• Спорт
• 25 Желтоқсан, 2014

Байсейиттики турнир

Йеза яшлири билән өсмүрләр арисида сағлам һаят тәрзини шәкилләндүрүш, тәнтәрбийә вә спортни тәрәққий әткүзүш, наһийә палванлириниң чевәрлигини һәм дәриҗисини ашуруш мәхситидә йеқинда Байсейит йезисидики Исмайил Тайиров намидики оттура мәктивидә әркин күрәш бойичә вилайәтлик турнир өтти.Мәзкүр турнир йезиниң дәсләпки тиҗарәтчилириниң бири, өз вақтида Байсейитниң барлиқ мәдәний ишлириға, житим балиларға, турмуш шараити төвән аилиләргә қол учини көрсәткән һели мәрһум Муратҗан Зиямовни әскә елишқа беғишланди. Турнирға Алмута, Талғир, Қапчиғай шәһәрлиридин, Уйғур, Қарасай, Җамбул наһийәлиридин кәлгән 234 яш палван қатнашти. Мошу йәрдә яш әвлат тәрбийисигә, балиларниң спорт билән шуғуллинишиға алаһидә көңүл  бөлүп келиватқан челәклик Пәхирдин Тохтиев һәққидә ейтип өткән орунлуқ. У бирнәччә жилдин бери Алмута шәһиридә «Лачин-Палван» спорт клубини тәшкил қилип, өсмүрләрниң спорт билән шуғуллинишиға шараит яритип келиватиду. Кейинирәк у Челәк йезисиму клубниң шөбисини ачти. У йәрдә Абдулла Розибақиев намидики оттура мәктәпниң тәнтәрбийә пәниниң муәллими Абдуғени Исмайилов мәшиқләндүргүчи болуп ишләватиду. Әнди Пәхирдин ака Байсейит, Ғәйрәт, Бижанов йезилиридики мәктәпләрниң тәнтәрбийә муәллимлири билән келишип, бош турған беналарни сетивелип, ремонтлап бәрди. Ечилған секцияләрдә Руслан Мәхпиршаев, Полат Данахунов, Турсун Қурбанов вә Илияс Илияров тәрипидин тәрбийилиниватқан сәра балилири һәрхил дәриҗидики мусабиқиларға қатнишип, мукапатлиқ орунларни егиләп келиватиду. Турнирниң тәнтәнилик қисмини Исмайил Тайиров намидики оттура мәктивиниң мудири Турсунҗан Манапов киришмә сөз билән ачқандин кейин, қазилар топиниң рәиси Мусабек Қапанов, Әмгәкчиқазақ наһийәлик спорт бөлүминиң баш хадими Дархан Әлимхан, Бартоғай йеза округи һакимийитиниң  баш мутәхәссиси Һашир Розахунов, округниң сабиқ һакими, жут активисти Гүлпәм Мәмәтова сөз елип, мәрһум һәққидики хатирилири билән бөлүшти һәм турнирниң  маһийитигә тохталди. Зиямовлар аилиси қериндиши хатирисигә беғишланған бу турнирни өткүзүшкә ярдәм бәргән наһийә мәмурийитигә миннәтдарлиқ изһар қилди. Андин җай-җайлардин кәлгән яш палванлар күч синашти. Икки күнгә созулған мусабиқә интайин қизиқ вә кәскин шараитта өтти.  Һәрхил салмақ дәриҗилири бойичә ғалип чиққан яш палванлар кубок, медаль, дипломлар билән тәғдирлинип, Зиямовлар аилиси тәрипидин тәйярланған соғиларға еришти. Рашидәм РӘҺМАНОВА. Әмгәкчиқазақ наһийәси.