлиқ программиға улашти. Мошу йәрдә мақалимизға чекит қойсақ болатти. Амма пурсәттин пайдилинип, мәзкүр билим юртиниң бәрпа болушиға сәвәпкар һәм дәвәткар болған адәмләр һәққидә тохтилип өтмәкчимиз. Раст, бу дәргаһниң селиниши дөләт тәрипидин реҗиләнгән болсиму, униң қәрәлиниң намәлумлуғи достлуқлиқларни әндишигә салған. Өткән жили йоли чүшүп, мошу жутқа қәдәм ташлиған Алмута шәһири Достлуқ мәһәллисиниң баш жигитбеши Инәмҗан Худайбәрдиевқа жут ақсақали Тохтахун ата Исламбақиев: «Сән шәһәрдә турисәнғу, йәни чоң адәмләр билән арилишисән. Жутумиздики йеңи мәктәпниң қурулушини башлашниң бир амалини издәп көрсәңчу» дәп илтимас қилиду. Инәмҗан ака сәпдашлири — җумһурийәтлик Уйғур этномәдәнийәт мәркизи йеңидики Жигитбашлири кеңишиниң рәиси Абдурешит Мәхсүтов вә Қазақстан Җумһурийити Парламенти Мәҗлисиниң депутати Мурат Әхмәдиевниң ярдәмчиси Абдусаттар Турдибақиев билән мәслиһәтлишип, моҗут әһвални Мурат Абдрим оғлиға йәткүзиду. Депутат дәрһал ишқа киришип, тегишлик орунларға мураҗиәт қилишқа башлайду. Шундақ қилип, мәсилә орнидин қозғилип, өзәңлар көрүп турғинидәк, иҗабий нәтиҗисини бериду. Қурулуш ишлири давамида Мурат Әхмәдиев қурулуш җәриянини өз назаритигә елип, униң илгирилишигә бар күч-ғәйритини сәрип қилиду. Шуңлашқа жуқурида исимлири аталған шәхсләрдин, болупму йеганә депутатимиздин  Достлуқ мәһәллисиниң турғунлири чәксиз миннәтдар. Мошу йәрдә шундақла жутниң сабиқ жигитбеши Алимҗан Илиев рәһбәрлигидики җамаәтчилик вәкиллириниңму бу ишта көп әмгәк сиңәргәнлигини атап өтмәй мүмкин әмәс. Шундақ қилип, Достлуқ йезисида қәд көтәргән йеңи билим дәргаһида 459 (қазақ синиплирида — 139, уйғур синипида — 320) оқуғучи — оқушини, 68 муәллим устазлиқ паалийитини башлавәтти. Ата-аниларниң хошаллиғида чәк йоқ. Илаһим, бу жутта мошундақ шат-шадиман, бәхитлик дәмләр мол болғай! Ершат ӘСМӘТОВ. Әмгәкчиқазақ наһийәси. Пәрһат ҺӘМРАЕВ чүшәргән сүрәт.

441 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы