• 1-сентябрь — Билим күни
• 04 Қыркүйек, 2014

Билим дәргаһлирида дәсләпки қоңғурақ челинди

Җириң, җириң, җириң.../ 1-сентябрь — Билим күни. Униңға кимниң қандақ тәйярлиқлар билән кәлгәнлигидин қәтъий нәзәр, һәмминиң көңлидә келәчәккә болған чәксиз ишәнчә, алға қойған мәхсәтлирини ада қилишқа қәтъий ирадә һәм қизғинлиқ һис-туйғулири муҗәссәм. У күни һәммә мәктәпләрдә дәсләпки қоңғурақ мәрасими өткүзүлүп, оқуғучиларни ана мәктәп қойниға чақирди. Гөдәкләр һаятида унтулмас болуп сақлинип қалидиған бу мәрасимниң җай-җайлардики айрим уйғур мәктәплиридә қандақ өткәнлиги тоғрилиқ мухбирлиримиз хәвәрләйду. Дәсләпки қоңғурақ мәрасими Алмута шәһиридики М.Яқупов намидики 101-мәктәп-гимназиядә жилдиқидәк дағдуғилиқ өтти. Униңға ата-анилар, җәмийәтлик тәшкилатларниң рәһбәрлири, йәрлик башқуруш органлириниң вәкиллири, җәмийәтлик ишларниң активистлири қатнашти. Тәнтәнидә сөзгә чиққан Алмута шәһәрлик билим башқармисиниң йетәкчи мутәхәссиси Ерлан Түктибаев, Санаәтчиләр, тиҗарәтчиләр вә йеза егилиги хадимлири җумһурийәтлик ассоциациясиниң президенти Дилмурат Кузиев, Султанқорған мәһәллисиниң баш жигитбеши Ғәйрәт Мәмәтәлиев, башланғуч синип муәллими Рашидәм Илиева вә башқилар жиғилғанларни Билим күни билән сәмимий тәбрикләп, устазларниң ишиға, оқуғучиларниң оқушиға муваппәқийәтләр тилиди. Андин гимназия мудири Хуршидәм Ниязова тәнтәнигә қәдәм тәшрип қилған меһманларға өзиниң рәһбәрлигидики билим дәргаһини маддий вә мәнивий җәһәттин қоллап-қувәтләп келиватқан сахавәтлик инсанларға сәмимий миннәтдарлиғини билдүрди. Тәнтәнә давамида меһманлар 1-синип оқуғучилири тәрипидин тәйярланған әдәбий-музыкилиқ монтажни, гимназия йенидики бәдиий һәвәскарлар өмиги әзалириниң нахша-уссуллирини тамашә қилди. Бийилқи оқуш жилида 6 биринчи синип, 4 тәйярлиқ синипи ечилип, гимназия босуғисини 240 гөдәк атлиди. Әнди устазлар коллективи болса, 11 яш муәллим билән толуқтурулди. Шәмшидин АЮПОВ. *** Билим күни Алмутидики А.Розибақиев намидики 153-мәктәп-гимназиядиму тәнтәнилик нишанланди. Чирайлиқ безәлгән һойлиға муәллимләр, ата-анилар, оқуғучилар вә мәйрәм мунасивити билән тәклип қилинған меһманлар жиғилди. Гимназия мудири Шавкәт Өмәров тәнтәнини киришмә сөз билән ачқандин кейин сөзгә чиққан педагогика пәнлириниң намзити Емельян Һошуров, Җәнубий Қазақстан вилайәтлик Өзбәк драма театриниң мудири Икрам Хашимҗанов, җумһурийәтлик Уйғур этномәдәнийәт мәркизи йенидики Ханим-қизлар кеңишиниң рәиси Сәнәм Беширова, алимлар Рабик Исмайилов, Шерипҗан Надиров вә Әвезов наһийәлик Уйғур этномәдәнийәт мәркизиниң рәиси Реһимҗан Семәтов жиғилғанларни Билим күни мунасивити билән сәмимий тәбрикләп, иллиқ тиләклирини изһар қилди. Ейтиш керәкки, төрт тәйярлиқ синипиға 100 гөдәк қәдәм ташлиса, 1-синиптин алтиси ечилди. Әнди устазлар коллективи болса, конкурс асасида 14 яш муәллим билән толуқтурулди. Мана мошу ишларда Әвезов наһийәлик Уйғур мәдәнийәт мәркизиниң, униң йенидики Ханим-қизлар кеңишиниң, мәһәллидики жигитбашлири рәһбәрлигидики җамаәтчилик активистлириниң, тиҗарәтчиләрниң алаһидә күч чиқарғанлиғини тәкитләп өтүш лазимдур. Әйнә шуңлашқиму тәнтәнә ахирида гимназия мудири Шавкәт Өмәров уларға алаһидә миннәтдарлиғини билдүрди. Юлтузай СЕМӘТОВА. *** Җәнубий пайтәхтимиздики М.Һәмраев намидики 150-уйғур оттура мәктивиниң муәллимләр коллективи, оқуғучилар вә ата-анилар әнъәнигә айланған дәсләпки қоңғурақ мәрасимини дағдуғилиқ нишанлап өтти. Мәрасим Қазақстан дөләт Гимнини орунлаш билән башланди. Андин үч биринчи синипқа қәдәм тәшрип қилған гөдәкләр көпчиликкә тонуштурулди. Мәктәп мудири Гүлмира Тохтахунова бу йәргә жиғилғанларни йеңи оқуш жилиниң башлиниши билән тәбриклиди. Шуниңдин кейин Алатав наһийәлик һакимийәтниң вәкили Элмира Надирова, ҖУЭМ йенидики «Нур Отан» партияси «Жас Отан» яшлар қанитиниң рәиси Коммунар Исламияров, Алатав наһийәлик Уйғур этномәдәнийәт мәркизиниң рәиси Турғанҗан Йүсүпов, Заря Востока мәһәллисиниң баш жигитбеши Ярмуһәмәт Кибиров, Алатав наһийәлик Уйғур этномәдәнийәт мәркизиниң Заря Востока мәһәллисидики шөбисиниң рәиси Турапчан Абубәкриев вә башқилар тәбрик сөзгә чиқип, оқуғучиларниң оқушиға, устазларниң паалийитигә утуқлар тилиди. Новәттә ҖУЭМ йенидики Нураний анилар кеңишиниң рәиси Гүлҗаһан Муратова (төвәнки сүрәттә) сөзгә чиқип, оқуғучиларға атиған соғилирини тапшурди. Рашидәм МИРЗӘХМӘТОВА. Алмута шәһири. *** Бу жили Талғир наһийәсиниң Бесағаш йезисидики 29-оттура мәктиви оқуғучилириниң хошаллиғида чәк йоқ. Чүнки, улар бийил мурәккәп җөндәш ишлири жүргүзүлүп, тамамән башқичә түс алған мәктәп бенасида билим алидиған болиду. Билим күнигә беғишланған дәсләпки қоңғурақ тәнтәниси бу мәктәптиму дағдуғилиқ өтти. Униңға пәрзәнтлириниң хошаллиғиға ортақлашқан ата-анилар билән йәрлик һакимийәт вәкиллири қатнашти. Әнъәнә бойичә Дөләт Гимни орунлинип, Дөләт байриғи мәйданға кәлтүрүлгәндин кейин, мәктәп мудири Жанна Сағындықова өткән оқуш жилида мәктәп коллективиниң қол йәткүзгән утуқлириға тохталса, Бесағаш йеза округиниң баш мутәхәссиси Жазира Жабашева вә йезиниң һөрмәтлик пухраси Майкамал Турыспекова оқуғучиларни йеңи оқуш жилиниң башлиниши билән қизғин тәбриклиди. Мәрасим ахири оқуғучилар тәрипидин иҗра қилинған нахша-сазларға улашти. Мәшүр САСИҚОВ. *** 1-сентябрь – Билим күни мунасивити билән Ғәйрәт йезисидики Исмайил Саттаров намидики оттура мәктәптә өткән тәнтәнини мәктәпниң мудири Мәһәмәтҗан Турсунов киришмә сөз билән ечип, оқуғучиларни, ата-аниларни йеңи оқуш жилиниң башлиниши билән сәмимий тәбриклиди. Мәктәпниң қол йәткүзгән утуқлири вә келәчәккә бәлгүләнгән реҗилири билән тонуштурди. Мудир тәкитлигинидәк, мәктәпни өткән жили тамамлиған 25 учумкарниң үчи — алий, төрти мәхсус кәспий оқуш орунлириға дөләт гранти һесавиға оқушқа чүшкән. Тәнтәнә җәриянида мәктәпниң дәсләпки һәрбий тәйярлиқ пәниниң муәллими, Тәләт Мәхсүтов — «Отан патриоты» медали, мәктәп мудириниң оқуш ишлири бойичә орунбасари Гүлҗәһрәм Мөрдинова наһийәлик билим бөлүминиң Пәхрий ярлиғи билән тәғдирләнди. Аси йеза округи һакиминиң орунбасари Дәмир Қадырбаев йеза округи һакиминиң изгү тиләклирини йәткүзүп, башланғуч синип муәллими Бақытгүл Егимбаеваға, биология пәниниң муәллими Венера Җалаловаға вә китапханичи Аидәм Турсуноваға һакимниң Пәхрий ярлиқлирини тапшурди. Билим күни мәйримигә қәдәм тәшрип қилған Әмгәкчиқазақ наһийәсиниң Пәхрий граждини Оспан Атайбеков, пешқәдәм устаз Керимҗан Турсунов вә башқиму меһманлар билим саһасиниң бағвәнлири – устазларға вә уларниң пәрвиш қиливатқан гүллири – шагиртларға йеңи оқуш жилида муваппәқийәтләр тилиди. Тәнтәнә давамида оқуғучилар тәрипидин тәйярланған концертлиқ программа намайиш қилинди. Бу күни барлиқ синипларда «Қазақстан-2050: «Бир мәхсәт, бир мәнпийәт, бир келәчәк» мавзусида оқуғучиларни вәтәнпәрвәрликкә тәрбийиләйдиған дәрисләр өтүлди. Умумән, бийил Исмайил Саттаров намидики мәктәп босуғисини 36 бала атлиса, униң жигирмә йәттиси уйғур синипиға кәлди. Рашидәм РӘҺМАНОВА. Әмгәкчиқазақ наһийәси. *** Уйғур наһийәсиниң Чонҗа йезисидики Илия Бәхтия намидики уйғур оттура мәктивидә  дәсләпки қоңғурақ мәрасими тәшкиллик билән өткүзүлди. Мәктәп һойлисиға жиғилғанларни йеңи оқуш жили билән тәбриклигән мәзкүр мәктәпниң мудири Мунирәм Абдуллаева «Қазақстан йоли — 2050: бир мәхсәт, бир мәнпийәт, бир келәчәк» намлиқ қисқичә нутуқ билән сөзгә чиқти. Мәктәп мудириниң тәкитлишичә, муәллимләр коллективи өткән оқуш жилини 429 оқуғучиға билим бериш билән аяқлаштурған. Мәктәптин учум болған 26 түләкниң бәши Биртуташ миллий тестқа қатнишип, билим сүпитиниң 65 пайиз екәнлигини көрсәтти. Учумкарларниң бири алий оқуш орниға вә үчи һәрхил колледжларға грантқа оқушқа чүшти. Язлиқ тәтил пәйтидә мәктәп йенида дәм елиш вә сағламлаштуруш, әмгәк лагерьлири паалийәт жүргүзди. 23 оқуғучи жумһурийәтниң һәрхил лагерьлирида дәм елип қайтти. Бийилқи оқуш жилини 460 оқуғучи билән башлиған мәзкүр билим дәргаһида үч 1-синип вә икки мәктәп алди топи тәшкил қилинипту. Ейтиш керәкки, өткән жилиму шундақ болуведи. Бу утуқ, әлвәттә, ана тилини қәдирлигән мәктәп мудириниң, муәллимләр коллективиниң вә ата-анилар әжриниң мевиси. Мәктәп ата-анилар комитетиниң рәиси, жутниң чоң жигитбеши Әркин Ташмәтов вә йеза мөтивәри Мэлс Бекенов сөз новитини елип, тәнтәнә иштракчилирини йеңи оқуш жили билән тәбриклиди һәм уларға утуқлар тилиди. Дәсләпки қоңғурақ садаси яңриған тәнтәнә мәктәп йенидики ихчам мәркәз тәрбийиләнгүчилириниң концерти билән давамлишип, ахирида ата-анилар билән оқуғучиларға тәрбийә саати өткүзүлди. Ейтиш керәкки, тәнтәнигә иштрак қилған көплигән сахавәтлик тиҗарәтчиләрму қуруқ қол кәлмәпту. Улар бийилму «Мәктәпкә йол» акцияси даирисидә биртүркүм оқуғучиларға һамий болуп, уларни кийим-кечәк вә оқуш қураллири билән тәминлиди. Махмут ИСРАПИЛОВ. Уйғур наһийәси. *** Бийилқи оқуш жили Панфилов наһийәсидиму һәртәрәплимә тәйярлиқлар билән башланди. Өткән жили 4 миллиард тәңгидин ошуқ мәбләғниң мошу саһаға бөлүнүп, бийилқи оқуш жилида бу көрсәткүчниң 5 миллиард 53 миллион тәңгидин ешип кәткәнлиги билим бериш саһасиға қанчилик әһмийәт бериливатқанлиғидин дерәк бәрсә керәк. Йеңи оқуш жилиниң болупму деханғәйрәтликләр үчүн алаһидә бир әстә қалғидәк хошаллиқ елип кәлгәнлигини атап өтүш керәк. Ундақ болғини, бу йәрдә йеза аһалисини әскә алған һалда селинип, пайдилинишқа берилгән 180 орунлуқ мәктәп бенаси тәнтәнилик шараитта ечилди. Бу мунасивәт билән өткән тәнтәнилик мәрасимда наһийә һакими Бердаулет Абдулдаев, Алмута вилайәтлик билим сүпитини назарәт қилиш департаментиниң башлиғи Қанат Батырбеков вә башқилар тәбрик сөз сөзләп, муәллимләр билән оқуғучиларға ақ йол тилиди. Нурәхмәт ӘХМӘТОВ.                                                                                                             Панфилов наһийәси. Ана тилида оқуп, дөләт гранти һесавиға оқушқа чүшкәнләр Алмута шәһиридики А.Розибақиев намидики 153-мәктәп-гимназияни өткән жили 69 учумкар тамамлиди. Уларниң 21и дөләт гранти һесавиға оқушқа чүшти. *** Җәнубий пайтәхтимиздики М.Яқупов намидики 101-мәктәп-гимназияни өткән жили 27 учумкар тамамлиди. Уларниң 15и дөләт гранти һесавиға оқушқа чүшти. *** Әмгәкчиқазақ наһийәсиниң Байсейит йезисидики И.Тайиров намидики уйғур оттура мәктивини өткән жили 36 учумкар түгәтти. Уларниң 16си дөләт гранти һесавиға оқушқа чүшти. *** Панфилов наһийәсиниң Пәнҗим йезисидики А.Розибақиев намидики оттура мәктәпни өткән жили 38 учумкар  пүтәрди. Уларниң 5и дөләт гранти һесавиға оқушқа чүшти. *** Талғир наһийәсиниң Туздыбастав йезисидики 31-оттура мәктәпни өткән жили 25 учумкар тамамлиди. Уларниң 9и дөләт гранти һесавиға оқушқа чүшти. ПӘРЗӘНТЛИРИМИЗНИ УЙҒУР ТИЛИДА ОҚУТАЙЛИ, БУРАДӘРЛӘР!