• Иҗтимаий мәсилә
  • 18 Қыркүйек, 2014

Су хиҗалитидин қутулиду

Кейинки бирнәччә жил ичидә Уйғур наһийәсидики йеза-мәлиләрниң турғунлирини «Ақбулақ» дөләтлик программиси даирисидә ичидиған су билән тәминләш мәсилиси изчиллиқ билән һәл қилинмақта. Шу йосунда бийил һөкүмәт ғәзнисидин 116 млн. тәңгә бөлүнүп, әйни вақитта Дардамту йезисида су тармақлирини тартиш ишлири жүргүзүлмәктә. — Әслидә бу иш әтияздила башлиниши керәк еди, — дәйду йеза округи мәмурийитиниң баш мутәхәссиси Кеңес Бақтыбаев. – Тендер елан қилиш мәсилисигә бағлиқ сәл кечиктүрүлүп қолға елинсиму, ишниң сүръити яман әмәс. Келишим-шәрткә мувапиқ, су тармиғини тартиш ишлириға йезимизниң турғунлири җәлип қилинди. Бу ишқа өзимиз мәнпийәтдар болғачқа, жигитләр вақит билән һесаплашмай әмгәк қиливатиду. Ейтиш керәкки, бу лайиһә Серик Айтқожин рәһбәрлигидики «Айсем и Ко» ширкити тәрипидин әмәлгә ашурулуватиду. Талғир шәһиридә он жил мабайнида утуқлуқ паалийәт елип бериватқан мәзкүр ширкәт мутәхәссислири ахирқи икки жилда Райимбек вә Уйғур наһийәлириниң әмгәк базиридиму тонулған. — Ишниң башланғиниға икки йерим ай болди, — дәйду ширкәт прораби Асан Турдыметов. – Йезиниң чоң кочилири қезилип, турғунлар өйлиригә су киргүзүлүватиду. Шундақла икки су резервуариниң қурулушиму аяқлишип қалди. Уларниң бири пәвқуладдә әһвалларда ишқа қошулиду. Андин дизельлиқ генератор орнитимиз. Электр қувити болмиған пәйттиму су тартиш насослири бемалал ишләверидиған болиду. Лайиһидә қараштурулғандәк, барлиқ иш җәриянида заманивий технология үлгилиридин пайдилиниватимиз. Бу әснада ширкәтниң тәҗрибилик мутәхәссислири Ғәбит Торғаев, Айбек Мырзагелдиев, Мағжан Жазылбеков вә Айдар Топанов йәрлик жигитләр билән өмлүктә әмгәк қиливатиду. Әнди Бекболат Сарбасов, Мурадил Мусаев вә Асыл Сарбасов кәби жут балилири башқиларға үлгә болмақта. Мошуниңдин сәл илгири баһаси 11 млн. тәңгилик лайиһә бойичә Баһар йезилиқ округиға қарашлиқ Ширин йезисида су тармақлирини тартиш ишлири қолға елиниведи. Наһийәмиздә паалийәт елип бериватқан «Теплоремстрой» ширкити тәрипидин жүргүзүлүватқан бу ишму аяқлишиш алдида туриду. Демәк, пат-йеқинда ширинлиқларму у кочидин бу кочиға ичидиған су издәп бармайдиған болиду.     Махмут ИСРАПИЛОВ.     Уйғур наһийәси.    

216 рет

көрсетілді

0

пікір
Алдыңғы мақала Мүмкинчилиги чәкләнгән шәхсләргә ғәмхорлуқ
Келесі мақала Кәлгүсиниң тәхмини ой қозғайду

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы