• Әхбаратлар еқими
• 04 Желтоқсан, 2014

Утуқ тиләймиз

Әмгәкчиқазақ наһийәсиниң Пәхрий граждини, пешқәдәм устаз Музәппәр Митәлипов, яшларни билим билән қанатландуруп, уларниң һаяттин өз орнини тепишиға шараит яратқан шәхс. Йеши сәксәндин алқиған мөтивәрни бүгүн исми дунияға тонулған оғли Шөһрәт вә қизи Майсәм вә нәврилириму хошал қилип кәлмәктә: Музәппәр акиниң америкилиқ нәврилири Наргиз суда үзүш билән, Дилшат бокс билән шуғуллинип, чоң-чоң утуқларға еришиветипту. Ақсақалниң қазақстанлиқ нәврилириму қабилийәтлик.                – Яшлиғимизда барлиқ күч-җигәримизни балилар тәрбийисигә сәрип қиливедуқ, шүкри, мана һазир һалавитини көрүватимиз, – дәйду Музәппәр ака пәхирлиниш билән. – Сағлам һаят тәризини күндилик әмигигә айландурған 12 яшлиқ нәврәм Ренат «ҚР спорт шеберіне үміткер» намини елип, бизни наһайити хошал қилди. Әлвәттә, Ренат бу утуққа өзиниң тиришчанлиғи вә җапалиқ әмгигиниң нәтиҗиси билән қол йәткүзди. Униң Алмута шәһиридики Берик Қабулов намидики каратэ мәркизидә тәрбийилиниватқиниға бәш жилдин артуқ вақит болупту. Йәттә йешида спортқа иштияқ бағлиған Ренат спорт маһири Сергей Демидовниң рәһбәрлигидә йерим жил мабайнида шәриқ йәкму-йәклири – шинкиокушинкай билән шуғуллиниду. Спортқа пүткүл вуҗуди билән берилгән у бәш жил мабайнида 60тин ошуқ турнирға қатнишип, униң тәңдин-толисида І орундин көрүнгән. Ренат булту Астанада өткән вә 400 спортчи қатнашқан «Astana cup-2013» очуқ чемпионатиға, бийил 17 мәмликәтниң 250 спортчиси қатнашқан Швейцариядики хәлиқара турнирға иштрак қилип, һәр иккилисидә мукапатлиқ орундин көрүнди. Ренат пәқәт спортнила яхши көрмәйду, у шундақла математика, тил вә әдәбият пәнлириниму сөйүп оқуйду. Асасий вәзиписини билим елиш дәп билиду. 18-декабрь күни Москва шәһиридә яшлар арисида шинкиокушинкай бойичә дуния чемпионати өтиду. Һазир Ренат Митәлипов әшу чемпионатқа қизғин тәйярлиниватиду. Мәхсити — чемпионатта мукапатлиқ орундин көрүнүш. Ата-анисиниң, устазлири билән йеқинлириниң пәхригә айланған яш спортчиға утуқ тиләймиз.

Рашидәм РӘҺМАНОВА.

Әмгәкчиқазақ наһийәси.