• Йеңилиқлар
• 02 Қазан, 2014

Бирлишип көтәргән жүк йеник

Рәсмий учришиш/ Өткән һәптидә җумһурийәтлик Уйғур этномәдәнийәт мәркизиниң рәиси Шаһимәрдан Нурумов, җумһурийәтлик иҗтимаий-сәясий «Уйғур авази» гезитиниң баш муһәррири Ершат Әсмәтов, Қ.Ғоҗамияров намидики җумһурийәтлик дөләт Уйғур музыкилиқ комедия театриниң мудири Савутҗан Сонуров, ҖУЭМ башқарма әзалири — «АЗМК Group» ҖЧЙ мудирлар кеңишиниң рәиси, Алмута шәһәрлик мәслиһәтниң депутати Әхмәтҗан Шардинов вә тиҗарәтчи, «Нур Отан» партияси Алмута шәһәрлик шөбиси Сәясий кеңишиниң әзаси Асимҗан Злавдинов Алмута вилайитиниң һакими Амандық Батталовниң һозурида болди.Делегация рәһбири Шаһимәрдан Нурумов һакимға өз сәпдашлирини рәсмий тонуштуруш билән биллә уларниң, умумән, Қазақстан уйғурлириниң намидин буниңдин бир йерим ай илгири йеңи лавазимға тайинланған Амандық Ғаббас оғлини вә һакимниң иш башқурғучиси хизмитигә тайинланған Владимир Тохтусуновни сәмимий тәбрикләп, ишлириға муваппәқийәтләр тилиди. Андин Ершат Моллахун оғли билән Савутҗан Сидиқ оғли һакимға «Уйғур авази» гезитиниң һәм Уйғур театриниң қисқичә тарихи вә бүгүнки нәпәси һәққидә әхбарат бәрди. Шуниңдин кейин ҖУЭМ рәиси Шаһимәрдан Нурумов хәлқимизниң қол йәткүзгән утуқлириға, шундақла бүгүнки күнниң миллитимизгә мунасивәтлик муһим мәсилилиригә, болупму кадр мәсилисигә алаһидә тохталди. — Елимиздики уйғурларниң бесим көпчилиги Алмута вилайитидә истиқамәт қилиду, — деди Шаһимәрдан Үсәйин оғли. — Шуңлашқиму, һөрмәтлик Амандық Ғаббас оғли, бизгә башқа вилайәтләр һакимлиридин көрә, Сиз билән қоюқ мунасивәттә болуп, бир-биримиз билән һәмкарлиқта мустәқил елимиздики турақлиқни, миллий разимәнликни, хәлиқләр достлуғини мустәһкәмләш йолида үнүмлүк паалийәт елип баридиғинимизға ишәнчим камил. Натиқ нутқиниң давамида әң муһим проблемилиримизға тохталди. Мәсилән, ана тилимизда билим беридиған мәктәпләрдә стендларниң, көрнәклик қуралларниң, шундақла маарип мәһкимилири намлири йезилған тахтиларниң, тиллар тоғрилиқ қанунға мувапиқ уйғур тилида йезилиши шәрт болсиму, йәрлик һакимийәтләрниң буниңға йол қоймайватқанлиғи көпчиликни тәәҗүпләндүриватиду вә бу мәсилиниң аһали арисида һәрхил чүшәнмәсликләрни пәйда қиливатқанлиғи һечким үчүн сир әмәс. Дәрисликләргә дөләт тәрипидин йетәрлик мәбләғ бөлүнүватқан болсиму, наһийәлик маарип бөлүмлириниң бепәрвалиғи түпәйли, уларға өз вақтида һәм тәләпләр дәриҗисидә буйрутма берилмигәчкә, оқуғучилиримизниң дәрисликләр тапчиллиғиға дуч келиватқанлиғи  бәк ечинарлиқ. ҖУЭМ рәиси «Уйғур авази» гезитиға муштири топлаш мәсилиси һәққидиму әтраплиқ сөз қилди. Бу җәһәттин у буниңдин 20 — 30 жил илгири «Коммунизм туғи» һәм униң қошумчиси «Йеңи һаят» гезитлириниң тарилими 30 — 35 миңға йәткән болсиму, бүгүнки күндә ушбу рәқәмниң аранла 13 — 15 миң әтрапида болуп қелишиниң наһайити ечинарлиқ екәнлигини алаһидә тәкитлиди. У шундақла 150 миңдин ошуқ уйғур яшайдиған Алмута вилайитиниң өзидила елимиз Президентиниң дана сәяситини маңғузуватқан, Қазақстан хәлқи Ассамблеясиниң асасий тәрғибатчиси һәм тәшвиқатчиси болуватқан, пүтүнләй бир хәлиқниң өтмүши билән бүгүнини йорутуп келиватқан мустәқил җумһурийитимиздики уйғур тилида чиқиватқан бирдин-бир рәсмий нәшир — «Уйғур авазиниң» тарилимини һазирқи күндә кам дегәндә 30 миңдин ашуруш мүмкинчилигиниң барлиғини қошумчә қилди. Шаһимәрдан Үсәйин оғли шундақла дуниядики йеганә кәспий театримизниң хәлиқара миқияста аброй-инавити жуқури болсиму, айрим мәсилиләрдә ярдәмгә муһтаҗ екәнлигини йошурмиди. Натиқ бу әснада сөз қозғап, театр гастрольлуқ сәпәрләргә чиққанда, концерт, спектакльларға тамашибин топлаш мәсилисидә айрим қийинчилиқларға дуч келидиғанлиғини, әйнә шундақ пәйтләрдә йәрлик һакимийәтләрниң қоллап-қувәтлишиниң йетишмәй қалидиғанлиғиниму әслитип өтти. Шаһимәрдан Нурумов сөзиниң ахирида өзи рәһбәрлик қиливатқан җәмийәтлик тәшкилатниң Дөләт рәһбири, Қазақстан Хәлқи Ассамблеясиниң Рәиси Нурсултан Назарбаев тәрипидин алға сүрүлгән барлиқ  вәзипиләрниң әмәлиятта өз әксини тепиши йолида шиҗаәтлик пааалийәт елип бериватқанлиғиға тохталди. Болупму мустәқил елимиздики  сәясий турақлиқни, бирлик-өмлүкни, җәмийәтлик разимәнликни қолға кәлтүрүш, дөләт тилини, шуниң билән биллә ана тилимизни, миллий мәдәнийитимизни риваҗландуруш йолида аянмай әмгәк қиливатқанлиғини алаһидә тәкитлиди. Һакимниң һозурида әркин сөһбәт шараитида өткән учришишта Әхмәтҗан Шардинов билән Асимҗан Злавдиновму елимиздики кичик вә оттура тиҗарәтни тәрәққий әткүзүш бойичә пикирлирини оттуриға салди вә Алмута вилайити территориясидә әмәлгә ашуруш мүмкин болған бирқатар лайиһилирини тәклип қилди. Учришиш ахирида Амандық Батталов һозуриға қәдәм тәшрип қилған меһманларға сәмимий миннәтдарлиғини билдүрүп, көтирилгән мәсилиләр билән алға сүрүлгән пикир-тәклипләрниң иҗабий һәл болушиға имканийитиниң яр беришичә ярдәм қилидиғанлиғини,  умумән, бирлишип көтәргән жүкниң һәрқачан йеник болидиғанлиғини ейтти.