• Әхбаратлар еқими
• 30 Қазан, 2014

ДОСТЛУҚ БИЛӘН ӨМЛҮКНИҢ КӨРҮГИ

Форум/ Мәлумки, елимиздә хәлиқләр достлуғини, өмлүги билән инақлиғини мустәһкәмләштә һөкүмәтлик әмәс тәшкилатларниң атқуруватқан ишлири тилға аларлиқ. Бу әснада Дөләт рәһбири уларға бирқатар вәзипиләрни жүкләп, мәзкүр мәсилиниң нәқәдәр әһмийәтлик екәнлигини һәрқәдәмдә ейтип келиватиду. Җай-җайларда бу тәшкилатлар паалийитини җанландуруш мәхситидә дөләт ғәзнисидин мәлум дәриҗидә мәбләғму бөлүнмәктә. Мәсилән, бийил мошу мәхсәт үчүн 172 миллион тәңгә мәбләғ қараштурулған. Бу, өткән жилға нисбәтән хелила көп екән. Мошу йосунда Уйғур наһийәсидә паалийәт елип бериватқан һөкүмәтлик әмәс тәшкилатларниң әл арисида бирлик вә өмлүкни тәрғип қилип, өскиләң әвлат қәлбигә әң есил қәдрийәтлиримизни сиңдүрүшкә зәмин яритиватқинини атап өтсәк әрзийду. Йеқинда шу ишларниң йәкүни ретидә наһийәдә «Регионлуқ тәрәққият, йәрлик өзини өзи башқурушта һөкүмәтлик әмәс тәшкилатларниң үлүши вә иҗтимаий җавапкәрчилик тәрәққияти» намлиқ һөкүмәтлик әмәс тәшкилатларниң ІІІ регионлуқ форуми өткүзүлүп, униңға хошна Панфилов, Кербулақ, Райимбәк вә Әмгәкчиқазақ наһийәлириниң ички сәясәт бөлүмлириниң, жәмийәтлик бирләшмиләр вә яшлар ресурслиқ мәркәзлириниң рәһбәрлири иштрак қилди. Форум мавзусиға мувапиқ, елимиз Президентиниң сәяситини кәң амма арисида тәрғип қилип, тәрәққиятни алға илгирилитиштә һөкүмәт билән җәмийәтара көрүк болуватқан җәмийәтлик бирләшмиләрниң паалийити һәққидә сөзгә чиққан наһийә һакиминиң орунбасари Д.Деменбаев, «Алмута вилайәтлик Гражданлиқ Альянси» Ассоциацияси шәклидики юридик шәхсләр бирләшмисиниң рәһбири Р.Сейсекенова, «Болашақ» иҗтимаий гражданлиқ базиси» җәмийәтлик бирләшмисиниң рәһбири Р.Абилова, Уйғур наһийәлик «Ұрпақ парызы» жәмийәтлик бирләшмисиниң рәиси Ж.Керимқулов, «Терроризм вә экстремизм мәсилилири бойичә мәркәз» президенти К.Бишманов, Кербулақ наһийәлик «Қамқор» накалар җәмийәтлик бирләшмисиниң рәиси М.Төлегенбаева вә башқилар атқурулуватқан ишларға тохтилип, кәлгүси реҗиләр һәққидә ой-пикирлири билән ортақлашти. Андин вилайәтлик ички сәясәт башқармиси башлиғиниң орунбасари Г.Маупашева бәзи җәмийәтлик бирләшмиләр рәһбәрлиригә миннәтдарлиқ изһар қилип, уларға тәшәккүрнамә вә баһалиқ соғилирини тапшурди. Мәзкүр баш қошуш җәриянида қәйт қилинишичә, җай-җайларда қурулған бәзи җәмийәтлик бирләшмиләрниң һели «уйқида» екәнлигиму мәлум болди. Кәлгүсидә барлиқ һөкүмәтлик әмәс тәшкилатларниң өзара зич мунасивәттә болуп, әл тәрәққияти үчүн үлүш қошуш лазимлиғини алаһидә тәкитлиди.  Махмут ИСРАПИЛОВ. Уйғур наһийәси.