• Спорт
• 16 Қазан, 2014

Устаз һөрмитигә беғишланди

Кичикачиноқилиқлар жутидин чиққан һөрмәтлик адәмләрниң һөрмитигә һәрхил чарә-тәдбирләрни өткүзүшни әнъәнигә айландурған. Буниңдин бираз жил илгири атақлиқ чопан, һели мәрһум Сәлим Чормақовниң һөрмитигә волейболдин наһийәләрара мусабиқә өткүзүш әнъәниси моҗут болған болса, кейинки үч-төрт жилда Хәлиқ Қәһримани Мөрдүн Тейипов намидики кубок үчүн спорт мусабиқилири уюштурулуп келиватиду. Йеқинда волейбол бойичә уюштурулған мусабиқә йеза мәктивиниң муәллими Сәйдалим Нәсирдиновниң 60 жиллиқ тәвәллудиға беғишланди. Турнирни Кичик Дехан йеза округиниң һакими Ербол Абшаяқов киришмә сөз билән ачти. Шуниңдин кейин сөз новитини алған жигитбеши Қудрәт Бишәров, мәктәп мудири Әнвәр Сәйдуллаев, мәктәп кәспий иттипақи комитетиниң рәиси Амангелди Ботанбеков, қериндашлири намидин Нәвирдин Мөрдинов вә жут турғуни Скалин Җамалов устазниң көп жиллиқ мевилик әмгигини тәкитләп өтти. Мусабиқиға наһийәниң он йеза округидин командилар қатнашти. Кәскин күрәш шараитида өткән мәзкүр турнирда  М.Тейипов намидики оттура мәктәп командиси биринчи, Чарин йеза округиниң командиси иккинчи, Ақтам үчинчи вә Ардолата төртинчи орунни егилиди. Әң яхши оюнчилардин Ә.Мәсимов, А.Мәсүтов вә Р.Манапов мәхсус номинациялар бойичә мукапатланди. Мусабиқә ғалиплири Сәйдалим Нәсирдиновниң аилә әзалири вә ағиниси Леким Худайқулов тәрипидин маддий соғилар билән тәғдирләнди.

Адилҗан ҺӘМРАЕВ.