• Әнҗуман
• 13 Қараша, 2014

Академик хатирисигә беғишланди

Өткән һәптидә җәнубий пайтәхттики Достлуқ өйидә җумһурийәтлик  Уйғур этномәдәнийәт мәркизиниң уюштуруши  билән  көрнәклик алим вә җәмийәт әрбаби  Ғоҗәхмәт Сәдвақасовниң туғулғиниға  85  жил толушиға беғишланған әнҗуман болуп өтти. Униңға алимлар, язғучи вә шаирлар, җамаәтчилик вәкиллири, Уйғур вә Панфилов наһийәлиридин кәлгән меһманлар қатнашти. Әнҗуман ҖУЭМ йенидики Алимлар кеңишиниң рәиси Абдуллам Самсақов киришмә сөз билән ачти. Андин риясәтчи — Уйғур театриниң артисти Турдибүви Аблизова дәсләпки сөз новитини филология пәнлириниң доктори Рошәнгүл Аваковаға бәрди. У Ғоҗәхмәт Сәдвақасовниң  җәмийәттә вә илим-пән саһасида әмәлгә ашурған иш-паалийити һәққидә доклад оқуди. Шуниңдин кейин сөзгә чиққан ихтисат пәнлириниң доктори, профессор Аманжол Қошанов, Р.Сулейменов намидики Шәриқшунаслиқ институтиниң мудири Әбсаттар Дербисәли, «Түркий хәлиқләрниң мәдәнийәт фонди» җәмийәтлик бирләшмисиниң президенти Ахмет Дағдуран, Қазақстан Җумһурийитиниң хизмәт көрсәткән әрбаби Йолдаш Азаматов, академик Өмирзақ Айтбаев, Уйғур наһийәси һакиминиң орунбасари Дәулетжан Деменбаев, алимлар Октябрь Җамалдинов, Рисаләт Кәримова, сәясәтшунас Қәһриман Ғоҗәмбәрди вә башқилар Ғ.Сәдвақасов тоғрисидики хатирилири билән бөлүшти. Шаир Мәмтимин Обулқасимов иллиқ ләвзини билдүргәч, өзиниң  алим хатирисигә беғишлап язған шеирини оқуп бәрсә, алимә вә шаирә Патигүл Мәхсәтова устази тоғрисидики хатирилири билән  ортақлишип, алимға беғишлиған шеирини оқуди вә әдипниң рәпиқиси Омақ Һасановаға һөрмәт йүзисидин учисиға кәмзол кийгүзди. Әнҗуман давамида җумһурийәтлик Анилар кеңишиниң әзалири өзлириниң йеқимлиқ нахша вә уссуллирини иҗра қилса, М.Яқупов намидики 101-мәктәп гимназияниң оқуғучилири Ғ.Сәдвақасовқа беғишланған шеирларни оқуди. ҖУЭМ йенидики  Ханим-қизлар   кеңишиниң рәиси Сәнәм Беширова көрнәклик алимниң рәпиқиси Омақ  Һасановаға тәшәккүр изһар қилип, чапан кийгүзди. Өз новитидә Омақ Һасанова йолдишиниң намини қәлбидин өчәрмәй, сақлап келиватқан униң дост-бурадәрлиригә, шагиртлириға вә ушбу мәрасимни уюштурушқа күч чиқарған ҖУЭМ рәиси Шаһимәрдан Нурумовқа   миннәтдарлиғини изһар қилди. Ахирида  көпчиликкә Ғоҗәхмәт Сәдвақасов тоғрилиқ чүширилгән видеофильм көрситилди. Шәмшидин АЮПОВ.