• Әхбаратлар еқими
• 09 Қазан, 2014

Апәтниң алдини алайли

От – тилсиз йеға/ Мана яз айлири кетип, күзму йетип кәлди. Демәк, биз, от өчәргүчиләрниң, «баш ағриғи» көпийиду дегән сөз. Чүнки от йеқиш мәвсүми башлиништин илгири, уларниң аһали арисида бехәтәрлик қаидилири вә от кетиш әһваллириниң алдини елиш бойичә чүшәнчә жүргүзүш ишлири башлиниду. Шуниңға мунасивәтлик йеқинда Алмута шәһиридики Пәвқуладдә әһваллар башқармисиниң Медев наһийәлик бөлүмчисидә новәттики жиғин болуп өтти. Мәзкүр баш қошушта өткән жилниң тоққуз ейида йүз бәргән от кетиш әһваллири тәһлил қилинип, уларда йол қоюлған камчилиқлар тоғрилиқ әтраплиқ сөз болди. Җүмлидин мошу вақит ичидә наһийәдә 69 от кетиш тиркәлгән болса, униң 43и турушлуқ секторда орун алған. Әнди бу рәқәмләрни 2013-жил билән селиштуридиған болсақ, улар төвәндикичә: булту 85 өй тилсиз йеғиға оралған болса, униң 72си шәхсий өйләрдә йүз бәргән. Бу йәрдә, әлвәттә, бизниң департамент хадимлириниң турақлиқ аһали билән йеқин мунасивәт орнитип ишлиши нәтижисидә, аз болсиму пәриқ бар екәнлигини байқашқа болиду. Жиғинда гәп болған йәнә бир мәсилә, у шәһәр турғунлириниң бехәтәрлик қаидилиригә риайә қилмаслиғиниң жилдин-жилға өсүватқанлиғи, болупму от йеқиш мәвсүминиң башлиниши биләнла «01»гә телефон қилғучилар сани өсүшкә башлайдиғанлиғи һәққидә болди. Буниң асасий сәвәплири турғунларниң мошу җавапкәрликни әң көп тәләп қилидиған мәвсүмдә электр-кабельлирини орнитиш вә улардин пайдилиниш қаидилиригә риайә қилмаслиқ һәм исситиш пәчлириниң турхунлирини қанунға мувапиқ орнатмай, униң ишқа ярамлиқ яки ярамсиз екәнлигигә нәзәр ағдурмаслиғи болуп һесаплиниду. Шуниң нәтиҗисидә от кетиш әһваллири йүз берип келиватиду. Тәкитләш керәкки, бу паҗиәлик әһвалларниң йүз беришигә 99 пайиз өй егилири сәвәпкар болмақта. Баш қошушта бийилқи от йеқиш мәвсүмигә җиддий тәйярлиқ көрүшни жанландурушқа қаритилған бирқатар қарарлар қобул қилинди. «Сақлиқта хорлуқ йоқ» демәкчи, аддий қаидиләргә көңүл бөлмәй, тилсиз йеға касапитидин өй-җайимиздин, йеқинлиримиздин айрилип қелишимизға йол қоймайли. Бәхтияр ИСРАЙИЛОВ,Медев наһийәлик отқа қарши хизмитиниң чоң инженери.   Алмута шәһири.