• Йеңилиқлар
• 19 Ақпан, 2015

Телефон арқилиқ сөзләшти

Өткән пәйшәнбә күни Нурсултан Назарбаев Беларусь Җумһурийитиниң Президенти Александр Лукашенко билән телефон арқилиқ сөзләшти. Александр Лукашенко Россия, Украина, Франция президентлириниң вә Германия канцлериниң Минскта болуп өткән «норманд шәклидики» музакирилириниң йәкүнлири тоғрилиқ хәвәрдар қилди. Қазақстан Президенти әхбарат үчүн миннәтдарлиқ билдүрди вә учришишни яхши уюштурғанлиғи, шундақла музакириләрниң утуқлуқ аяқлишиши билән тәбриклиди. Президентлар барлиқ тәрәпләрниң течлиқ җәриянини тәминләш бойичә чиқириватқан күч-қувитиниң Украинидики боһранниң биртәрәп қилинишиға ярдәмлишидиғанлиғиға ишәнчә билдүрди. Улар шундақла йеқинқи вақитта бизниң мәмликәттә Беларусь, Қазақстан вә Россия президентлириниң учришишини өткүзүш тоғрилиқ келишти. Сөһбәт Беларусь тәрәпниң тәшәббуси билән өткүзүлди. *** Қазақстан Президенти Германия Федерал канцлери Ангела Меркель билән телефон арқилиқ сөзләшти. Нурсултан Назарбаев билән Ангела Меркель Россия, Украина, Франция Президентлири вә Германия Канцлериниң Минскта өткүзгән «норманд шәклидики» музакирилириниң йәкүнлири тоғрилиқ пикир елишти. Дөләт рәһбири Федерал канцлерниң Минск учришишиниң утуқлуқ аяқлишишиға салмақлиқ һәссә қошқанлиғини қәйт қилди. Ангела Меркель Қазақстан Президентиниң Украининиң шәрқий-җәнубидики тоқунушни течлиқ йоли билән биртәрәп қилиш җәриянини илгирилитишкә чиқириватқан күч-қувитиниң әһмийәткә егә екәнлигини тәкитлиди вә мошу муһим ишни давамлаштурушни илтимас қилип, Астанада «норманд төртлүгиниң» учришишини өткүзүшниң еһтималдин жирақ әмәслигини тилға алди. Сөһбәтдашлар барлиқ тәрәпләрниң течлиқ җәриянини тәминләш бойичә чиқириватқан күч-қувитиниң Украинидики боһранни биртәрәп қилишқа ярдәм қилидиғанлиғиға ишәнчә билдүрди. Улар шундақла Қазақстан билән Германия һәмкарлиғиниң жуқури дәриҗидә екәнлигини қанаәтлиниш билән қәйт қилди. Сөһбәт Германия тәрәпниң тәшәббуси билән өткүзүлди. Өткән шәнбә күни Нурсултан Назарбаев Россия Федерациясиниң Президенти Владимир Путин билән телефон арқилиқ сөзләшти. Икки мәмликәт рәһбири Украина боһринини биртәрәп қилишқа қаритилған Минск учришишиниң йәкүнлирини муһакимә қилди. Қазақстан Президенти нәқ алий дәриҗидики «норманд төртлиги» учришишиниң вә болупму Владимир Путинниң музакириләрдики актив мәвқәсиниң Минсктики келишимләрниң қолға кәлтүрүлүшигә ярдәм қилғанлиғини тәкитлиди. Президентлар тоқунушуватқан һәр икки тәрәпниң бәлгүләнгән вақитта (2015-ж. 15-февраль 00.00 саатта) оқ етишни тохтитиш тоғрилиқ келишимләрни орунлинишиниң наһайити әһмийәткә егә екәнлигини тәкитлиди. Улар шундақла течлиқ җәриянни тәминләш бойичә күч-қувәтниң Украинидики тоқунушни йоқ қилишқа ярдәм қилидиғанлиғиға ишәнчә билдүрди. Владимир Путин шундақла ихтисат саһасидики бирләшкән иш-һәрикәтләрни муһакимә қилиш үчүн Беларусь, Қазақстан вә Россия рәһбәрлириниң Астанада үчтәрәплимилик учришишиға қатнишишқа тәйяр екәнлигини билдүрди. Сөһбәт Россия тәрәпниң тәшәббуси билән өткүзүлди. *** 14-февральда Нурсултан Назарбаев Украина Президенти Петр Порошенко билән телефон арқилиқ сөзләшти. Президентлар Украина боһринини биртәрәп қилишқа қаритилған Минск учришишиниң йәкүнлирини муһакимә қилди. Украина Президенти Украининиң шәрқий-җәнубидики тоқунушни течлиқ йоли билән биртәрәп қилиш җәриянини илгирилитишкә қатнашқанлиғи вә салмақлиқ һәссә қошқанлиғи үчүн Нурсултан Назарбаевқа миннәтдарлиқ билдүрүп, буниңдин кейинму мошу йөнилиштә күч чиқиришини илтимас қилди. Петр Порошенко Украина тәрәпниң бәлгүләнгән вақитта оқ етишни тохтидиғанлиғиға ишәндүрүп, башқа тәрәпниңму шундақ қилишиниң зөрүр екәнлигигә диққәт ағдурди. Қазақстан Президенти тоқунушқа мунасивәтлик барлиқ тәрәпләрниң Минск келишимлиридә қобул қилинған чариләр комплексиниң еғишмай орунлишини тәминлигәнлигиниң муһим екәнлигини, буни пүткүл дунияниң күтүватқанлиғини тәкитлиди. Сөһбәт Украина тәрәпниң тәшәббуси билән өткүзүлди.