• Әхбаратлар еқими
• 23 Қазан, 2014

Тоққуз айниң йәкүни чиқирилди

Алмутида мошу жилниң тоққуз ейидики иҗтимаий-ихтисадий тәрәққиятниң йәкүнлири чиқирилди. Шәһәр һакими Ахметжан Есимовниң рәислигидә өткән кеңәшмидә умумән шәһәр бойичә ихтисатниң барлиқ саһалири бойичә өсүшниң байқалғанлиғи тәкитләнди. Қазақстан Җумһурийити Статистика агентлиғиниң мәлуматлириға қариғанда, Алмутиниң ички регионал мәһсулатиниң өсүши өткән жилниң мошу вақтиға нисбәтән 108,3 пайизни тәшкил қилди. Шуниң билән бир вақитта дуниявий хам әшия базарлиридики әһвалға бағлиқ ташқи сода муамилисидә төвәнләш җәрияни байқиливатиду. Тоққуз айниң бюджети 99,7 пайиз орунланди. — Биз шәһәрниң алаһидилигини һесапқа алған һалда өзимизниң боһранға қарши планимизни ишләп чиқишимиз керәк. Өткән үч чарәкниң йәкүни бойичә Алмута өсүш сүръитини көрситиватиду. 2015-жилни яхши көрсәткүчләр билән башлаш үчүн мошу сүръәтни сақлап қелишимиз керәк, — деди Ахметжан Смағул оғли. Һакимниң сөзичә, буниң үчүн Дөләт рәһбириниң кичик вә оттура тиҗарәтни қоллап-қувәтләш, инвестицияләрни җәлип қилиш, мәркизий вә йәрлик органлириниң вәзипилири билән вакалитини ениқ бәлгүләвелиш бойичә қарарлирини толуқ дәриҗидә орунлаш лазим. Шундақла энергия ресурслири баһалириниң төвәнлишиши вә дуния ихтисадида йүз бериватқан җәриянлар пәйда қилидиған бюджет хираҗәтлириниң қисқириши күтүлүватқан әһвалда мәбләғниң мәхсәтчанлиқ пайдилиниши үстидин назарәтни күчәйтиш зөрүр.