• Йеңилиқлар
  • 25 Қыркүйек, 2014

Мөтивәрләр — жут бәрикити

1-октябрь  — Хәлиқара қерилар күни/ Жиллар өткәнсири өтмүшимиз шаһидлири болған мөтивәрләр қатари азийиватиду. Бәзи йезиларда улар санақлиқла қалди. Яркәнт тәвәсиниң Алтөй йезисидиму улардин бәш-алтила киши қапту. Өткәндә улар билән сөһбәтлишип қалдим. Арисидики әң чоңи Мухпул ака Розиев болуп, бийил һаятиниң 91-даваниға көтирилипту. Һели, өзи тимән саламәтлиги сағлам, жуттики той-төкүн, нәзир-чирақларниң тәвәррүк меһмини. Мухпул ака әсли мошу Алтөй йезисида туғулған екән. Ата-аниси мәзкүр жутни бәрпа қилғанларниң бири. Улар оттузинчи жиллири бу йәрдә колхоз тәшкил қилип, униң ихтисадини көтириш йолида әмгәк қилиду. Шу жиллири йүз бәргән қалаймиқанчилиқ, тәтүр тәшвиқатлар ақивитидә бу аилиму 1933-жили уйғурлар дияриға өтүп, Чилпәңзидә тирикчилигини давамлаштуриду, йәни деханчилиқ қилиду. Әнди у яқтиму шараит мурәккәпләшкән 1958-жили көплигән қериндашлиримиз қатарида бу яққа көчүп чиқип, ана жути — Алтөйгә орунлишиду. Киров намидики колхозниң әзалиридин болуп, деханчилиқ саһасида ишләйду. Мухпул ака қутлуқ кәтминини қолиға елип, йерим әсир йеза егилиги зираәтлирини өстүрүш билән шуғуллиниду. Көмүқонақ өстүрүш звеносиниму башқуруп, мол һосул йетиштүриду. Рәпиқиси Гүлшәмхан ана билән қувнақ аилидә он бир пәрзәнт сөйүп, уларни заманға лайиқ инсанлардин қилип, қатарға қошиду. Бу тәвәдә Баситовлар әвладини билмәйдиған адәм йоқ десәм. ашуруп ейтқанлиқ әмәс. Уларни «Мираплар сулалиси» дәпму атайду. Бу кәсип Басит атидин оғуллири Һосман, Сидиқ вә башқиларға мирас болуп қалди. Бийил Сидиқ ака һаятиниң 87-мәнзилини басти. Уму жутидики инавәтлик мөтивәрләрниң бири. У  су техниги — мирап болуп, тоғра 46 жил ишлигән екән. Турсун Зәйнавдиновниму алтөйликләр һөрмәт билән тилға алиду. У өмрини төмүрчиликкә беғишлиған инсан. Уму сәксәнниң пәллисигә йеқинлишип қапту. Мөтивәрләр баш қошуп қалса, өтмүшимиз һәққидә ейтидиған һекайилири қизиқ вә узун. Абдукерим ТУДИЯРОВ. Панфилов наһийәси. СҮРӘТТӘ: Сидиқ Баситов (солдин оңға) Мухпул Розиев вә Турсун Зәйнавдинов. Муәллип чүшәргән сүрәт. 

573 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы